Yohan 6 - Gvray Shànshér Mòngkà Kagvp Àngshv́r

Vsv̀ng 5,000 kaq shvá:mò we

¹ Wemèpvng Yesu nø, Tiberia tǿò we Galili Tìnúngmè kupa sv̀ng léshìá:mì.

² À:ngí zarì kaq dvbanò we vtiqlv́mrì sv̀ng yv́ng lú:nò rvtnø̀, vsv̀ng loksok lokgaí Àng mèpvng cà:nòe.

³ Yesu nø shìgùng sv̀ng ngangá:mì nø̀ Àng coqcv́nrì nv̀ng weyv́ngø runge.

⁴ Wedvgvp nø Yuda vsv̀ngrìò Shvlé Bóy gø tuq yùl ráì.

⁵ Vsv̀ng loksok lokga Àng yv́ngsv̀ng di ráì we Yesuí yv̀ng bǿà nìnø, Pilip kaq, “Vsv̀ng yadv́ngte v́mlv́m dvpvt, nøngmaqí kayv́ng kèní v́mpà wvnlv́m?” wa rø:tnòe.

⁶ Yadø rø:tnò lòng nø Pilip sv̀ng vlø:tnò we wa íe. Pàwá wani kadø wàlv́m walòng nø Àng nøt taq vv́lshaq íe.

⁷ Pilipmí Àng sv̀ng, “Nøngmaqí gv̀msùng vníyá dinari dvpǿ la wa:nì nìgø tamǿrcè gø vpvt na mø̀í,” wa vtá:nòe.

⁸ Àng coqcv́nrì kèní tiqpè í we Simon Piter àngnvmpè Anderuí Àng sv̀ng,

⁹ “Zongshar zidòng pungwàgø̀m nv̀ng ngacè vnígo vdá we lvngàsvré tiqpè nø yayv́ng vle. Ínìgø vsv̀ng yadv́ngte luq dvhø̀ taq yahvncè nø pà shǿn tv́mshì má?” a:lòe.

¹⁰ Yesuí, “Vsvngrì rúng dèzv́rnø̀ng,” a:lòe. Wezàng nø shønlat mvme yoe. Wekvt àngmaq rúng bǿì. Lvngàrérì wa pungwà kíng gǿ dv́ngte íe.

¹¹ Yesuí zidòngrì lùò nø̀, Gvray kaq oqà wa dá:ngí, rúng bǿì rì sv̀ng àngmaq shòng dv́ngte túnaòe. Welòng dø ngarì gø túnaòe.

¹² Àngmaq vgàá:mì kvt, Yesuí Àng coqcv́nrì sv̀ng, “Tiqhvn gø mvsǿmlv́m dvpvt, v́m vchéò rì rèkulnø̀ng,” a:lòe.

¹³ Wervtnø̀ zongshar zidòng pungwà gø̀m kèní vsv̀ngrìí v́m bǿà nø̀ vchéò we àngshirì sv̀ng rvku:lò nìnø, tiqcé vní jvng zø̀ngá:mì.

¹⁴ À:ngí wà bǿà we shálv́m mvshv́lpvrá yalòng sv̀ng vsv̀ng loksu:kngí yv̀ng bǿà kvt, “Yapè nø jø̀ngjǿng ni rvgaq tø̀m sv̀ng dìlv́m vdv́nshaq pè, Kàdvtutshú wepè ni íe,” wae.

¹⁵ Àng sv̀ng mvdø̀ng mvdaq koqkv́m zv́nglv́m wàò we sv̀ng Yesuí dǿm bǿà rvtnø̀, vrá tiqkvt Àng wawa shìgùng sv̀ng yilshìá:mì.

Yesu tì mvdv̀m di we

¹⁶ Dørø̀m høqa:tnà dvgvp, Àng coqcv́nrì nø tìnúngmè sv̀ng shúngshìá:mì nø̀,

¹⁷ kùngshí tiqgø̀m taq zv́ngshì dá:ngí, tìnúngmè kupa Kapernum sv̀ng léshìe. Wedvgvp nv̀m døá:mì nìgø Yesu nø àngmaq yv́ngsv̀ng shini mvtuq ra.

¹⁸ Nv̀mbø̀ng mvrù mut daqì nø̀ tìma gø pvlòng lú:ngì.

¹⁹ Àngmaq nø vshø̀m vbì ming dv́ngte rvpshì bǿì dvgvp, Yesu nø tì mvdv̀mdv̀m di nø̀, kùngshí shvnvng tvp níshì ráì we sv̀ng àngmaqí yv̀ng bǿà nìnø shérvkaq svre lú:ngì.

