Marko 3 - Gvray Shànshér Mòngkà Kagvp Àngshv́r

Wur tiqpa shì vsv̀ng dvba:nò we

¹ Yesu nø vrá tiqkvt júrøt chø̀m sv̀ng gòngá:mì. Weyv́ngø wur tiqpa shì vsv̀ng tiqpè vle.

² Narni taq àng sv̀ng Yesuí dvban daqò má wa nø̀, Àng sv̀ng cèlv́m rvt àngmaqí dvjà:mòe.

³ Yesuí wur tiqpa shì pè sv̀ng, “Vzv̀ng kaq èrip long,” a:lòe.

⁴ Vrá, À:ngí àngmaq sv̀ng, “Narni taq bv̀nlì shvlá rì, mø̀íni bv̀nlì mvgv́m rì kapv̀n wàlv́m dvráe má? Gø̀nshaq shvlutlv́m, mø̀íni gø̀nshaq shvmv́nglv́m, kapv̀n wàlv́m dvráe má?” wa rø:tnòe. Íwe, àngmaq dø màwá vle.

⁵ Àngmaq nøt zaq rvt Yesu nøt yùr nø̀, shv̀mná mvgø̀r sórí àngmaq sv̀ng gùrhøm dvjaqò dá:ngí wepè sv̀ng, “Nà wur èzúshì long,” a:lòe. Àng wur zúshì lú:ngì kvt, vrǿng baná:mì.

⁶ Weyv́ng kèní Parisirì búngá:mì nø̀, Àng sv̀ng kadøwa shvmv́nglv́m gvcvt vjø:nò nø̀, wela:ngí ni Herod mvdò nv̀ng vrashìe.

Za vsv̀ng dvba:nò we

⁷ Wemèpvng Yesu nv̀ng Àng coqcv́nrì nø tìnúngmè kaqsv̀ng yilshìá:mì. Galili kèní vsv̀ng loksu:kngí gø Àng mèpvng cv̀n bǿà.

⁸ À:ngí ring we bv̀nlì wàò we tvràrì tá bǿà kvt, Galili rvgaq, Yuda rvgaq, Yerusalem, Idumia rvgaq, Yordan Tìwàng kupa nv̀ng Tiru wamà ó Sidon wamà gùrhøm kèní gø, vsv̀ng loksok nø Àng yv́ngsv̀ng dì ráì.

⁹ Vsv̀ng loksu:kngí Àng sv̀ng màshvgørlv́m rvt, kùngshícè tiqgø̀m Àng dvpvt tvlú dvgø̀lv́m Àng coqcv́nrì sv̀ng a:lòe.

¹⁰ Pàwá wani vsv̀ng mvme sv̀ng À:ngí dvban bǿà rvtnø̀, dvsǿn zøtnaí zarì í dv́ngte nø Àng sv̀ng shup lúnlv́m vnvpshì ráì.

¹¹ Cángrìí Àng sv̀ng yv̀ng bǿò kvt vrv̀m Àng mv́rdv̀ngø kǿngkupshì nø̀, “Nà nø Gvray Àngcèpè èíe!” wa vkiqe.

¹² Ínìgø, Àng kagǿ í we sv̀ng vsv̀ngrì kaq shá màdvzv́rlv́m Yesuí cángrì sv̀ng mvgvmkaq dvká:mòe.

Yesuí coqcv́n Tiqcé Vnípè rvcà:ngò we

¹³ Wemèpvng Àng nø mvrùl sv̀ng ngang nø̀, Àng go mvyǿ we tiqmvdò sv̀ng go bǿà nìnø, Àng yv́ngsv̀ng àngmaq dì lú:ngì.

¹⁴ Àng nv̀ng tiqdø v̀llv́m gø, mvshǿl dvshvng dvzv́rlv́m gø, vsv̀ng tiqcé vnípè rvcà:ngò dá:ngí, àngmaq sv̀ng dvzv́r bø̀ng tǿòe.

¹⁵ Wekvtrá àngmaq sv̀ng nø cáng lùnglv́m vmíng vkv́ng gø zíòe.

