Yohan 11 - Gvray Shànshér Mòngkà Kagvp Àngshv́r

Lazaru dvzu:nò we

¹ Betani rvwá taq Mari nv̀ng àngnvmmè Marta vle. Wervwá taq Lazaru tǿò we tiqpè zae.

² Mari nø Kàngpè sv̀ng ngórdorcìí vdø:rò nø̀, Àng hí sv̀ng àng vgonií shøqvpmà mè íe. Za pè Lazaru nø àngnvmpè íe.

³ Wervtnø̀ àngnvmmèníí Yesu yv́ng vsv̀ng dvzá:rò nø̀, “Kàngpèá, Nà èshóngshì pè Lazaru nø zae,” a:lòe.

⁴ Yesuí tá bǿà kvt, “Záyv̀ng yalòng nø shìlv́m høq nø mø̀í. Gvray ngø̀rdvgùng nv̀ng Gvray Àngcèpè ngø̀rdvgùng nø yalòng taqkèní shvringlv́m dvpvt lè íe,” a:lòe.

⁵ Yesu nø Marta nv̀ng àngnvmmè sv̀ng gø, Lazaru sv̀ng gø shóngshìe.

⁶ Íwe Lazaru za we tá bǿà nìgø, Yesu nø Àng vl yv́ngø vní ni v́ldv̀ng wae.

⁷ Wemèpvng À:ngí coqcv́nrì sv̀ng, “Yuda móng sv̀ng vrá tiqkvt dìì,” a:lòe.

⁸ Coqcv́nrìí, “Rabiá, cáyaq ni Yuda vsv̀ngrìí Nà sv̀ng lú:ngì wvplv́m èwàa:pmì we, vrá tiqkvt weyv́ng sv̀ng dìlv́m èwa má?” a:lòe.

⁹ Yesuí, “Tiqni taq tiqcé vní nari vl we mø̀í má? Vsv̀ng nø vyá:ngí tvrà di nìnø, nv̀m gálù:ngí yv́ngshì rvt vtøplv́m màvl.

¹⁰ Ínìgø yaqdø̀:ngí tvrà di gǿ nø, àng taq gálòng màvl rvt vtøpmvme,” wa vtá:nòe.

¹¹ Yadv́ng pv̀n shø̀:nò dá:ngí, vrá À:ngí, “Nøngmaq rv̀mnvngpè Lazaru nø yøpme. Ngà nø àng sv̀ng dvshatlv́m dønge,” a:lòe.

¹² Coqcv́nrìí, “Kàngpèá, àng nø yøp we í nìnø tv́n àngwa ban longe,” a:lòe.

¹³ Yesuí nø Lazaru shì lòng sv̀ng shø̀:nòe. Íwe, àngmaqí nø àngwà dø yøp lòng sv̀ng wae, lá:nòe.

¹⁴ Wervtnø̀ Yesuí àngmaq sv̀ng chaqdvp dvtáò nø̀, “Lazaru nø shìa:pmì.

¹⁵ Weyv́ngø Ngà màvlvp rvt nàmaq dvpvt Ngà dvbònge. Pàwá wani nàmaq kv́mlv́m dvpvt íe. Có, àng yv́ngsv̀ng dìì,” a:lòe.

¹⁶ Wekvt Didimu tǿò pè Tomaí rv̀mnvng coqcv́nrì sv̀ng, “Có, Svrapè nv̀ng tiqdø shí nv̀ngsv̀ng nøngmaq gø dìì,” a:lòe.

¹⁷ Yesu tuq á:mì dvgvp, Lazaru sv̀ng lóngdùng dvgv̀mø kǿ:mò we nø vbì ni ía:pmì we À:ngí yv̀ng bǿà.

¹⁸ Betani rvwá nø Yerusalem kèní vní ming dv́ngte wa vrúme.

¹⁹ Yuda vsv̀ng mvme nø Marta nv̀ng Mari yv́ngsv̀ng àngnvmpè rvt nøt shvlø̀mlv́m dì dá:rì.

²⁰ Yesu dì ráì we Martaí tá bǿà kvt, àng búngá:mì nø̀ Yesu sv̀ng vtoá:mà. Mari nø chø̀m yv́ng vl ráì.

²¹ Wekvt Martaí, “Kàngpèá, Nà yayv́ng èvlvp pà í nìnø, vnvmpè nø mvshì ni we íe.