²⁰ Yesuí àngmaq sv̀ng, “Ngà ǿngàe, mèsèrenø̀ngni,” a:lòe.

²¹ Wekvt àngmaqí Àng sv̀ng shaqshaq wa kùngshí vdòng dvgòng bǿà nìnø, kùngshí nø wela:ngí chàng àngmaq dìlv́m yv́ngsv̀ng tuqá:mì.

Yesu nø gø̀nshaq zidòng í we

²² Mèpvng ni taq, tìnúngmè nv̀msvr paø v̀l ráì we vsv̀ng loksok mvdòí, weyv́ngø kùngshí tiqgø̀m wa vlvp we dvdvm rǿna:tnà. Kùngshí wegø̀m taq nø Yesu màbá dø Àng coqcv́nrì wa léshìvp we sv̀ng shá bǿà.

²³ Wekvt Kàngpèí Gvray kaq oqà wa dá:ngí àngmaq zidòng v́ma:pmì zàng shvnvng yv́ngø Tiberia wamà kèní kùngshí tiqmaq koqshì ráì.

²⁴ Vsv̀ng loksokrìí Yesu nv̀ng Àng coqcv́nrì weyv́ngø màvl we dǿm bǿà kvt, àngmaq gø kùngshí werì taq zv́ngshì nø̀ Yesu sv̀ng lálv́m Kapernum pa sv̀ng búngá:mì.

²⁵ Tìnúngmè nv̀mløp paø àngmaqí Àng sv̀ng lá lún bǿà nìnø, “Rabiá, Nà nø ya yv́ngsv̀ng kadvgvp ètuqa:pmì?” wa rø:tnòe.

²⁶ Yesuí àngmaq sv̀ng, “Ngàí kàdøng vla:tnìni, nàmaqí Ngà sv̀ng èláshà lòng nø, shálv́m mvshv́lpvrárì sv̀ng èsíngnø̀ng rvt mø̀í. Zidòng èv́mnø̀ng nø̀ nàgàvpshà rvt mv̀ng íe.

²⁷ Bøp sháò we v́mlv́m dvpvt mèdèzaqshìnø̀ngni. Dvciqlvpat gø̀nshaq dvcú:nò we v́mlv́m dvpvt dèzaqshìnø̀ng. Vsv̀ng Àngcèpèí nàmaq sv̀ng v́mlv́m welòng èzí daqnø̀nge. Kadø íe wani yadø zílv́m vmíng vkv́ng Vpè Gvrayí Ngà kaq vzíshaq íe,” wa vtá:nòe.

²⁸ Wervt àngmaqí, “Nøngmaq sv̀ng Gvrayí wá dvzv́r mvyǿ we bv̀nlìrì nø kapà íe má?” wa rø:tnòe.

²⁹ Yesuí àngmaq sv̀ng, “Gvrayí wá dvzv́r mvyǿ we bv̀nlì nø, À:ngí dvzv́r daqà pè sv̀ng nàmaq kv́mlv́m lòng íe,” a:lòe.

³⁰ Àngmaqí, “Wedø íni nøngmaqí yà:ngì nø̀ Nà sv̀ng kv́mlv́m dvpvt kapà mvshv́lpvrá èwàò ni má? Nàí pà èwàò ni?

³¹ Kàru taq, ‘À:ngí àngmaq v́mlv́m dvpvt muqlàng kèní zidòng zí yà:ngà,’ wa vru yà:ngà dø, nøngmaq vkop vkàngmaq nø rvgaq mvgung móngø manna zidòng v́m yà:ngì,” a:lòe.

³² Yesuí àngmaq sv̀ng, “Ngàí kàdøng vla:tnìni, muqlàng kèní zidòng èzí yv̀ngshà pè nø Moshi mø̀í. Muqlàng kèní zidòng mvdø̀ng lòng èzínø̀ng pè nø Ngà Vpè mv̀ng íe.

³³ Kadø íe wani Gvrayò zidòng nø muqlàng kèní lashì daqì nø̀, rvgaq tø̀m vsv̀ng kaq gø̀nshaq zíshú pè íe,” a:lòe.

³⁴ Wervt àngmaqí, “Vshaqpèá, zidòng welòng nøngmaq sv̀ng mànarnar èzíshà lè,” a:lòe.

