Marko 7 - Gvray Shànshér Mòngkà Kagvp Àngshv́r

Dòngnøt shànshérlv́m dang

¹ Yerusalem kèní dì daqì we Parisirì nv̀ng dvrá svrarì kèní tiqmaq nø Yesu yv́ng dvkǿmshì ráì.

² Àng coqcv́nrì tiqmaq nø mvshèr we, màsiqshìshaq wu:rí v́mpà vm we sv̀ng àngmaqí yà:ngòe.

³ (Kadø íe wani Parisirì nv̀ng Yuda vsv̀ng shvngbe gø, shaqrérì vtóng cà:nò nø̀, wur ciqshì dá:ngí wa v́mpà vme.

⁴ Gvt kèní lò ra nìgø, góng zv́lshì dá:ngí wa v́mpà vme. Vrá, gwìnrì, dòngkwvngrì nv̀ng kàmø taqrì sv̀ng zv́l rà we vtóng mvdv̀mø, dvgádø vtóng gø àngmaqí cv̀nlv́m mvme pv̀n vle).

⁵ Wekvt Parisirì nv̀ng dvrá svrarìí Yesu sv̀ng, “Nà coqcv́nrì nø kadø í rvtnø̀ shaqré vtóng màcv́nshaq, wur màsiqshì v́mpà vm má?” wa rø:tnòe.

⁶ À:ngí àngmaq sv̀ng, “Vní nøt ènøtnø̀ng rìé, Esayaí nàmaq dang kàdvtu:tnò nø̀ vru yà:ngà kà nø jø̀ngjǿng lví dá:rì. ‘Vsv̀ng yadvcìí nø, àngmaq nònggø:pmí wa Ngà sv̀ng nàpǿnge. Àngmaq nøt nø Ngà yv́ngkèní vsa:re.

⁷ Àngmaqí shvngø:tnò rì nø sv́ngzàcèrìí wàò we vtóng dvrá wa íe. Wervt àngmaqí Ngà sv̀ng ènok lòng nø vshø̀ng màshǿng íe,’ wà yà:ngì.

⁸ Nàmaqí nø Gvray dvkv́mkà sv̀ng nø màcv́nshaq, vsv̀ng vtóngrì lè ècv̀nnø̀nge,” a:lòe.

⁹ À:ngí rá àngmaq sv̀ng, “Nàmaq vtóngrì cv́n dvdønglv́m rvt, Gvray dvkv́mkà sv̀ng ngállv́m nø pàshaqí ni èzit ráshà.

¹⁰ Kàshvbóng, Moshií nø, ‘Nvpè nvmè sv̀ng nàpǿò. Àngpè àngmè sv̀ng kà mvgv́m shø̀n gǿ nø, jø̀ngjǿng dvshí ràe,’ wa shø̀n yà:ngà.

¹¹ Íwe nàmaq nø, vsv̀ng tiqgǿí àngpè àngmè sv̀ng, ‘Nàní sv̀ng dvkùmlv́m lòng nø ngàí Gvray kaq shvrúng bǿngà,’ wa nø̀ la shø̀n kvt kèní nø,

¹² àngpè àngmè sv̀ng wegǿí dvbvnglv́m nàgámnø̀nge.

¹³ Wedø nàmaqí shèngøtnø̀ng we vtóng laqyàrìí Gvray dvkv́mkà sv̀ng ècatnø̀nge. Nàmaqí yadø cha we dvgádø mvme pv̀n gø èwànø̀nge,” a:lòe.

¹⁴ Wedá:ngí Yesuí vsv̀ng loksokrì kaq Àng yv́ngsv̀ng goò nø̀, “Nàmaq gǿ vrà:mí Ngà kà sv̀ng ètánø̀ng nø̀ leq cíngnø̀ng.

¹⁵ Vtv́ng lap kèní vsv̀ng góng vdòng gòngvm lù:ngí nø, àng sv̀ng mvshér dvzá:rò we mø̀í. Vsv̀ng vdòng kèní léshì long lù:ngí mv̀ng nø àng sv̀ng mvshér dvzá:rò we íe.

¹⁶ Tálv́m vnà vdá vsv̀ng nø laq tashì,” a:lòe.

¹⁷ Yesu nø vsv̀ng loksokrì yv́ngkèní léshì nø̀ chø̀m vdòng gòng lú:ngì kvt, Àng coqcv́nrìí kàshvbóng welòng dang Àng sv̀ng rø:tnòe.

¹⁸ Yesuí àngmaq sv̀ng, “Nàmaq gø wedv́ngte ni cíngrál nøt mèv̀lnø̀ng má? Vtv́ng lap kèní vsv̀ng góng vdòng sv̀ng gòngvm lù:ngí nø̀ vsv̀ng kaq mvshér dvzá:rò we mø̀í we sv̀ng mèshánø̀ng má?

