Yohan 5 - Gvray Shànshér Mòngkà Kagvp Àngshv́r

Hí wur shì vsv̀ng dvba:nò we

¹ Wemèpvng Yuda vsv̀ngrì bóy tiqlòng vl rvtnø̀ Yesu nø Yerusalem sv̀ng ngangá:mì.

² Yerusalem vdòng Vyv̀ng Gòngchit shvnvngø Hebru kàí Betzada tǿò we tìdøm tiqlòng vle. We tìdøm yv́ng vzøpshaq kùngjv̀m pungwà lòng vle.

³ Werì kùngjv̀m taq nø za vsv̀ngrì í we nemànrì, hízerì nv̀ng hí wur shì rì loksok vyálshìe. (Àngmaqí nø tì bvlongshì long we sv̀ng caòe.

⁴ Kadø íe wani Kàngpè muqlàng dvzv́r tiqgǿ nø tìdøm sv̀ng àngkvtkvt lashì daq weí tì bvlong lú:ngò kvt tìdøm sv̀ng nv̀mlat lashìvm gǿ nø, kapàí za nìgø banvme).

⁵ Weyv́ngø, vshø̀mcé vshvt nǿng zà daqì we vsv̀ng tiqgǿ vbáe.

⁶ Àng vyálshì da we sv̀ng Yesuí yv̀ng bǿà. Àng nø gvzà vlé dø zà daqì we shá bǿà kvt, À:ngí, “Nà ban mèyǿ má?” wa rø:tnòe.

⁷ Za pèí, “Vshaqpèá, tì bvlong lú:ngò ke, tìdøm sv̀ng ngà kaq zønlv́m vsv̀ng màvl. Ngà shøtshø̀ng dvgvp, ngà vzv̀ng dvgá vsv̀ng lè zønshìvme,” wa vtá:nòe.

⁸ Yesuí, “Èkungshì. Nà pvlu èlvngshì nø̀ èdi,” a:lòe.

⁹ Wela:ngí wepè baná:mì rvt, àng pvlu lvngshì nø̀ die. Weni nø Narni íe.

¹⁰ Wervtnø̀ dvban bǿà pè kaq Yuda vsv̀ng shølshúrìí, “Dèni nø Narni íe. Nà pvlu èlvngshì lòng nø dvrá nv̀ng màbóng,” a:lòe.

¹¹ Íwe à:ngí, “Ngà sv̀ng dèban bǿngà pèí, ‘Nà pvlu èlvngshì nø̀ èdi,’ èvle,” wa vtá:nòe.

¹² Àngmaqí, “‘Nà sv̀ng pvlu èlvngshì nø̀ èdi,’ èvl pè nø kagǿ íe?” wa rø:tnòe.

¹³ Íwe wezàngø vsv̀ng gø luq nø̀, Yesu gø yilshìá:mì rvt, àng kaq dvban bǿà pè nø kagǿ í we mvshá bǿà.

¹⁴ Wemèpvng, Noqngø̀m Tø̀ngnø taq àng sv̀ng Yesuí yv̀ng bǿà kvt, “Èyà:ngò, nà nø dvbanshaq èíá:mì. Yamvdv̀m té mvgvm pv̀n màhǿmlv́m rvt, akvt kèní mvrà mèwani,” a:lòe.

¹⁵ Wepè dìá:mì nø̀, Yuda vsv̀ng shølshúrì kaq, àng sv̀ng dvbana:pmà pè nø Yesu í we dvtáòe.

¹⁶ Yesuí Narni taq yarì wàò rvtnø̀, Yuda vsv̀ng shølshúrìí Àng sv̀ng dvki vrè pv̀ng lú:ngà.

¹⁷ Yesuí àngmaq sv̀ng, “Vpèí nø akvt høq bv̀nlì wá ma:nò rvt, Ngàí gø wá mvnòe,” a:lòe.

