Marko 14 - Gvray Shànshér Mòngkà Kagvp Àngshv́r

Yesu sv̀ng shvtlv́m vrashì we

¹ Shvlé Bóy nv̀ng Zidòngsér V́mbóy vzv̀ng vníni taq, shvrúngshú vjìrì nv̀ng dvrá svrarìí Yesu sv̀ng mvyø̀:ní tvp nø̀ shvtlv́m gvcvt vjø:nòe.

² Ínìgø àngmaq nø bashàrì vjángshì long we sv̀ng svre rvt, bóy àngni taq nø laq mø̀í, wa vrashìe.

Yesu sv̀ng ngórdorcìí ma:tnò we

³ Yesu nø Betani mvrìng yv́ng mvnggvng vcaq yà:ngì pè Simon chø̀m taq v́mpà vm dvgvp, svmaré tiqmè nø, gvzà vpǿ we nardú ngórdorcì vjø̀ng zvng we lóngshú chúngcè tiqchv̀ng lá:ngò nø̀ gòng ráì. Lóngshú chúng chv̀ng à:ngí pú:ngò nø̀, Yesu vgo taq vdøraòe.

⁴ Íwe, weyv́ng vl rì tiqmaq nø wedø wàò lòng sv̀ng mvwv́mshì nø̀, “Ngórdorcì welòng nø, mvpápá pàwá dvsǿ:mò má?

⁵ Pàwá wani welòng nø vshø̀myá dinari mvdv̀m taq nvmdv̀ng dvshà vsv̀ngrì kaq zíò lòng té shvla we!” wa vbønshìe. Wervt àngmaqí wemè sv̀ng her wa nga:nòe.

⁶ Íwe Yesuí, “Vwa laq wàò. À:ngí Ngà dvpvt shvla we tiqpv̀n èwv́ngang ke pàwá àng sv̀ng nàrènø̀nge?

⁷ Dvshà vsv̀ngrì nø kadvgvp gø nàmaq nv̀ng vle. Nàmaqí àngmaq sv̀ng dvbvng mèyǿnø̀ng nìnø kadvgvp gø dvbvng dv̀ng íe. Ínìgø, Ngà nø nàmaq nv̀ng tiqdø yv̀ngmàdvt v̀llv́m mvǿngà.

⁸ À:ngí wá lú:nò dv́ngte wà bǿà. Ngà sv̀ng mèkǿm vzv̀ng kaq Ngà góng taq yøtìí nàdør we nø Ngà sv̀ng kǿmlv́m dvpvt dvgø̀ò we íe.

⁹ Ngàí nàmaq sv̀ng jø̀ngjǿng vla:tnìni, móng døngtáng taq Dvbùshv̀ngkà yalòng kayv́ng høq dvshvng bǿò nìnø weyv́ng høq, svmaré yamè sv̀ng dvdvm rǿnlvm rvt, à:ngí wà bǿà we yalòng sv̀ng gø wedøni dvshvng dá:ròe,” a:lòe.

Yesu sv̀ng nvmlv́m Yuda búngá:mì we

¹⁰ Coqcv́n Tiqcé Vnípè kèní Iskariot Yuda nø, Yesu kaq nvmlv́m shvrúngshú vjìrì yv́ng dìá:mì.

¹¹ Yudaí shø̀:nò kàrì tá bǿà nìnø, àngmaq dvbùá:mì nø̀ àng sv̀ng gv̀msùng zílv́m dv́naòe. Wekvt kèní Yudaí nø, Yesu kaq àngmaq wur sv̀ng tvle lúnlv́m yuqyà we rvtø̀ láòe.

Shvlé Bóy v́mrà láò we

¹² Shvlé Bóy núngpà shvrúnglv́m vyv̀ngcè sha:tnò we, Zidòngsér V́mbóy nv̀mlat ni taq, Àng coqcv́nrìí Àng sv̀ng, “Shvlé Bóy v́mpà v́mlv́m nøngmaqí kayv́ng dvgǿalv́m Nà èshònge má?” wa rø:tnòe.

¹³ Wekvt À:ngí coqcv́n vnípè dvzá:rò nø̀, “Wamà sv̀ng èdìv́mshì. Vbachúng taq tì baqshì we vsv̀ng tiqpè nàhǿm bǿshòe. Àng mèpvng ècv̀n bǿshò.

¹⁴ Àng gòngvm we chø̀m àngkàngpè sv̀ng, ‘“Ngà coqcv́nrì nv̀ng tiqdø Shvlé Bóy v́mpà v́m lúnlv́m, Ngà dvpvt zaqlè dǿng kayv́ng íe?” wa Svrapè røtne,’ èvlshò.

