Yohan 21 - Gvray Shànshér Mòngkà Kagvp Àngshv́r

Yesu dvtánshì we

¹ Wemèpvng Yesu nø Tiberia Tìnúngmè shvnvng coqcv́nrì sv̀ng vrá tiqkvt dvtánshìe. Dvtánshì lòng nø yadø íe.

² Simon Piter, Didimu tǿò pè Toma, Galili móng Kana rvwápè Nataniel, Zebedi àngcè pèní nv̀ng Àng coqcv́n dvgá vnípè gø tiqdø vle.

³ Simon Piterí àngmaq sv̀ng, “Ngà nø nga gøpkengvme,” a:lòe. Àngmaqí, “Nøngmaq lvngà gø nà nv̀ng dìlv́m íe,” a:lòe. Àngmaq búng nø kùngshí vdòng zv́ngshìá:mì. Íwe, weyaq taq àngmaqí tiqgo gø gøp mvlú:nò.

⁴ Gá daqì dvgvp, Yesu nø vdàm pa yv́ng ripme. Íwe coqcv́nrìí Yesu í we màmvshá:lò.

⁵ Wekvt Yesuí, “Rv̀mnvngrìé, nga tvp mèlúnnø̀ng má?” wa rø:tnòe. Àngmaqí, “Mvlú:ni,” wa vtá:nòe.

⁶ À:ngí, “Kùngshí vbàngpa sv̀ng shǿmgún dègupnø̀ng, wekvt nga èlún daqnø̀nge,” a:lòe. Àngmaqí shǿmgún dvgup bǿà nìnø, shv́l mvdá:ngò høq nga gvzà lún bǿà.

⁷ Wekvt Yesu shóngshì we coqcv́npèí Piter sv̀ng, “Kàngpè íe!” a:lòe. Simon Piterí, Kàngpè í we tá bǿà kvt, belaq chutshì dá:rì rvt, mvdv̀m bèlaqí dvchvtshì nø̀, tìnúngmè sv̀ng dvgupshìá:mì.

⁸ Coqcv́n wápèla nø, nga dv̀n í we shǿmgún shà:lò sórí, kùngshícè taq rvpshìa:tnì. Kadø íe wani àngmaq nø tìrìn kèní gvzà màsar, tvné vní yá rvdùng dv́ngte wa íe.

⁹ Vdàm sv̀ng àngmaq tuq lú:ngì kvt, weyv́ngø zidòng nv̀ng shø̀l svmi taq nga dvgángshaq vl da we àngmaqí yà:ngòe.

¹⁰ Yesuí àngmaq sv̀ng, “Akvt ègøp bǿshà ngarì taqkèní tiqgola èlùvtnø̀ng,” a:lòe.

¹¹ Wekvt Simon Piter nø kùngshí sv̀ng zv́ngshiá:mì nø, ngakàng 153 go dv̀n vdeq we shǿmgún lòng vdàm kaq shv̀la:tnà. Nga wedv́ngte luq nìgø, shǿmgún dùng nø mvdíng.

¹² Yesuí, “Sháng v́mpà èv́m ránø̀ng,” a:lòe. Coqcv́nrìí Àng nø Kàngpè í we sháò rvtnø̀, tiqgǿí gø, “Nà nø kagǿ èíe?” wa røt mvka:mò.

¹³ Yesu dìa:tnì nø zidòng lùò dá:ngí àngmaq sv̀ng zíòe. Wedø tiqdvchá, nga gø zíòe.

¹⁴ Yalòng nø Yesu shìyv́ng kèní zun lú:ngì mèpvng, coqcv́nrì sv̀ng Àng dvtanshì we vshø̀m kvt wakvt íe.

