Marko 4 - Gvray Shànshér Mòngkà Kagvp Àngshv́r

Vmyø̀ wøn kàshvbóng

¹ Yesuí tìnúngmè shvnvng yv́ng rá tiqkvt mvshǿl shvngø:tnòe. Àng vl yv́ng vsv̀ng loksok gvzà kø̀m ráì rvtnø̀, Àng nø tìnúngmè mvdv̀m kùngshí vdòng sv̀ng zv́ngshì nø̀ runge. Vsv̀ng loksok shvngbe nø tìnúngmè vdàm pà tø̀mø runge.

² À:ngí kàshvbóng kèní àngmaq sv̀ng mvme pv̀n shvngø:tnò nø̀ yadø a:lòe.

³ “Ètá dánø̀ng! Vmyø̀ wøn vsv̀ng nø, vmyø̀ wøn nv̀ng búngá:mì.

⁴ À:ngí wø:nò dvgvp, tiqmaq nø tvrà mvdv̀m vjáá:mì nø̀, carì dì ráì weí tǿvm bǿà.

⁵ Tiqmaq nø vba gvzà mvtvt we lóngheq mvdv̀m vjáá:mì. Vba gvzà mvtvt rvtnø̀ tiqdvshaqí yó lú:ngì.

⁶ Ínìgø, nv̀m svr ráì nø̀ vkatshì lú:ngì kvt gángkéò weí, àngrø màvl rvtnø̀ shúngá:mì.

⁷ Tiqmaq nø bv̀nghǿ póng vdòng vjáá:mì nø̀, bv̀nghǿrì té lú:ngì weí shø̀rkéò rvt àngshí mvzí long.

⁸ Tiqmaq nø vba shvlá yv́ng vjáá:mì nø̀ yó lú:ngì. Vzashì nø̀ té lú:ngì nìnø, vshø̀mcé dvtv̀ng, vchuqcé dvtv̀ng, tiqyá dvtv̀ng àngshí shóng lú:ngì,” a:lòe.

⁹ Wekvt À:ngí, “Tálv́m vnà vdá vsv̀ng nø laq tashì,” a:lòe.

¹⁰ Àng wawa vl dvgvp, Àng mèpvng cv̀n rì nv̀ng Tiqcé Vnípèí kàshvbóng welòng dang Àng sv̀ng rø:tnòe.

¹¹ Wervt À:ngí àngmaq sv̀ng, “Nàmaq sv̀ng nø Gvray móngdàn mvshǿl vmáshaq kà Gvrayí vzíshaq íe. Ínìgø, Ngaí vtv́nglap vl vsv̀ngrì kaq nø kàshvbóng kàí wa shvngøtnòe.

¹² Kadø íe wani, ‘Àngmaqí dvjaqò nìgø mvyv̀nglv́m, táò nìgø mvcínglv́m dvpvt íe. Mø̀í nìnø, àngmaqí yà:ngò nø̀ cíngràl lú:ngò kvt àngmaq nøt vwv́ngshì ra nø̀ mvrà chutna we lú:nò ni we íe,’” a:lòe.

Kàshvbóng lvjøm pǿ:nò we

¹³ Wekvtrá Yesuí àngmaq sv̀ng, “Kàshvbóng yalòng sv̀ng nàmaqí mècíngnø̀ng nìnø, dvgá kàshvbóngrì sv̀ng nø kadøwa lecíngnø̀ngni?

¹⁴ Vmyø̀ wø:nò gǿ nø Gvray Mòngkà wø:nò gǿ íe.

¹⁵ Vsv̀ng tiqmaq nø tvrà mvdv̀m wø:nò we vmyø̀ nv̀ng vbónge. Àngmaqí mòngkà tá bǿà kvt, wela:ngí ni Satan dì ráì nø̀ àngmaq nøt vdòng wøn bǿà we mòngkà sv̀ng lùv́m bǿà.

¹⁶ Tiqmaq nø lóngheq tø̀m mvdv̀m wø:nò we vmyø̀ nv̀ng vbónge. Àngmaq nø mòngkà sv̀ng tá bǿà chàng dvbùnø:tní vtoshìe.

¹⁷ Íwe àngmaq nøt vdòng taq àngrø mvcaqshì rvt tiqlvngcè wa zá:nòe. Àngmaq nø Gvray mòngkà rvt dvshà we, mø̀íni dvki vrè we vhǿm lú:ngò kvt, zvngwa lángshìvme.

¹⁸ Tiqmaq nø bv̀nghǿ póng vdòng wøn bǿà we vmyø̀ nv̀ng vbónge. Àngmaqí mòngkà sv̀ng tá bǿà nìgø,

¹⁹ rvgaq yabàn gónggilv́m rì nv̀ng pø̀í yù:mò we nv̀ng dvgá àngpv̀npv̀n sv̀ng map we nøt gòng ra weí mòngkà sv̀ng shø̀rkéò rvtnø̀, àngshí mvzírì íe.

²⁰ Tiqmaq nø vba shvlá yv́ng wø:nò we vmyø̀ nv̀ng vbónge. Àngmaq nø mòngkà sv̀ng táò dá:ngí vtoshìrì íe. Yarì nø vshø̀mcé dvtv̀ng, vchuqcé dvtv̀ng, tiqyá dvtv̀ng, àngshí shóng longe,” a:lòe.