¹⁵ Wekvt dvzøm dvzi dvgǿshaq í we mvdv̀m dvtv̀ng taq te we tiqdǿng à:ngí nàní lvngà sv̀ng dètanvtshìe. Nøngmaq dvpvt weyv́ngø dègø̀ dáshò,” a:lòe.

¹⁶ Wekvt coqcv́n wepèní búngá:mì nø̀, wamà sv̀ng gòngá:mì nìnø, Yesuí àngní sv̀ng vl dárà døni yv̀ng bǿà nø̀, Shvlé Bóy v́mpà dvgø̀òe.

Kàngpè kàgvp

¹⁷ Dørø̀m høqa:tnà dvgvp, Yesu nv̀ng coqcv́n Tiqcé Vnípè tuq ráì.

¹⁸ Àngmaq nø shvbóy taq námrung nø v́mpà vm dvgvp, Yesuí, “Ngàí jø̀ngjǿng vla:tnìni, Ngà nv̀ng tiqdø á:mì we nàmaq lvngà taqkèní tiqpèí Ngà ènvmvm bønge,” a:lòe.

¹⁹ Wekvt àngmaq nøt dvshà lú:ngì nø̀, tiqgǿ mèpvng tiqgǿí Àng sv̀ng, “Ngà ǿngà má?” wa rø:tnòe.

²⁰ Wekvt Yesuí, “Coqcv́n Tiqcé vnípè kèní, Ngà nv̀ng tiqdø kung gø̀m taq zønv́mshì pè mv̀ng íe.

²¹ Ngà dang vru yà:ngà døni, Vsv̀ng Àngcèpè nø shí rà longe. Íwe Vsv̀ng Àngcèpè sv̀ng ènvmvm pè nø mvhøt longe. Wepè mvgv̀l yà:ngò pà í nìnø, àng dvpvt té shvla ni we!” a:lòe.

²² Àngmaq vm dvgvp, Yesuí zidòng lùò nø̀, Gvray kaq oqà wa dá:ngí vmø:tnò nø̀ àngmaq sv̀ng zíò sórí, “Èlùv́mnø̀ng nø̀ èv́mnø̀ng. Yalòng nø Ngà góng íe,” a:lòe.

²³ Vrá À:ngí gwìn chv̀ng lùò nø̀, Gvray kaq oqà wa dá:ngí àngmaq sv̀ng zíò nø̀, àngmaq shvngbe gwìn chv̀ng kèní aqe.

²⁴ À:ngí àngmaq sv̀ng, “Yalòng nø mvme gǿ dvpvt shòrò nø̀ shvdøngò we Ngà kàgvp shvwi íe.

²⁵ Ngàí nàmaq sv̀ng jø̀ngjǿng vla:tnìni, Gvray móngdàn vdòng taq àngshv́r tiqkvt bìmtì aqlv́m àngni weni mvhøqò dv́ngte, akvt kèní bìmtì yalòng Ngà mvaqlv́m íe,” a:lòe.

²⁶ Wekvt àngmaq nø shvring zàywà tiqgø̀m wa dá:ngí, Zanlún Pung sv̀ng búngá:mì.

Piterí ma lú:ngò we

²⁷ Yesuí àngmaq sv̀ng, “Nàmaq shvngbeí Ngà sv̀ng ca èlàngráshàe. Pàwá wani kàru taq, ‘Vyv̀ng roqshúpè sv̀ng Ngàí shvt bǿngò kvt, vyv̀ngrì nø bv̀ng vkangvme,’ wa vru yà:ngà.

²⁸ Ínìgø, Ngà zun long mèpvng, Ngà nø nàmaq vzv̀ngzv̀ng Galili rvgaq sv̀ng døng dange,” a:lòe.

²⁹ Piterí Àng sv̀ng, “Shvngbebe nøt vtøpmvm nìgø, ngà nø màtøp,” a:lòe.

³⁰ Wekvt Yesuí àng sv̀ng, “Ngàí nà sv̀ng jø̀ngjǿng vlvtnø̀ng, dèyaq ni, dv̀nggú vnírí shini mvgì dvgvp, nàí Ngà sv̀ng vshø̀m kvt èmang lóngàe,” a:lòe.

³¹ Íwe Piter nø vtvngshaq kaqshì nø̀, “Ngà nø Nà nv̀ng tiqdø shí vdongnø̀ng gø ngàí nà sv̀ng mvmang dak,” wae. Dvgárì shvngbe gø wedøni shø̀ne.

