Yohan 12 - Gvray Shànshér Mòngkà Kagvp Àngshv́r

Yesu sv̀ng ngórdorcìí ma:tnò we

¹ Yesu nø Shvlé Bóy mvhøqò vzv̀ng vchuq ni taq À:ngí shì yv́ngkèní dvzuna:pmà pè Lazaru vl we Betani mvrìng sv̀ng tuq ráì.

² Àngmaqí dørø̀m v́mpà Àng dvpvt dvgǿaò nø̀, Martaí dvzø:mòe. Àng nv̀ng tiqdø v́mpà vm rì taq Lazaru gø vbáe.

³ Marií nø, gvzà vpǿ we nardú ngórdorcì mvdø̀ng tiqdúng lùò nø̀, Yesu hí sv̀ng vdø:rò dá:ngí, àng vnií shøqaòe. Wekvt chø̀m køp taq welòng ngórdorcì dorá:mì.

⁴ Íwe mèpvng Àng sv̀ng nvmvmlv́m pè, Àng coqcv́n Iskariot Yudaí,

⁵ “Ngórdorcì yalòng nø dinari vshø̀myá taq nvm dv̀ng dvshà vsv̀ng kaq pàwá mvzíò má?” wae.

⁶ Àng yadø shø̀n we nø dvshà vsv̀ng kaq nøtnaò rvt mø̀í, vkǿ í rvt shø̀n we íe. Àng nø gv̀msùng yǿng rvdashú í nø̀ weyv́ng kèní kǿ mun pè íe.

⁷ Wervtnø̀ Yesuí, “Ngà sv̀ng kǿmlv́m ni dvpvt à:ngí ngórdorcì yalòng shø:pmò we íe, vwa laq wàò.

⁸ Dvshà vsv̀ngrì nø nàmaq nv̀ng kadvgvp gø vle. Ngà mv̀ng nø nàmaq nv̀ng nv̀nnv̀n v̀llv́m mvǿngà,” a:lòe.

⁹ Betani yv́ng Yesu vl we sv̀ng Yuda vsv̀ng loksu:kngí shá bǿà. Wekvt àngmaq nø Yesu sv̀ng wa mø̀í dø, À:ngí shì yv́ngkèní dvzuna:pmà pè Lazaru sv̀ng gø yv́ng lúnlv́m dvpvt di ráì.

¹⁰ Wervt shvrúngshú vjìrì nø Lazaru sv̀ng gø shvtlv́m vrashìe.

¹¹ Kadø íe wani Lazaru rvtnø̀ Yuda vsv̀ngrì mvme nø àngmaq kèní rv́lshì nø̀ Yesu sv̀ng kv́m bǿì rvt íe.

Dvgùng vl dø Yerusalem sv̀ng gòng we

¹² Mèpvng ni taq, Shvlé Bóy yv́ng kø̀m ráì we vsv̀ng loksokrìí, Yesu nø Yerusalem sv̀ng di rae wa kà tá bǿà.

¹³ Wekvt àngmaq nø zǿr dvgv̀ngrì lá:ngò sórí, Àng sv̀ng vtolv́m búngá:mì nø̀, “Hosana! Kàngpè bø̀ng kèní di daqì pè, Israel Koqkv́mpè nø ìshøt vle!” wa vkiqe.

^14-15 Kàru taq, “Zion àngcèmèá, mèsèreni. Èyà:ngò, nà Koqkv́mpè nø lòzè ngv́rv̀m tiqgo taq zúnshì nø̀ di rae,” wa vrushaq dø tiqdvchá, Yesu nø lòzè tiqgo lá lún bǿà nø zúnshìe.

¹⁶ Nv̀mlat dvgvp Àng coqcv́nrìí nø yadv́ng pv̀n sv̀ng mvrà:lò. Íwe Yesu Àng ngø̀rdvgùng shvring daqà mèpvng, yadv́ng pv̀n nø Àng sv̀ng tvnuò nø̀ vru yà:ngà we nv̀ng Yuda vsv̀ngrìí Àng sv̀ng wedø vto yà:ngà we sv̀ng coqcv́nrìí dvdvm rǿn lú:ngà.

¹⁷ Dvgv̀m vdòng kǿma:pmà we Lazaru sv̀ng Yesuí goò nø̀, shìyv́ng kèní dvzu:nò dvgvp Àng nv̀ng tiqdø v̀la:pmì we vsv̀ng loksokrìí, bø̀na:pmì dang dvsha:ngòe.

