Yohan 13 - Gvray Shànshér Mòngkà Kagvp Àngshv́r

Yesuí Àng coqcv́nrì hí zá:lò we

¹ Yesu nø rvgaq yalòng kèní búng nø Àngpè yv́ng lolv́m rvtø̀ tuq ráì we sv̀ng Shvlé Bóy mvpà:ngò vzv̀ng kaq sháshìe. Rvgaq tø̀mø vl we Àng coqcv́nrì kaq À:ngí shù:ngò nø̀ lv̀ngdø̀m høq àngmaq sv̀ng shù:ngòe.

² Wedvgvp àngmaq nø dørø̀m v́mpà v́mlv́m runge. Sataní Simon Iskariot àngcè Yuda vdòng taq Yesu sv̀ng nvmv́mlv́m nøt vzv́ngashaq íe.

³ Yesu nø Vpèí í dv́ngte shvngbe Àng wur taq vzíshaq í we nv̀ng Àng nø Gvray yv́ngkèní dì daqì nø Gvray yv́ng sv̀ng vtv́nglvm í we sháshìe.

⁴ Wervt Àng nø dørø̀m v́mpà vm yv́ngkèní búng nø, mvdv̀m bèlaq chutshì dá:ngí paqzit tiqdù:ngí juq dvchvtshìe.

⁵ À:ngí kung tiqgø̀m taq tì zá:ngò dá:ngí Àng coqcv́nrì hí zv́laò nø̀ Àng dvchvtshì we paqzit dù:ngí shøqaòe.

⁶ Simon Piter yv́ng høqa:tnà kvt à:ngí, “Kàngpèá, Nàí ngà hí sv̀ng zv́llv́m èwa má?” a:lòe.

⁷ Yesuí, “Ngàí kapà wv̀ngò we akvt nàí mèsíngò. Íwe tv́n mèpvng èsíng lú:ngòe,” wa vtá:nòe.

⁸ Piterí Àng sv̀ng, “Kadø ínìgø ngà hí nø Nàí zv́l màdvzv́rshø̀ng,” a:lòe. Yesuí, “Ngàí nà hí mvzv́lnø̀ngnø, nà nø Ngà nv̀ng vzø̀mlv́m màvl,” wa vtá:nòe.

⁹ Simon Piterí, “Kàngpèá, íni ngà hí wa mø̀í, ngà wur gø, vgo gø èzv́là,” a:lòe.

¹⁰ Yesuí àng sv̀ng, “Tì vzv́lshìshaq tiqgǿ nø góngkøp shèrvm rvt, hí wa zv́lshì rae. Nàmaq dvhø̀ kèní tiqgǿ wa mø̀íni, shvngbe nø èshèrnø̀nge,” a:lòe.

¹¹ Kadø íe wani Àng kaq nvmv́mlv́m pè sv̀ng À:ngí sháòe. Wervt À:ngí, “Nàmaq dvhø̀ kèní tiqgǿ wa mø̀íni shvngbe nø èshèrnø̀nge,” a:lò we íe.

¹² Yesuí àngmaq hí zv́la bǿà dá:ngí mvdv̀m belaq gwashì nø̀ vrá námrung sórí, “Ngàí nàmaq sv̀ng wáa bǿshà lòng èsíngnø̀ng má?

¹³ Nàmaqí Ngà sv̀ng, ‘Svrapè’ gø ‘Kàngpè’ gø èvlshàe. Nàmaqí wedø èvlshà lòng nø vdue. Kadø íe wani Ngà nø wedøni ǿngàe.

¹⁴ Nàmaq Nvkàngpè nv̀ng Svrapè ǿngà we Ngàí dv́ng nàmaq hí zv́laì nìnø, nàmaq gø tasv̀ng hí vzv́lké ràe.

¹⁵ Ngàí nàmaq sv̀ng wáa bǿshà dø nàmaqí gø wàlv́m shvbóngshìrà Ngàí wv̀ng bǿngà we íe.

¹⁶ Ngàí kàdøng vla:tnìni, vshuq nø àngkàng mvdv̀m ring we mø̀í. Dvzv́rshú gø àng kaq dvzá:rò pè mvdv̀m ring we mø̀í.

¹⁷ Yadv́ng pv̀n sv̀ng nàmaqí èshánø̀ng nø èwànø̀ng nìnø, ìshøt ìgv̀n èlún lóngnø̀nge.

¹⁸ Nàmaq shvngbe sv̀ng shø̀n we mø̀í. Ngà rvcvngshìshaq rì sv̀ng Ngàí shángòe. Íwe Shànshér Kàru taq, ‘Ngà v́mpà vmpè àng híí Ngà sv̀ng pèlonge,’ wa ciq dvhømlv́m rvt íe.

¹⁹ Wedø í long dvgvp, Ngà nø ‘NGÀ ǾNGÀE’ wa pè ǿngà we sv̀ng nàmaq kv́mlv́m dvpvt, shini mvbø̀n ra ke nàmaq sv̀ng Ngàí akvt dvtáì we íe.