²² Íwe Gvray kaq Nàí kapà èrø:tnò ninø, Gvrayí Nà sv̀ng akvtni èzi daq we ngàí shángòe,” a:lòe.

²³ Yesuí, “Nvnvmpè nø vrá zun longe,” a:lòe.

²⁴ Martaí, “Lv̀ngdø̀m àngni zun long we taq àng vrá zun long we ngàí shángòe,” a:lòe.

²⁵ Yesuí, “Zunlòng nv̀ng gø̀nshaq nø Ngà ǿngàe. Ngà kaq kv́m gǿ nø, shì nìgø cúnshì longe.

²⁶ Vrá, Ngà kaq kv́m yv́ngkèní Ngà vdòng taq cúnshì we kagǿ gø, kadvgvp gø mvshì long. Yalòng sv̀ng èkv́me má?” a:lòe.

²⁷ Martaí, “Íe, Kàngpèá, Nà nø rvgaq tø̀m sv̀ng èdi daqì pè, Gvray Àngcè Kristu èí we sv̀ng ngà kv́me,” a:lòe.

²⁸ Marta nø wedø shø̀n dá:ngí vtvngá:mì. Wekvt àngnvmmè Mari sv̀ng mvyø̀:ní goò nø̀, “Svrapè tuq ráì. Nà sv̀ng ègoe,” a:lòe.

²⁹ Marií yakà tá bǿà kvt tiqshaqí búng nø̀, Yesu yv́ngsv̀ng dìá:mì.

³⁰ Yesu nø mvrìng vdòng sv̀ng shini mvgòng dø, Martaí Àng sv̀ng vtoa:tnà yv́ngø v́ldv̀ng wae.

³¹ Mari sv̀ng nøt shvlø̀mlv́m rvt chø̀m yv́ng vl we Yuda vsv̀ngrìí, Mari nø tiqdvshaqí búng nø̀ dìá:mì we sv̀ng yv̀ng bǿà kvt, àng nø dvgv̀m yv́ngø ngǿlv́m die lá:nò nø̀, àng mèpvng cà:nòe.

³² Mari nø Yesu vl yv́ng tuq ráì nø̀, Àng sv̀ng yv̀ng bǿà kvt, Àng hí yv́ngø kǿng kupshì sórí, “Kàngpèá, Nà ya yv́ngø èvlvp pà í nìnø, vnvmpè nø mvshì ni we íe,” a:lòe.

³³ Mari gø, àng ó tiqdø dì ráì we Yuda vsv̀ngrì gø ngø we sv̀ng Yesuí yv̀ng bǿà kvt, Àng nøt vdòngø mvgø̀r nø̀ nøt dvshà sórí,

³⁴ “Nàmaqí àng sv̀ng kayv́ngø èkǿmvpshà má?” wa rø:tnòe. Àngmaqí, “Kàngpèá, có, yv̀ngá:mì,” a:lòe.

³⁵ Wekvt Yesu ngøe.

³⁶ Wervtnø̀ Yuda vsv̀ngrì nø, “Èyv̀ngnø̀ng, À:ngí Lazaru sv̀ng kadvngshìni shònga:tnà!” wae.

³⁷ Íwe tiqmaq nø, “Yapèí nø nemàn pè sv̀ng ne yvngshì dvzá:rò nìnø, Lazaru sv̀ng gø la mvshì dø wá ngu:tnò we mø̀í má?” wae.

³⁸ Yesu nø vrá tiqkvt nøt mvgø̀r sórí dvgv̀m sv̀ng tuq ráì. Dvgv̀m nø lóngdùng í nø̀, bv́ngkà chit sv̀ng lóngkø̀:mí bvt shøòe.

³⁹ Yesuí, “Lóngkø̀m gø̀m tèrinø̀ng,” a:lòe. Shìa:pmì pè àngnvmmè Martaí, “Kàngpèá, akvt nø da vngàvpni. Pàwá wani àng shìapmì we vbì ni í ráì,” a:lòe.

⁴⁰ Yesuí, “Nà èkv́m nìnø Gvray ngø̀rdvgùng èyv̀ng lú:ngòe, wvng vl dv́rà we mø̀í má?” a:lòe.

⁴¹ Wekvt àngmaqí lóngkø̀m gø̀m tvri bǿà. Yesu nø muqlàng kaq dvjaq sórí, “Vpèá, Ngà røtkà ètángang bǿngà rvt Nà sv̀ng oqà.