¹⁸ Vrá, vsv̀ng loksokrìí Àng sv̀ng vtoò we nø, À:ngí shálv́m mvshv́lpvrá yalòng wàa:pmà we sv̀ng táò rvt íe.

¹⁹ Wervt Parisirì nø tasv̀ng vrùng nø̀, “Nøngmaqí kadø gø wá mvdv́ng bǿshà. Èyv̀ngnø̀ng, móng døngtá:ngí Àng mèpvng cv̀n bǿà,” wae.

Helenirìí Yesu sv̀ng láò we

²⁰ Bóy yv́ng noqngø̀mlv́m ngang lú:ngì rì taq, Heleni vsv̀ng tiqmaq vbáe.

²¹ Àngmaq nø Galili móng Betsedapè Pilip yv́ng dì ráì nø̀, “Vshaqpèá, Yesu sv̀ng nøngmaq yv́ng mvyǿìe,” a:lòe.

²² Wekvt Pilip dìá:mì nø̀ Anderu sv̀ng dvtáòe. Vrá, Anderu nv̀ng Pilip dì ráì weí Yesu sv̀ng dvtáòe.

²³ Yesuí, “Vsv̀ng Àngcèpè ngø̀rdvgùng shvringlv́m rvtø̀ tuq ráì.

²⁴ Ngàí kàdøng vla:tnìni, zongshí tiqchv̀ng nø vba rv́m vløpmvm dá:ngí mvshì nìnø, wechv̀ng wa v́ldv̀ng wae. Ínìgø shìvm nìnø, àngshí mvme zí longe.

²⁵ Vdè gø̀nshaq sv̀ng shóngshì gǿ nø, àng gø̀nshaq vmvngvme. Rvgaq yalòng taq vdè gø̀nshaq sv̀ng shvngoshì gǿí nø, dvciqlvpat gø̀nshaq shøpshì lú:nòe.

²⁶ Ngà sv̀ng dvzøm mvyǿ gǿ nø Ngà mèpvng cv́n ràe. Ngà dvzømshú nø Ngà vl yv́ngø v́l lúnlv́m íe. Ngà sv̀ng dèzøm gǿ sv̀ng nø, Vpèí vpǿ shvring lú:ngòe.

²⁷ Akvt Ngà nøt dvshànge. Ngà kadø shø̀nlv́m? ‘Vpèá, rvtø̀ yalòng kèní Ngà sv̀ng shèlut dakngà,’ wvng nø shø̀nlv́m í má? Íwe rvtø̀ yalòng rvtnø̀ ni Ngà nø dø̀ng dakngà we íe.

²⁸ Vpèá, Nà ngø̀rdvgùng shèring daqò,” wa vtá:nòe. Wekvt muqlàng kèní kà shø̀n daqì nø, “Ngàí ngà ngø̀rdvgùng shvringshaq íe, tv́n gø shvringlv́m íe,” wae.

²⁹ Weyv́ng rip we vsv̀ng loksokrìí welòng tá bǿà kvt, “Muq gø̀me,” wae. Dvgámaq nø, “Muqlàng dvzv́r tiqgǿ Àng sv̀ng kà tv́ngshì daqì,” wae.

³⁰ Yesuí, “Kàshaq yalòng nø Ngà dvpvt mø̀í, nàmaq dvpvt íe.

³¹ Rvgaq yalòng sv̀ng kàngélv́m nø akvt íá:mì. Rvgaq yalòng øpshú dùpè sv̀ng gø akvt kèní lùnglv́m íá:mì.

³² Ngà sv̀ng rvgaq kèní èhàng bøng kvt, vsv̀ng shvngbe kaq Ngà yv́ngsv̀ng Ngàí cøplv́m íe,” a:lòe.

³³ À:ngí yadø shø̀:nò kà nø, Àng kadø shìlv́m í we sv̀ng tvnuò nø̀ shø̀:nò we íe.

³⁴ Vsv̀ng loksokrìí Àng sv̀ng, “‘Kristu nø dvciqlvpat cúnshì longe,’ wa nø, Dvrá kàru taqkèní nøngmaqí vtáshaq íe. Íwe ‘Vsv̀ng Àngcèpè sv̀ng háng ràe,’ nø kadø èwa we íe? Vsv̀ng Àngcè wepè nø kagǿ íe lè?” a:lòe.