²⁰ Ngàí kàdøng vla:tnìni, Ngàí dvzv́rò gǿ sv̀ng vtoò gǿí nø Ngà kaq nàtong we íe. Ngà kaq nàtong gǿí nø Ngà sv̀ng dèzv́r dakngà pè kaq gø vtoò we íe,” a:lòe.

Àng kaq nvmv́mlv́m pè sv̀ng tvnuò we

²¹ Yadv́ng pv̀n shø̀n bǿà dá:ngí, Yesu nø vtvngshaq nøt dvshà lú:ngì nø, “Ngàí kàdøng vla:tnìni, nàmaq taqkèní tiqgǿí Ngà sv̀ng ènvmvm bønge,” wa dèdè vchàngòe.

²² Kagǿ sv̀ng Àng wa we coqcv́nrìí mvsháò rvtnø̀ dvtiqshì sórí dàjaq kee.

²³ Yesu shóngshì we coqcv́npè nø, Àng shvnvngø námrunge.

²⁴ Wervt Simon Piter nø àng sv̀ng ne vlapshì sórí Yesuí shø̀:nò pè nø kagǿ í we sv̀ng røt dvzá:ròe.

²⁵ Coqcv́n wepè nø Yesu yv́ng tvp vnvpshì nø̀, “Kàngpèá, kagǿ íe?” wa rø:tnòe.

²⁶ Yesuí, “Ngàí zidòng yamǿr kung taq zønò nø̀ zǿngò gǿ íe,” wa vtá:nòe. Wekvt À:ngí zidòng tiqmǿr zøn dv̀ng Simon Iskariot àngcè Yuda sv̀ng zíòe.

²⁷ Zidòng wemǿr Yudaí v́m bǿà chàng, Satan nø àng vdòng gòngá:mì. Wervtnø̀ Yesuí àng sv̀ng, “Nàí wàlv́m èdá:nò lòng bò èwàò,” a:lòe.

²⁸ Yesuí pàwá àng kaq yadø a:lò we sv̀ng v́m shvbóy taq námrung rì tiqgǿí gø mvsháò.

²⁹ Yuda nø gv̀msùng shøpshú í rvtnø̀, Yesuí àng sv̀ng bóy dvpvt rà pv̀nrì wvnlv́m, mø̀íni dvshàrì kaq tiqpv̀npv̀n zílv́m, a:lò pà íe, wa tiqmaqí lá:nòe.

³⁰ Yuda nø zidòng wemǿr v́m dá:ngí chàng búngá:mì. Wervtø̀ nø yaqdø̀ng íá:mì.

Dvkv́mkà angshv́r zíò we

³¹ Yuda búngá:mì kvt Yesuí, “Vsv̀ng Àngcèpè ngø̀rdvgùng nø akvt kèní dvtan daqòe. Gvray ngø̀rdvgùng gø Àng taqkèní dvtan daqòe.

³² Gvray ngø̀rdvgùng nø Vsv̀ng Àngcèpè taqkèní dvtan daqò we í kvt kèní nø, Gvrayí ni Vsv̀ng Àngcèpè ngø̀rdvgùng gø dvtan daqò nø, akvtni dvtanlv́m dá:nòe.

³³ Ngàcèrìé, Ngà nø nàmaq nv̀ng tiqlvngcè wa vle. Nàmaqí Ngà sv̀ng èlá lóngshàe. ‘Ngà døngvm yv́ngsv̀ng nàmaqí di mèlúnnø̀ng,’ wvng Ngàí Yuda vsv̀ngrì kaq àvlshaq dø tiqdvchá, nàmaq sv̀ng gø akvt wedøni a:lìe.

³⁴ Tiqgǿ nø tiqgǿ nàshòngkénø̀ng, wvng dvkv́mkà àngshv́r tiqlòng Ngàí nàmaq sv̀ng zí ráìe. Ngàí nàmaq sv̀ng shù:ngì dø, nàmaq gø tiqgǿ nø tiqgǿ nàshòngkénø̀ng.

³⁵ Nàmaq tiqgǿ nø tiqgǿ nàshòngkénø̀ng nìnø, nàmaq nø Ngà coqcv́n èínø̀ng we vsv̀ng shvngbeí shá bǿòe,” a:lòe.

Piterí ma lú:ngò we

³⁶ Simon Piterí Àng sv̀ng, “Kàngpèá, Nà nø kayv́ng sv̀ng dìlv́m èwa má?” a:lòe. Yesuí, “Ngà døngvm yv́ngsv̀ng akvt nàí cv́n mèlú:nò. Íwe mèpvng nø nàí cv́n rà longe,” wa vtá:noe.

³⁷ Piterí, “Kàngpèá, kadø í nø akvt Nà mèpvng ngàí cv́n mvlúnò má? Nà dvpvt gø̀nshaq dvbǿmshìlv́m høq gø ngà kvmshø̀nge,” a:lòe.

³⁸ Yesuí, “Ngà dvpvt nà gø̀nshaq dvbǿm kvmshø̀nge nàyà lá? Ngàí nà sv̀ng kàdøng vlvtnø̀ng, dv̀nggú shini mvgì dvgvp, nàí Ngà sv̀ng vshø̀m kvt èmang lóngàe,” wa vtá:nòe.