Vdèò gálòng dvtan ra we

²¹ Yesuí rá àngmaq sv̀ng a:lò we nø, “Svmigwìn lv́nga:tnò nìnø mvgù:rí kuplv́m, mø̀íni yøpgù lv̀ngpvngø shvrúnglv́m í má? Àng shvrúngrà taq lè shvrúng rà we mø̀í má?

²² Kadø íe wani vmáshaq pà í nìgø Gvrayí dvtan lú:ngòe. Vwvmshaq pà ínìgø gá yv́ng dvtan lú:ngòe.

²³ Tálv́m vnà vdá vsv̀ng nø laq tashì,” a:lòe.

²⁴ À:ngí vrá, “Nàmaqí ètá bǿshà rì shvla dv̀ng wa dèdvmnø̀ng. Té ètánø̀ng nìnø, cíngrál nøt té èzídaqnø̀nge. Wemvdv̀m gø èlúndaqnø̀nge.

²⁵ V́laò gǿ sv̀ng nø rvma daqòe. Màv́laò gǿ kèní nø, vdá lòngcè gø àng yv́ngkèní lù bǿòe,” a:lòe.

Vmyø̀ té lú:ngì we kàshvbóng

²⁶ À:ngí vrá, “Gvray móngdàn nø, vsv̀ng tiqgǿí rvmá hv́ng taq vmyø̀ wø:nò we nv̀ng vbónge.

²⁷ Wø:nò dá:ngí àng nø yaqdø̀:ngí yøp nø̀ vyá:ngí kungshì nø̀ vl ke, kadøwa vmyø̀ mvkuq nø̀ té lú:ngì we à:ngí mvsháò.

²⁸ Vbaí àngwawa shvyó lúngò nø̀, nv̀mlat nø mvdùn cvp, mèpvng nø shírùng, wemèpvng nø rvkøpshì we àngshí vl longe.

²⁹ Mvzí dvyø̀ gong ra kvt nø shvrvt dvkøm rvtø̀ høq bǿà rvt, à:ngí shv̀mdvgoq lá:ngò nø̀ shvra:tnòe,” a:lòe.

Mvngashí kàshvbóng

³⁰ À:ngí vrá, “Gvray móngdàn nø, nøngmaqí kapà nv̀ng shvbónglv́m í má? Kapà kàshvbóng nv̀ng shvbóng shvla má?

³¹ Gvray móngdàn nø mvngashí tiqchv̀ng nv̀ng vbónge. Mvngashí nø, rvgaq tø̀m taq vl pv̀n dvyø̀ shvngbe taqkèní té zì pv̀n íe.

³² Íwe ka:tnò nø̀, yo long kvtnø vyúngkvn shvngbe mvdv̀m te longe. Dvgv̀ngmèrì dvkaq long weí, vháng ram carì àngdv̀ng washì nø̀ dvkøqshì lú:nòe,” a:lòe.

³³ Àngmaqí cíngràllv́m dvpvt À:ngí yalòng dø í we kàshvbóng mvme pv̀n kèní àngmaq sv̀ng mòngkà shvngø:tnòe.

³⁴ Kàshvbóng kèní wa mø̀í nìnø, À:ngí àngmaq sv̀ng pàgø mvshø̀:nò. Íwe Àng nv̀ng Àng coqcv́nrì àngmaq wa vl dvgvp nø, À:ngí mvshǿl werì shvngbe pǿnaòe.

Yesuí tima na:rò we

³⁵ Weni dørø̀m høqa:tnà dvgvp, Yesuí coqcv́nrì kaq, “Tìnúngmè kupa sv̀ng léshaì,” a:lòe.

³⁶ Wervt coqcv́nrì nø vsv̀ng loksokrì là:ngò nø̀, Yesu rung we kùngshí gø̀m sv̀ng zv́ngshì dá:ngí, Àng nv̀ng tiqdø léshìe. Dvgá kùngshírì gø zv̀ne.

³⁷ Wekvt nv̀mbø̀ng mvrùmè mut ráì nø̀, tìma pvlòng weí, kùngshí gøm nø tìí zǿng mvnshì lú:ngì.

³⁸ Yesu nø kùngshí ni yv́ng vgo mvkøm mvkømshì nø̀ yøpme. Wekvt coqcv́nrìí Àng sv̀ng dvsha:tnò nø̀, “Kàngpèá, vmv́nglv́m dv́nshàì we sv̀ng Nàí mènø:tnò má?” a:lòe.

³⁹ Wervt Àng kungshì nø̀ nv̀mbø̀ng sv̀ng nga:nò nø̀, tìma sv̀ng gø, “Shø̀mwa èzø̀lvm,” vl bǿà kvt, wela:ngí nv̀mbø̀ng shø̀má:mì nø̀ vtvngshaq mòngzø̀lá:mì.

⁴⁰ À:ngí àngmaq sv̀ng, “Pàwá wedv́ngte serenø̀nge? Akvt høq kv́mnøt mèv̀lnø̀ng má?” a:lòe.

⁴¹ Íwe, àngmaq gvzà svreá:mì nø̀, “Nv̀mbø̀ng nv̀ng tìma gø Àng kà ta we nø, yapè kagǿ í má?” wa vrùnge.