¹⁹ Pàwá wani welòng nø àng nøt vdòng sv̀ng zv́ngshìvm we mø̀í, puqwá vdòng sv̀ng zv́ngshìvm nø̀, léshìrà yv́ngkèní rá léshìvme,” a:lòe. (Yesu yadø wa lòng nø, v́mlv́m shvngbe nø shère, wa kà íe).

²⁰ À:ngí rá, “Vsv̀ng tiqgǿ vdòng kèní léshì long lù:ngí mv̀ng nø vsv̀ng kaq mvshér dvzá:rò we íe.

²¹ Kadø íe wani vsv̀ng nøt vdòng kèní léshì long rì nø màshvla dø dvda:mò we, dvchap we, kø we, vsv̀ng shvt we,

²² vsv̀ng svma dvchap we, map we, nøt mvgvm we, yùm we, shvraq màdá svma lvngà vshúshì we, neza we, dvsíkà shø̀n we, dvshv́ngshì we, svnggvlang wáshì we,

²³ màshvla we yadv́ng pv̀n shvngbe nø vsv̀ng vdòng kèní léshì long nø, vsv̀ng kaq mvshér dvzá:ròe,” a:lòe.

Siro Fonesia wv́ngzàmè kv́mnøt

²⁴ Yesu nø weyv́ng kèní búngá:mì nø̀, Tiru rvgaq sv̀ng dìá:mì. Àng nø chø̀m tiqchø̀m sv̀ng gòngá:mì nø kagǿí gø laq mvsháò wa dvda:mò nìgø, vsà:ngí mvsháò dø máshì mvlú:nò.

²⁵ Àngcèmè taq mvmv́ng cáng dvchøp we svmaré tiqmè nø Yesu weyv́ng tuq we shv̀ngkà tá bǿà chàng dì ráì nø̀ Àng hí shvnvng kǿngkupshìe.

²⁶ Svmaré yamè nø Siria móng Fonesia rvgaq kèní wv́ngzà í we, àngcèmè kèní cáng lúngalv́m Yesu sv̀ng kórshìe.

²⁷ Íwe Yesuí àng sv̀ng, “Cv̀mrécèrì vzv̀ng laq vgàvm. Cv̀mrérì v́mpà lúa dv̀ng vgirì sv̀ng dvgupma màdu,” a:lòe.

²⁸ Wemèí Yesu sv̀ng, “Í nø̀ íe, Kàngpèá. Íwe, v́m shvbóy lv̀ngpvng vl we vgirìí gø cv̀mrérìí dvjá daqò we v́mpàshirì nø lvtǿá:mò ni!” wa vtá:nòe.

²⁹ Wervt Yesuí àng sv̀ng, “Nàí yadø vtv́nshì èsháò rvt, èlovm, cáng nø nvcèmè góng kèní lúshiá:mì,” a:lòe.

³⁰ Wekvt wemè nø chø̀m sv̀ng loá:mì nìnø, cvmrémè gø yøprà mvdv̀m vyálshì da nø̀ cáng gø lúshì dá:rì we sv̀ng à:ngí yv̀ng bǿà.

Nà mvtá tiqpè dvba:nò we

³¹ Tiru rvgaq kèní Àng búng nø̀, Sidon rvgaqgaq leshì dá:ngí Dekapoli móng dangdang Galili Tìnúngmè sv̀ng tuq ráì.

³² Vnàí mvtáò nø̀ kà gøm dø shǿn màshvla we tiqgǿ, àngmaqí Àng yv́ngsv̀ng shøla:tnà nø̀, àng mvdv̀mø Àng wur lvhapshì dø røtnòe.

³³ Wekvt vsv̀ng loksokrì kèní Yesuí àng kaq tiqtong sv̀ng shøl bǿà nø̀, àng vnà vdòng sv̀ng Àng wurhàmí mvnuqò nø̀, wurhàm sv̀ng tø:lí dvshaqshì dá:ngí wepè pvlè sv̀ng vkoqòe.

³⁴ Vrá muqlàng kaq Àng kang ngángshì nø̀ shaqmè vhéshì sórí wepè sv̀ng, “Efata,” a:lòe. (Yakà nø, “Nàtánvm,” wa kà íe).

³⁵ Wela:ngí àng vnà vpuqá:mì. Àng pvlè vkv́ngkéò lòng gø vpǿná:mì nø̀, shvngshvng wa kà shø̀n lú:ngì.

³⁶ Kagǿ sv̀ng gø màdvtálv́m À:ngí àngmaq sv̀ng dvká:mò we í nìgø, té dvká:mò té àngmaqí dvsha:ngòe.

³⁷ Wekvt àngmaq nø, vtvngshaq dádv̀ng wàá:mì nø̀, “À:ngí kapà gø shvla dø dvchǿng wàòe lé! Nà mvtárì gø lvtáò dø, màárì gø kà lvshø̀n dø wàòe,” wae.