Yohan 2 - Gvray Shànshér Mòngkà Kagvp Àngshv́r

Kana rvwá zvmì shvzøng bóy

¹ Vshø̀m ni wa ni taq, Galili móng Kana rvwáø zvmì shvzøng bóy tiqlòng vle. Yesu àngmè gø weyv́ngø vbáe.

² Zvmì shvzøng bóy yv́ngsv̀ng Yesu nv̀ng Àng coqcv́nrì gø vgoshaq íe.

³ Bìmtì dvbév́m bǿà dvgvp, Yesu àngmèí Àng sv̀ng, “Àngmaq bìmtì béaá:mà,” a:lòe.

⁴ Yesuí àng sv̀ng, “Svmarémèá, nàí shǿn mvrà. Ngà rvtø̀ shini mvhøqò,” a:lòe.

⁵ Àngmèí nø dvzømshúrì sv̀ng, “À:ngí nàmaq kaq kadø èvlvtnø̀ng nìnø wedø èwànø̀ng,” a:lòe.

⁶ Yuda vsv̀ngrì wur shǿlshìlv́m vtóng taq lá:ngò we lóng chúng vchuq chv̀ng weyv́ngø vle. Tiqchv̀ng taq nø vnícé kèní vshø̀mcé galan cv́nge.

⁷ Yesuí dvzømshúrì sv̀ng, “Chúng yarì taq tì dv̀n èzv́ngnø̀ng,” a:lòe. Wekvt àngmaqí chúngrì taq mvka vrá dø tì dv̀n zv́ng bǿà.

⁸ Vrá, À:ngí àngmaq sv̀ng, “Akvt nø cvmaq èdonø̀ng nø̀, bóy vgopè sv̀ng èlv́nga bǿnø̀ng,” a:lòe. Wekvt àngmaqí lv́nga bǿà.

⁹ Tì kèní shvlè bǿà we bìmtì sv̀ng bóy vgopèí tin bǿà. Tì kvp dá:rà we dvzømshúrìí bìmtì nø kayv́ng kèní í we sháò nìgø, bóy vgopèí nø mvsháò. Wervt à:ngí lvngàshv́rpè sv̀ng goò nø̀,

¹⁰ “Kagǿí gø bìmtì shvlá vtvng lòng vzv̀ng shvaqòe. Aq vrvmvm dvgvp wa dvdumo gvm lòng tù:nòe. Nàí nø bìmtì shvlá vtvng lòng akvt høq legv̀l dárà,” a:lòe.

¹¹ Yesuí nv̀mlat vtiqlv́m mvshv́lpvrá wàò we yalòng nø Galili móng Kana rvwá taq íe. Yadø Àng ngø̀rdvgùng dvta:nò yv́ngkèní, Àng coqcv́nrì nø Àng sv̀ng kv́m bǿì.

¹² Wemèpvng Yesu àngmè ó àngnvmpèla, Àng coqcv́nrì nv̀ng tiqdø Kapernum mvrìng sv̀ng yøtshìá:mì nø̀, weyv́ngø tiqnila v̀lá:mì.

Noqngø̀m Tø̀ngnø kèní wùlaq warì lù:ngò we

¹³ Wekvt Yuda vsv̀ngrìò Shvlé Bóy tuq yùl ráì nø̀, Yesu nø Yerusalem sv̀ng ngangá:mì.

¹⁴ Noqngø̀m Tø̀ngnø wáng vdòng taq, nungwà, vyv̀ng nv̀ng kaø nvmke vsv̀ng gø, gv̀msùng cheshì rì rung da we sv̀ng gø yv̀ng bǿà.

¹⁵ À:ngí bv̀nrì mvship tiqlòng wàò dá:ngí, àngmaq shvngbe sv̀ng gø, vyv̀ngrì nv̀ng nungwàrì sv̀ng gø, Noqngø̀m Tø̀ngnø wáng kèní lù:ngòe. Gv̀msùng cheshì rìò gv̀msùngrì gø bv̀ng shinaò nø̀, àngmaq shvbóyrì gø ngaqa bǿà.

¹⁶ Kaø nvmke rì sv̀ng gø À:ngí, “Yayv́ng kèní yarì èlvngshì bǿnø̀ng. Ngà Vpè chø̀m nø nàmaqò wulaq washìrà mø̀í!” a:lòe.

¹⁷ Wekvt Àng coqcv́nrìí, “Nà chø̀m dvpvt nøtlø̀m lòng nø Ngà taq svmi dø vcore,” wa vru yà:ngà kà sv̀ng dvdvm rǿna:tnà.

¹⁸ Yuda vsv̀ng shølshúrìí Àng sv̀ng, “Yadv́ng pv̀n Nàí wàlv́m vmíng èvl we nøngmaqí shálv́m dvpvt mvshv́lpvrá kapà dètanshàni má?” a:lòe.

¹⁹ Yesuí àngmaq sv̀ng, “Shànshér Tø̀ngnø yachø̀m ècatnø̀ng. Vshø̀m ni vdòng Ngàí rá shvriplv́m íe,” a:lòe.

²⁰ Vrá, Yuda vsv̀ngrìí, “Shànshér Tø̀ngnø yachø̀m nø vbìcé chuq nǿng wà yà:ngà we íe. Nàí nø vshø̀m ni cèí shèripmò niá?” a:lòe.

²¹ Íwe À:ngí shø̀:nò we Shànshér Tø̀ngnø nø Àng vdè góng sv̀ng tvnushì we íe.

²² Gvrayí Àng sv̀ng shì yv́ngkèní dvzun lú:ngà mèpvng, À:ngí shø̀:nò we yakà sv̀ng Àng coqcv́nrìí dvdvm rǿ:nò nø̀, Shànshér Kàru sv̀ng gø, Yesuí shø̀:nò we kà sv̀ng gø àngmaq kv́me.

²³ Shvlé Bóy nila taq Yerusalem yv́ng Àng vl dvgvp, À:ngí wàò we shálv́m mvshv́lpvrárì yà:ngò yv́ngkèní vsv̀ng mvme nø Àng bø̀ng sv̀ng kv́m ráì.

²⁴ Ínìgø Yesuí nø vsv̀ng shvngbeò nøt sv̀ng sháò rvtnø̀, àngmaq sv̀ng Àng màlǿmshì.

²⁵ Vsv̀ng nøt vdòngø kapà vl we À:ngí dǿ:mò rvtnø̀, vsv̀ng kagǿ dang kagǿí shvkse wàò we gø Àng zǿm mvdv̀ng.