Yesu nv̀ng Piter

¹⁵ Àngmaq sháng v́mpà v́m dá:ngí, Yesuí Simon Piter sv̀ng, “Yohan àngcè Simoná, àngmaqí èshòng mvdv̀m, nàí Ngà sv̀ng té èshòngà má?” wa rø:tnòe. Piterí, “Íe, Kàngpèá, ngàí shòng we Nàí èshángàe,” wa vtá:nòe. Yesuí, “Ngà vyv̀ngcèrì shèv́mangà,” a:lòe.

¹⁶ Vrá tiqkvt Yesuí, “Yohan àngcè Simoná, Ngà sv̀ng èshòngà má?” wa rø:tnòe. Piterí, “Íe, Kàngpèá, ngàí shòng we Nàí èshángàe,” wa vtá:nòe. Yesuí, “Ngà vyv̀ngrì èrokngangà,” a:lòe.

¹⁷ Vshø̀m kvt wakvt Yesuí, “Yohan àngcè Simoná, Ngà sv̀ng èshòngà má?” wa rø:tnòe. Yesuí vshø̀m kvt wakvt, “Ngà sv̀ng nàí èshòngà má?” wa rø:tnò rvtnø̀ Piter nøt dvshà lú:ngì. Piterí, “Kàngpèá, í dv́ngte shvngbe Nàí èsháòe. Ngàí Nà sv̀ng shòng we Nàí èshángàe,” wa vtá:nòe. Yesuí, “Ngà vyv̀ngrì shèv́mangà.

¹⁸ Ngàí nà sv̀ng kàdøng vlvtnø̀ng, nà gùchàngré èí dvgvp nø, nà nø nà wa juqnv́m ènv́mshì nø̀, nà dí mèyǿ yv́ng dí èlú:nòe. Íwe nà cèrǿng ra dvgvp, nà wur nàgàng nø̀, vsà:ngí nà sv̀ng juqnv́m ènv́mavt nø, nà dí mèmèyǿ yv́ngsv̀ng èshøl bøe,” a:lòe.

¹⁹ (Yesuí yadø shø̀:nò we nø, Gvray ngø̀rdvgùng shvring lúnlv́m dvpvt Piter kadø shì long we dvta:nò kà íe). Yakà shø̀:nò dá:ngí Yesuí àng sv̀ng, “Ngà mèpvng ècv̀n ra,” a:lòe.

²⁰ Piter lv́mposhì nìnø, Yesu shóngshì we coqcv́npèí cv̀na:tnà we sv̀ng yvng bǿà. (Coqcv́n wepè nø cáyaq dørø̀m vmpà vm dvga:pmí Yesu pøtpúm taq námshì sórí, “Kàngpèá, Nà sv̀ng nvmv́mlv́m pè nø kagǿ íe má?” wa rø:tnò pè íe).

²¹ Piterí àng sv̀ng yv̀ng bǿà nìnø, Yesu kaq, “Kàngpèá, yapè nà, kadø í long má?” wa rø:tnòe.

²² Yesuí, “Ngà døng dak ni høq àng sv̀ng la v́l dvzv́r mvyǿngnø̀ng gø, nà pà shø̀nlv́m màvl. Nà mv̀ng nø Ngà mèpvng ècv̀n ra,” a:lòe.

²³ Wervt coqcv́n wepè nø mvshì long, wa kà vnvm vchvngrì dvhø̀ø shv̀ngá:mì. Íwe Yesuí àng nø mvshì long màa:lò. “Ngà døng dak ni høq àng sv̀ng la v́l dvzv́r mvyǿngnø̀ng gø, nà pà shø̀nlv́m màvl,” mv̀ng a:lò we íe.

²⁴ Yadv́ng pv̀n shvkse wáshì nø̀ vruò pè nø, coqcv́n yapè ni íe. Àng shvksekà nø dìng we sv̀ng nøngmaqí sháìe.

²⁵ Yesuí wà yà:ngà we dvgá gø mvme pv̀n vle. Íwe werì mvti mvni la nàruò nìnø, rvgaq yalòng taq gø nàruò we kàru bokrì damvcv́ngni, wvng dvdvmòe.