¹⁸ À:ngí nø Narni dvrá sv̀ng ca:tnò we wa mvtaq, téwa nø Gvray kaq gø Àngpè tǿò yv́ngkèní Gvray nv̀ng dvchá dvdutshì rvt, Yuda vsv̀ng shølshúrìí Àng sv̀ng shvtlv́m té dvzaqshì lú:ngì.

Àngcèpè vmíng vkv́ng

¹⁹ Wekvt Yesuí àngmaq sv̀ng vtá:nò we nø, “Ngàí kàdøng vla:tnìni, Àngcèpèí nø Àng nø:tní wa tiqpv̀n gø wá mvlú:nò. Àngpèí wàò lòng sv̀ng yà:ngò nø̀ wa wá lúnòe. Kadø íe wani Àngpèí wàò pv̀n wa Àngcèpèí gø wàòe.

²⁰ Àngpè nø Àngcèpè sv̀ng shóngshì rvtnø̀, À:ngí wàò dv́ngte Àngcèpè sv̀ng shvya:ngòe. Vrá, nàmaq dàlv́m dvpvt, yarì mvdv̀mø ring we bv̀nlìrì gø À:ngí Àngcèpè sv̀ng shvyvng daqòe.

²¹ Àngpèí shìrì sv̀ng dvzu:nò nø̀ gø̀nshaq dvcú:nò dø, Àngcèpèí gø welòng døni dvcún mvyǿ dv́ngte sv̀ng dvcú:nòe.

²² Vrá, Àngpèí nø kagǿ sv̀ng gø kà mvngéò. Kàngélv́m vmíng shvngbe nø Àngcèpè sv̀ng vzíshaq íe.

²³ Yalòng nø àngmaqí Àngpè sv̀ng vpǿò dø Àngcèpè sv̀ng gø vpǿlv́m dvpvt íe. Àngcèpè kaq màpǿò gǿ nø Àng kaq dvzv́r daqà we Àngpè sv̀ng gø màpǿò we ni íe.

²⁴ Ngàí kàdøng vla:tnìni, Ngà kà tashì nø̀ Ngà sv̀ng dèzv́r dakngà pè sv̀ng kv́m gǿí nø dvciqlvpat gø̀nshaq lú:nò nø̀, kàngé we màhǿ:mò. Àng nø shìlv́m lòng kèní cúnshìlv́m yv́ngsv̀ng gòngvm we íe.

Zun long we vnípv̀n

²⁵ Ngàí kàdøng vla:tnìni, shì rìí nø Gvray Àngcèpè kà tá lú:ngò we rvtø̀ tuq rae, akvt gø íe. Àng kà sv̀ng táòrì nø cúnshì longe.

²⁶ Kadø íe wani Àngpè nø gø̀nshaq àngké í dø tiqdvchá, Àngcèpè sv̀ng gø gø̀nshaq àngké í dvzv́r bǿà.

²⁷ Vrá, Àng nø Vsv̀ng Àngcèpè í rvtnø̀, kàngélv́m vmíng Gvrayí Àng sv̀ng vzíshaq íe.

²⁸ Yalòng sv̀ng mènàtiqnø̀ngni. Pàwá wani dvgv̀m vdòng taq vl rì shvngbeí Àngcèpè kà táò nø̀,

²⁹ búng long we tiqrvtø̀ tuq rae. Shvla dø wàò rì nø dvciqlvpat gø̀nshaq lúnlv́m zun longe. Mvgvm dø wàò rì nø mvrà shvrilv́m dvpvt zun longe.

³⁰ Ngà vdè nø:tní nø pà gø wá mvlúnò. Vpèí Ngà sv̀ng shø̀n daq dø wa kàngéngòe. Ngàí nø Ngà nøt sv̀ng màcv́nshaq Ngà sv̀ng dèzv́r dakngà pè Àng nøt sv̀ng cv̀nò rvt, Ngàí nø døngman dø kàngéngòe.

Yesu dang shvkse wáshì rì

³¹ Ngà nø Ngà dvpvt shvkse wv́ngshø̀ng we í nìnø, Ngà shvksekà nø mvdìng.

