Marko 16 - Gvray Shànshér Mòngkà Kagvp Àngshv́r

Yesu zun lú:ngì we

¹ Narni vleá:mì dvgvp, Makdala mvrìng kèní Mari, Yaku àngmè Mari nv̀ng Salomi nø Yesu vnàng sv̀ng yøtìí vdørlv́m dvpvt, ngórdorcì wa:nòe.

² Wenár nv̀mlat ni sháng mvgágá nv̀m svr ráì dvgvp lóngdùng dvgv̀m yv́ngsv̀ng àngmaq di sórí,

³ “Dvgv̀m bv́ngkà lóngkø̀m gø̀m nøngmaq dvpvt kagǿí tèriaa:tnì má?” wa àngmaq vrùnge.

⁴ Pàwá wani lóngkø̀m gø̀m nø vtvngshaq tee. Íwe àngmaq kang ngángshì yà:ngò nìnø, lóngkø̀m gø̀m nø tvri dárà we sv̀ng yv̀ng bǿà.

⁵ Lóngdùng dvgv̀m vdòng sv̀ng gòngá:mì ke, bèlaq mùng gwashì nø̀, vbàngpaø rung da we gùchàngré tiqpè sv̀ng àngmaqí yv̀ng bǿà nìnø, àngmaq dvdvm vtiqá:mì.

⁶ Wepèí àngmaq sv̀ng, “Dvdvm mènàtiqnø̀ngni, nàmaqí nø wurgang taq vtaqa:pmà we Nazaretpè Yesu sv̀ng èlánø̀nge. Àng nø zuná:mì, ya yv́ng màvl. Àng sv̀ng vyàla:pmà yv́ng gø èyv̀ngnø̀ng le!

⁷ Nàmaq èdìv́mnø̀ng nø̀ Àng coqcv́nrì nv̀ng Piter sv̀ng, ‘Àng nø nàmaq vzv̀ngzv̀ng Galili gùrwang sv̀ng di dae. À:ngí nàmaq sv̀ng èvlvpshà dø, nàmaqí Àng sv̀ng weyv́ngø mv̀ng èyv̀ng bǿnø̀nge,’ wa dètánø̀ng,” a:lòe.

⁸ Wekvt wemèla nø nipnip vdv̀n nø̀ dvtiqshì sórí lóngdùng dvgv̀m kèní vjèrá:mì. Íwe àngmaq svre rvt, kagǿ sv̀ng gø àngmaqí tiqkà gø màdvtáò.

⁹ Wenár nv̀mlat ni taq, sháng mvgágá Yesu zuná:mì mèpvng, À:ngí cáng shvngøt go lúnga yà:ngà mè, Makdala mvrìng kèní Mari sv̀ng vzv̀ng Àng dvtánshìe.

¹⁰ Mari dìá:mì nø̀ Yesu nv̀ng tiqdø v̀l yà:ngì rì sv̀ng dvtáòe. Àngmaq nø nøt yùr nø̀ ngø dae.

¹¹ Yesu cúnshì we nv̀ng Marií Yesu yv̀ng dv́rà, wa kà sv̀ng àngmaqí tá bǿà nìgø mvkv́m.

¹² Wemèpvng, àngmaq kèní vnípè nø vtv́r rvwá sv̀ng di dvgvp, Yesu nø shø̀ngshang tiq mv̀rshà:mí àngní lvngà sv̀ng dvtánshìe.

¹³ Wekvt àngní lvngà vtv́ngá:mì nø̀, dvgárì sv̀ng dvtáò nìnø, wedøni àngmaq mvkv́m.

¹⁴ Wemèpvng, coqcv́n tiqcé tiqpè wa námrung nø̀ v́mpà vm dvgvp Àng dvtánshìe. Íwe, àngmaq kv́mnøt màvl nø̀ nøt zaq rvt Yesuí àngmaq sv̀ng nga:nòe. Kadø íe wani Àng zun lú:ngì mèpvng Àng sv̀ng yv̀ng dárà rì kà sv̀ng àngmaq mvkv́m.

Kàngpè Yesu dvkv́mkà

¹⁵ Yesuí àngmaq sv̀ng, “Nàmaq nø móng døngtáng sv̀ng èdìnø̀ng nø̀, sv̀ng pv̀n í dv́ngte sv̀ng Dvbùshv̀ngkà dèshvng bǿnø̀ng.

¹⁶ Kv́m nø̀ tìløp løpshì gǿ nø chutchv́ng lúne, mvkv́m gǿ nø kàngé we vhǿmlv́m íe.

¹⁷ Vrá, kv́m vsv̀ngrì sv̀ng nø mvshv́lpvrá yadv́ng pà:ní cv̀n lú:ngòe. Àngmaqí nø Ngà bø̀ng kèní cángrì lùng lú:ngòe. Dvgá pv̀n kà àngshv́r gø àngmaq shø̀n longe.

¹⁸ Bø̀ sv̀ng àngmaqí zǿm vdu nìgø, shì ra pv̀n pvla aq vdu nìgø, kadø gø mø̀í long. Vrá, zarì mvdv̀m wur hapshì kvt záyv̀ng ban longe,” a:lòe.

Yesu muqlàng kaq vbun bǿà we

¹⁹ Kàngpè Yesu nø àngmaq sv̀ng kà shǿn dv́ng bǿà mèpvng, Àng kaq muqlàng kaq vbun bǿà nø̀, Gvray vbàngpa yv́ng rúngá:mì.

²⁰ Wekvt coqcv́nrì búngá:mì nø̀, kayv́ng màyv́ng mvshǿl dvshvng bǿà. Kàngpè gø àngmaq nv̀ng tiqdø bv̀nlì wa nø̀, àngmaqí dvsha:ngò we mòngkà dìng we sv̀ng mvshv́lpvrá dvzà:nò weí shvdøng shvngà:ngòe.