³⁵ Yesuí àngmaq sv̀ng, “Gálòng nø nàmaq nv̀ng tiqlvngcè wa vle. Dølù:ngì nàmaq sv̀ng mèzíkévtnø̀ng dvgvp, gálòng shini vl ke, èdìnø̀ng. Dø vdòngø di gǿ nø àng kakaq sv̀ng di we mvsháshì.

³⁶ Nàmaq nø gálòng àngcèrì ílv́m dvpvt gálòng shini vl ke gálòng sv̀ng èkv́mnø̀ng,” a:lòe. Kà yarì shø̀:nò dá:ngí, Yesu búng nø àngmaq yv́ngkèní máshìá:mì.

³⁷ Yesuí àngmaq mv́rdv̀ngø shálv́m mvshv́lpvrá wedv́ngte wà bǿà nìgø àngmaq nø Àng sv̀ng mvkv́m.

³⁸ Yalòng nø kàdvtutshú Esayaí, “Kàngpèá, nøngmaqí dvsha:ngì kà sv̀ng kagǿ kv́m bǿì má? Kàngpè jòr we wur gø kagǿ sv̀ng dvtanshaq íe má?” wa shø̀n yà:ngà kà dvhø̀mlv́m dvpvt íe.

³⁹ Yalòng rvtnø̀ àngmaq mvkv́m we íe. Esayaí vrá,

⁴⁰ “Àngmaq nø neí yà:ngò nø̀ nøt taq cíng lú:ngò nø̀, vwv́ngshì ra kvt àngmaq sv̀ng dvbana màdulv́m Gvrayí àngmaq nezøq dvzá:rò nø̀ àngmaq nøt zaq dvzá:rò we íe,” wa shø̀n yà:ngà.

⁴¹ Esayaí nø Yesu ngø̀rdvgùng yv̀ng yà:ngà rvt nø, Àng dang yarì shø̀n yà:ngà we íe.

⁴² Yuda vsv̀ng shølshúrì taqkèní gø Àng sv̀ng kv́m we mvme vle. Íwe Parisirìí àngmaq sv̀ng júrøt chø̀m kèní lùng ra we sv̀ng svre rvt màchángshì.

⁴³ Kadø íe wani àngmaq nø, Gvrayí shvring ra lòng mvdv̀m, vsà:ngí shvring ra lòng sv̀ng té shóngshìe.

⁴⁴ Wervt Yesu yadø vkiqe. “Ngà kaq kv́m gǿ nø, Ngà kaq wa kv́m we mø̀í, Ngà sv̀ng dèzv́r dakngà pè sv̀ng kv́m we íe.

⁴⁵ Ngà sv̀ng èyv̀ng gǿí gø Ngà sv̀ng dèzv́r dakngà pè sv̀ng yà:ngò we íe.

⁴⁶ Ngà kaq kv́m we kagǿ gø dø vdòngø màv̀llv́m dvpvt, Ngà nø rvgaq tø̀m sv̀ng dø̀ng dakngà we gálòng ǿngàe.

⁴⁷ Ngà kàrì táò dá:ngí cv́n mvdøng we kagǿ sv̀ng gø Ngàí kà mvngéngò. Kadø íe wani Ngà nø rvgaq sv̀ng kàngélv́m dø̀ng dakngà we mø̀í. Rvgaq sv̀ng chv́nglv́m dvpvt mv̀ng dø̀ng dakngà.

⁴⁸ Ngà sv̀ng èngál nø Ngà kàrì sv̀ng màtoshì gǿ sv̀ng kàngéshú tiqgǿ vle. Ngàí shø̀nò kàrìí ni, lv̀ngdø̀m ni taq àng sv̀ng kàngé daqòe.

⁴⁹ Kadø íe wani Ngà nø Ngà nø:tní shø̀n we mø̀í. Ngà sv̀ng dèzv́r dakngà pè Vpèí dèkv́m dø Ngàí shø̀:nò nø̀ shvngøtnò we íe.

⁵⁰ Àng dvkv́mkà nø dvciqlvpat gø̀nshaq yv́ngsv̀ng dvtuq we Ngàí shángòe. Wervtnø̀ Vpèí Ngà sv̀ng shǿn dèzv́r dø wa shø̀nò we íe.”