³² Ngà dvpvt shvkse wáashú nø dvgá tiqgǿ èv́lange. Ngà dvpvt Àng shvkse wáshì lòng nø dìng we Ngàí shángòe.

³³ Nàmaqí Yohan yv́ngsv̀ng gùn dvtøpshúrì dèzv́r bǿshà ke, àng gø dìnglòng dvpvt shvkse wáshì bǿì.

³⁴ Íwe Ngà dvpvt vsà:ngí shvkse wáa mvrà. Nàmaq gø̀nshaq chutchv́ng lúnlv́m dvpvt lè Ngàí yarì shø̀nò we íe.

³⁵ Yohan nø gwa nø̀ gá we svmigwìn tiqlòng dø í nø̀, nàmaq gø àng gálòng taq tiqchàmcè dèbù bǿshà.

³⁶ Íwe Yohan shvkse kà mvdv̀m té ring we shvkse kà Ngà yv́ng vle. Akvt wv̀ngò bv̀nlìrì nø Ngàí wá dvdv́nglv́m rvt Vpèí èzǿng bǿngà bv̀nlìrì íe. Bv̀nlì werìí ni Ngà sv̀ng Vpèí dèzv́r dakngà we shvkse wàòe.

³⁷ Ngà sv̀ng dèzv́r dakngà pè Vpè gø Ngà dvpvt shvkse wáshì bǿì. Àng kà sv̀ng nàmaqí kadvgvp gø mètá dv́rnø̀ng. Àng mv̀rshv̀m sv̀ng gø mèyv̀ng dv́rnø̀ng.

³⁸ À:ngí dvzv́r daqà pè sv̀ng nàmaq mèkv́mnø̀ng rvtnø̀, Àng mòngkà gø nàmaq nøt vdòngø mèrínø̀ng.

³⁹ Dvciqlvpat gø̀nshaq nø Shànshér Kàru vdòng taq vle èlv́nnø̀ng rvt, nàmaqí welòng sv̀ng nàjángnø̀nge. Shànshér Kàru welù:ngí ni Ngà dang shvkse wàòe.

⁴⁰ Íwe dvciqlvpat gø̀nshaq lúnlv́m dvpvt nàmaq nø Ngà yv́ngsv̀ng dí mètánø̀ng.

⁴¹ Vsà:ngí dvgùng èzøngvt we sv̀ng Ngàí lángò we mø̀í.

⁴² Íwe Gvray shóngnøt nø nàmaq nøt mvsø̀n taq màvl we Ngàí shángòe.

⁴³ Vpè bø̀ng kèní dø̀ng dakngà we Ngà sv̀ng nàmaqí mènàtoshà. Dvgá tiqgǿ nø àng vdè bø̀ng kèní di ra nìnø, àng sv̀ng nàmaqí nàto lóngnø̀nge.

⁴⁴ Nàmaq nø tasv̀ng dvgùng vzíkelv́m lòng wa èlánø̀nge. Tiqgǿ wa í pè Gvrayí zi daq we dvgùng sv̀ng nø mèlánø̀ng rvt, kadøwa Ngà sv̀ng lekv́mnø̀ngni?

⁴⁵ Vpè mv́rdv̀ngø nàmaq sv̀ng kolv́m pè nø Ngà íe mèlv́nnø̀ngni. Nàmaq sv̀ng kolv́m pè nø nàmaqí nàlǿmnø̀ng pè Moshi mv̀ng íe.

⁴⁶ Moshií nø Ngà dang vru yà:ngà rvtnø̀, Moshi sv̀ng èkv́mnø̀ng nìnø, Ngà sv̀ng gø kv́m rà we íe.

⁴⁷ Ínìgø à:ngí vru yà:ngà lòng sv̀ng nàmaq mèkv́mnø̀ng nìnø, kadøwa Ngà kàrì sv̀ng gø lekv́mnø̀ngni?” a:lòe.