⁴² Kadvgvp gø Ngà røtkà sv̀ng Nàí ètángangà we shángòe. Íwe Nàí dèzv́r dakngà we sv̀ng gùrgùr rip we vsv̀ng loksokrì kv́mlv́m rvtnø̀ Ngà yadø shø̀n we íe,” wae.

⁴³ À:ngí kà yarì shø̀n bǿà dá:ngí, “Lazaruá, èléshì long!” wa nø̀ vkiqe.

⁴⁴ Wekvt shìapmì pè Lazaru nø, vnàngmøq laqtu:ní hí wur vdøpshaq, àng mv́rdaq gø sømba:ní vzvpshaq léshì lú:ngì. Yesuí, “Àng sv̀ng èpǿnanø̀ng nø shèlàngnø̀ng,” wa àngmaq sv̀ng a:lòe.

Yesu sv̀ng shvtlv́m Parisirì vrashì we

⁴⁵ Wekvt, Mari yv́ngsv̀ng dì ráì we Yuda vsv̀ngrì mvme nø Yesuí wà bǿà rì yà:ngò nø̀ Yesu sv̀ng kv́m bǿì.

⁴⁶ Ínìgø àngmaq taqkèní tiqmaq nø Parisirì yv́ng dìá:mì nø̀, Yesuí wà bǿà rì dvtáòe.

⁴⁷ Wekvt shvrúngshú vjìrì nv̀ng Parisirìí Shaqré Lìpòngmè taq shaqré shaqtvngrì dvkø̀:mò nø̀, “Vsv̀ng yapèí nø shálv́m mvshv́lpvrá mvme wàòe. Kadø wàì ni?

⁴⁸ Àng sv̀ng yadø shvlángdv̀ng wàì kvt nø, vsv̀ng shvngbe Àng sv̀ng kv́mvme. Wekvt Roma cìlcèrì di daq nø̀, nøngmaq Shànshér Tø̀ngnø nv̀ng nøngmaq dvcì sv̀ng ècatnv́m bǿìe,” wae.

⁴⁹ Àngmaq taqkèní wenǿng taq shvrúngshú vgo wáshì pè Kayapaí, “Nàmaqí pàgø mèshánø̀ng.

⁵⁰ Nøngmaq dvcì køp vmv́nglv́m lòng mvdv̀m nø, bashàrì tvle vsv̀ng tiqgǿ shìlòng nø nàmaq dvpvt té shvla we sv̀ng mèdaknø̀ng má?” a:lòe.

⁵¹ Àng yadø shø̀n lòng nø, àng nø:tní shø̀:nò we mø̀í. Àng nø wenǿng taq shvrúngshú vgo wáshì rvtnø̀, Yuda dvcì køp dvpvt gø,

⁵² Yuda dvcì dvpvt wa mvtaq, kayv́ng màyv́ng vshin we Gvray àngcèrì sv̀ng tiqpóng dvkø̀mlv́m dvpvt gø Yesu shìlv́m dàng kàdvtu:tnò we íe.

⁵³ Weni kèní Àng sv̀ng shvtlv́m àngmaqí gvcvt vjø:nòe.

⁵⁴ Wervt Yesu nø Yuda vsv̀ngrì dvhø̀ø neyv́ng negv̀m mvdìá:mì. Weyv́ng kèní Àng búng nø̀ rvgaq mvgung shvnvng Epraim tǿò mvrìng yv́ngø Àng coqcv́nrì nv̀ng v̀lá:mì.

⁵⁵ Yuda vsv̀ngrìò Shvlé Bóy yùl ráì rvtnø̀, vtv́r rvgaq kèní vsv̀ng mvme nø vdèdè dvshérshì we vtóng cv̀nlv́m dvpvt, Shvlé Bóy mvwàò vzv̀ng Yerusalem sv̀ng ngangá:mì.

⁵⁶ Àngmaqí Yesu sv̀ng láò nø̀ Noqngø̀m Tø̀ngnø yv́ng rip sórí, “Kadø dèdvmnø̀ng má? Àng nø yabóy sv̀ng bvttut mvdìlv́m dø í má?” wa tasv̀ng vrùnge.

⁵⁷ Shvrúngshú vjìrì nv̀ng Parisirìí nø, Yesu sv̀ng tvp lúnlv́m rvt, Àng kayv́ng vl we sháò gǿí nø, dvtá ràe, wa nø̀ vmíng vzíshaq íe.