¹⁶ Rvcv̀ng bǿà we Tiqcé Vnípè nø yarì íe. Simon sv̀ng À:ngí Piter wa tǿòe.

¹⁷ Boaneji tǿò we Zebedi àngcè Yaku nv̀ng àngnvmpè Yohan, (Boaneji nø “muq dø gø̀m cèpèní” wa kà íe),

¹⁸ Anderu, Pilip, Bartolemi, Mati, Toma, Alpiu àngcèpè Yaku, Tadiu, dvcì shóngnøt te pè Simon nv̀ng

¹⁹ Àng sv̀ng nvmvmlv́m pè Iskariot Yuda íe.

²⁰ Wemèpvng Yesu nø chø̀m sv̀ng gòng ráì nìnø, àngmaqí v́mpà v́m gø mvlú:nò høq, vrá tiqkvt vsv̀ng loksok kø̀m ráì.

²¹ Àng rvp vsv̀ng rìí yalòng tá bǿà kvt, “Àng nø nøt mvriqá:mì pà íe,” wae. Wervt Àng sv̀ng lùlv́m búngá:mì.

²² Yerusalem kèní dì daqì we dvrá svrarìí, “Àng nø Beelzabul dvchøp rvtnø̀, cáng koqkv́mpè nònggùn kèní cángrì lù:ngò we íe,” wae.

²³ Wervt Yesuí àngmaq sv̀ng goò dá:ngí, kàshvbóng kèní àngmaq sv̀ng, “Satan sv̀ng nø Sataní kadøwa lúng shvlani má?

²⁴ Móngdàn tiqlòng nø àngmaq nø àngmaq vgv̀ng vkang nìnø, wemóng nø ngv̀ngdønglv́m màvl.

²⁵ Tiqchø̀m vsv̀ng gø àngmaq nø àngmaq vgv̀ng vkang nìnø, wervp ngv̀ngdønglv́m màvl.

²⁶ Wedø tiqdvchá, Satan gø àng ni àng vtúshì nø̀ vgv̀ng vkang nìnø, àng gø ngv̀ngdønglv́m màvl. Vrø̀l vcatnvme.

²⁷ Shvrepè sv̀ng vzv̀ng màdóngshaq, kagǿí gø àng chø̀m sv̀ng gòng nø̀ àng dvrèrì tøl mvngutshì. Shvrepè sv̀ng dóng dá:ngí wa àng chø̀m dvrè tølv́m lúnshìe.

²⁸ Ngàí jø̀ngjǿng vla:tnìni, vsv̀ngrìò mvrà nv̀ng Gvray kaq shvyǿm mvtv́n we mvrà shvngbe nø chutna lúnshìe.

²⁹ Íwe, Shànshér Pvlàcè kaq shvyǿ:mò gǿ sv̀ng nø kadø í nìgø chutna mvlúnshì. Wegǿ nø dvciqlvpat mvrà vrie,” a:lòe.

³⁰ À:ngí àngmaq sv̀ng yadø a:lò we nø, “Àng nø mvmv́ng cáng dvchøpme,” a:lò rvt íe.

Kv́m vsv̀ngrì nø Yesu àngrì àngrvp í we

³¹ Wedvgvp Yesu àngmè nv̀ng àngnvmpèla dì ráì nø̀, chø̀m vngám lap yv́ng rip sórí, Yesu sv̀ng golv́m tiqgǿ kaq dvzá:ròe.

³² Àng gùrhømø vsv̀ng loksok runge. Àngmaqí, “Ku, nvmè nv̀ng nvnvmpèlaí vngámlap yv́ng Nà sv̀ng èláe,” a:lòe.

³³ Wekvt À:ngí àngmaq sv̀ng, “Ngà vmè nv̀ng vnvmpèla nø kagǿmaq íe?” wa rø:tnò dá:ngí,

³⁴ Àng gùrhøm rung rì sv̀ng dvjaqò sórí, “Èyv̀ngnø̀ng, Ngà vmè nv̀ng vnvmpèla!

³⁵ Gvray nøt cv́n døng gǿ mv̀ng nø Ngà vnvmrì nv̀ng vmè íe,” a:lòe.