³⁵ Yesuí, “Ngà nø gø̀nshaq zidòng ǿngàe. Ngà yv́ng di ra vsv̀ng nø kadvgvp gø svrí mvshì long. Ngà sv̀ng kv́m we kagǿ gø, dvciqciq mvbál long.

³⁶ Íwe Ngàí vlvpshà dø Ngà sv̀ng èyv̀ngshà nìgø, mèkv́mshà.

³⁷ Vpèí Ngà sv̀ng èzøngvt we kagǿ ínìgø Ngà yv́ngsv̀ng di rae. Ngà yvng di ra we kagǿ sv̀ng gø, kadvgvp gø Ngàí mvgurò.

³⁸ Kadø íe wani muqlàng kèní Ngà langshø̀ng dakngà lòng nø, Ngà nøt cv́nshìlv́m dvpvt mø̀í. Ngà sv̀ng dèzv́r dakngà pè Àng nøt cv̀nlv́m dvpvt íe.

³⁹ Ngà sv̀ng dèzv́r dakngà pè Àng nøt nø, À:ngí Ngà sv̀ng vzíshaq rì shvngbe màmvng dø lv̀ngdø̀m ni taq àngmaq sv̀ng Ngàí dvzunlv́m yalòng íe.

⁴⁰ Kadø íe wani Vpè Àng nøt nø Àngcèpè sv̀ng yà:ngò nø̀ kv́m we gǿ vrà:mí dvciqlvpat gø̀nshaq lúnlv́m yalòng íe. Vrá, lv̀ngdø̀m ni taq Ngàí àngmaq sv̀ng dvzunlv́m íe,” a:lòe.

⁴¹ Yesuí, “Ngà nø muqlàng kèní la daqà we zidòng ǿngàe,” wa kà rvtnø̀, Yuda vsv̀ngrì nø Àng kaq vbønshì lú:ngì.

⁴² “Yesu yapè nø Yosep àngcèpè ni mø̀í má? Àngpè àngmè gø nøngmaqí sháì we mø̀í má? Íni, akvt kadø í nø, ‘Ngà nø muqlàng kèní langshø̀ng dakngà,’ wa shø̀ne má?” wa àngmaq vrùnge.

⁴³ Yesuí àngmaq sv̀ng, “Mènàbønshìnø̀ngni.

⁴⁴ Ngà sv̀ng dèzv́r dakngà pè Vpèí vshòò gǿ wa mø̀í nìnø, Ngà yv́ngsv̀ng kagǿ gø dí mvlúnshì. Ngà yv́ng di ra gǿ sv̀ng nø lv̀ngdø̀m ni taq Ngàí dvzunlv́m íe.

⁴⁵ Kàdvtutshúrì kàru taq, ‘Àngmaq shvngbe nø Gvrayí shvngøtshaq í longe,’ wa nø̀ vru yà:ngà. Vpè kà táò nø̀ Àng yv́ngkèní cvnshì gǿ vrv̀m nø Ngà yv́ngsv̀ng di rae.

⁴⁶ Gvray yv́ngkèní dì daqì pèí wa mø̀í nìnø, Vpè sv̀ng tiqgǿí gø mvyv̀ng dá:rò. Ngàí wa Vpè sv̀ng vyv́ngshaq íe.

⁴⁷ Ngàí kàdøng vla:tnìni, Ngà sv̀ng kv́m gǿ nø dvciqlvpat gø̀nshaq lúne.

⁴⁸ Ngà nø gø̀nshaq zidòng ǿngàe.

⁴⁹ Nàmaq nvkop nvkàngmaq nø rvgaq mvgung móngø manna vm nìgø wedøni shì yà:ngì.

⁵⁰ Muqlàng kèní la daqà we zidòng vm gǿ mv̀ng nø mvshì long.

⁵¹ Ngà nø muqlàng kèní la daqà we cúnshì we zidòng ǿngàe. Zidòng yalòng á:mò we kagǿ ínìgø dvciqlvpat cúnshì longe. Vrá rvgaq tø̀m vsv̀ngrì cúnshìlv́m dvpvt Ngàí zílv́m zidòng nø, Ngà sha íe,” a:lòe.

⁵² Wervtnø̀ Yuda vsv̀ngrì nø tasv̀ng vzø̀ng sórí, “Yapèí nøngmaq sv̀ng Àng sha dvkélv́m rvt kadø zílv́m wa má?” wae.

⁵³ Yesuí àngmaq sv̀ng, “Ngàí kàdøng vla:tnìni, nàmaq nø Vsv̀ng Àngcèpè sha mèkénø̀ng, Àng shvwi mèaqnø̀ng nìnø nàmaq vdòng taq gø̀nshaq màvl.

⁵⁴ Ngà sha ke nø̀ Ngà shvwi aq vsv̀ng nø dvciqlvpat gø̀nshaq lú:nòe. Vrá, lv̀ngdø̀m ni taq Ngàí àng sv̀ng dvzunlv́m íe.

⁵⁵ Pàwá wani Ngà sha nø v́mlv́m mvdø̀ng íe. Ngà shvwi gø aqlv́m mvdø̀ng íe.

⁵⁶ Ngà sha ke nø̀ Ngà shvwi aq vsv̀ng nø, Ngà vdòngø v́l døng nø̀, Ngà gø àng vdòngø v́l dønge.

⁵⁷ Cúnshì pè Vpèí Ngà sv̀ng dèzv́r dakngà nø̀, Vpè taqkèní Ngà gø cúnshø̀ng dø tiqdvchá, Ngà sha ke gǿ gø Ngà taqkèní cúnshì longe.

⁵⁸ Yalòng nø muqlàng kèní la daqà we zidòng íe. Nvkop nvkàngmaq nø manna vm nìgø shì yà:ngì. Ínìgø zidòng yalòng vm gǿ nø dvciqlvpat cúnshì longe,” a:lòe.

⁵⁹ Yadv́ng pv̀n nø Yesuí Kapernum mvrìng júrøt chø̀m taq shvngø:tnò dvgvp shø̀n yà:ngà rì íe.

Coqcv́n mvme gǿ rv́lshìá:mì we

⁶⁰ Àng coqcv́nrì mvme gǿí tá bǿà kvt, “Yalòng nø vtvngshaq rvzaq we kà íe. Kagǿí vto ngu:tnò má?” wae.

⁶¹ Kà yalòng dang Àng coqcv́nrì vbønshì we Yesuí dǿ:mò rvtnø̀, “Ngà kà yalù:ngí nàmaq nøt nàtøpnø̀ng má?

⁶² Vsv̀ng Àngcèpè nø vzv̀ng Àng v́lrà yv́ngsv̀ng rvlv̀ngvm we èyv̀ng lóngnø̀ng kvt kadø èí lóngnø̀ng má?

⁶³ Gvray Pvlàcèí nø gø̀nshaq zie, vsv̀ng nònggù:ní nø pàgø wá mvlúnshì. Ngàí nàmaq sv̀ng shø̀nò we kàrì nø, Pvlàcè nv̀ng gø̀nshaq íe.

⁶⁴ Íwe nàmaq taq mvkv́m we tiqmaq vle,” a:lòe. Kadø íe wani mvkv́m rì nø kagǿmaq í we nv̀ng Àng sv̀ng nvmv́mlv́m pè nø kagǿ í we sv̀ng Yesuí nv̀mlat kèní sháòe.

⁶⁵ Vrá, À:ngí, “Yalòng rvtnø̀ Ngàí nàmaq sv̀ng, ‘Vpèí àng sv̀ng dvzá:rò we mø̀í nìnø, Ngà yv́ngsv̀ng dí lú:nò we nø tiqgǿ gø màvl,’ lvvlvpshà,” a:lòe.

⁶⁶ Wekvt kèní Àng coqcv́n mvme gǿ rv́lshìá:mì nø̀ Àng mèpvng mvzv̀ná:mì.

⁶⁷ Wervtnø̀ coqcv́n Tiqcé Vnípè sv̀ng Yesuí, “Nàmaq nà èlonø̀ngni má?” a:lòe.

⁶⁸ Simon Piterí, “Kàngpèá, nøngmaq nø kagǿ yv́ngsv̀ng lvloìni? Dvciqlvpat gø̀nshaq kàrì nø Nà yv́ng wa vle.

⁶⁹ Nà nø Gvray Àng Shànshér pè èí we sv̀ng nøngmaq kv́m gø kv́m bǿshà nø̀ shá gø shá bǿshà,” wa vtá:nòe.

⁷⁰ Yesuí, “Nàmaq Tiqcé Vnípè nø Ngàí rvcv̀ng yv̀ngshà pèla èínø̀nge. Íwe nàmaq kèní tiqpè nø cáng íe,” a:lòe.

⁷¹ À:ngí yadø shø̀:nò we nø, Iskariot Simon àngcè Yuda sv̀ng wa we íe. Àng nø coqcv́n Tiqcé Vnípè taq vbá we, mèpvng Yesu sv̀ng nvmv́mlv́m pè íe.