Getsemani Kùlwàng yv́ng Yesu vjú røt we

³² Àngmaq nø Getsemani wa tǿò we tiqzàng sv̀ng tuq ráì kvt, Yesuí Àng coqcv́nrì sv̀ng, “Ngàí vjú røtnv́mò dvgvp, nàmaq yayv́ng èrúng dánø̀ng,” a:lòe.

³³ À:ngí Piter, Yaku nv̀ng Yohan sv̀ng shø:lò nø̀ di ke, laqlaqni nøt dvshà lú:ngì.

³⁴ À:ngí àngmaq sv̀ng, “Ngà nø shìlv́m høqshaq vtvng kèní nøt dvshànge. Nàmaq yayv́ng èv̀lnø̀ng nø̀, pán vshat èca dánø̀ng,” a:lòe.

³⁵ Àng nø weyv́ng kèní tiqramcè dìá:mì dá:ngí, vba tø̀m sv̀ng kǿngkupshì sórí rvtø̀ welòng nø Àng yv́ngkèní shvlé daq nìnø laq vlevm, wa nø̀ yadø júrø:tnòe.

³⁶ “Abba, Vpèá, Nàí nø pà gø wá èngu:tnòe. Gwìn yachv̀ng nø Ngà yv́ngkèní èlóngangà. Ínìgø, Ngà nøt dø laq mø̀í, Nà nøt dø mv̀ng laq í daq,” wae.

³⁷ Àng vtv́ng ráì nø̀ àngmaq yøp da we sv̀ng yv̀ng bǿà nìnø, Piter sv̀ng, “Simoné, nà èyøpme ó? Tiqnaricè gø pán vshat ca mèjòr má?

³⁸ Dvløtlv́m yv́ngsv̀ng nàmaq mvgònglv́m dvpvt, pán vshat ècanø̀ng sórí jú èrøtnø̀ng. Pvlàcè nø mvyǿ we, góngsha nø shaq cv̀me,” a:lòe.

³⁹ Àng rá tiqkvt dìá:mì nø̀, to røt bǿà kà dø tiqdvchá júrø:tnòe.

⁴⁰ Àng vrá tiqkvt vtv́ng ráì nìgø, àngmaq yøpyǿí vnùngkéò nø̀ yøp da we sv̀ng yv̀ng bǿà. Àng sv̀ng kadøwa kà vtv̀nglv́m gø àngmaqí mvsháo.

⁴¹ Vshø̀m kvt wakvt Àng vtv́ng ráì nø̀, “Nàmaq nø akvt høq ènarshìnø̀ng nø̀ yøp èmvnshìnø̀ng má? Vrvmá:mì, rvtø̀ høq bǿà. Ku, Vsv̀ng Àngcèpè nø, mvrà vl rì wur taq shvtlv́m nvmv́m bǿà.

⁴² Èbúngnø̀ng, so dìì. Ku, Ngà sv̀ng ènvmvm pè nø tuq ráì,” a:lòe.

Yesu sv̀ng ta:pmò we

⁴³ Yesu wedø shø̀n la:ngí coqcv́n Tiqcé Vnípè kèní Yuda nv̀ng, shvrúngshú vjìrì, dvrá svrarì nv̀ng shaqré shaqtvngrìí dvzá:rò we vsv̀ng loksok tiqmvdò nø, shv̀m nv̀ng dèdǿm lá:ngò sórí ngamwa tuq ráì.

⁴⁴ Yesu sv̀ng nvmshúpèí nø̀ àngmaq sv̀ng mvshv́lpvrá tiqpv̀n zí dárà nø̀, “Ngàí kapè sv̀ng vbòngònøng, wepè íe. Àng sv̀ng tvpdv̀ng shvlá dv̀ngwa èshøl bǿnø̀ng,” vl dá:rà.

⁴⁵ Yuda tuq ráì weó, Yesu yv́ng chàng àng tvp vnvpshì nø̀, “Rabiá,” a:lò nø̀ vbùòe.

⁴⁶ Wekvt wá rìí Àng sv̀ng kvp dvkvp zø̀:mò nø̀ ta:pmòe.

⁴⁷ Íwe, shvnvng yv́ng rip we tiqpèí nø̀, shv̀m rut shà:lò nø̀ shvrúngshú vgopèò vshuq vnà tøq vja cv́nga bǿà.

⁴⁸ Wekvt Yesuí àngmaq sv̀ng, “Ngà nø̀ tølvm vsv̀ng ǿngà má? Wervt nàmaq nø̀ shv̀m nv̀ng dèdǿm èlv́ngnø̀ng nø̀ Ngà sv̀ng tvplv́m èdì ráshà ó?

⁴⁹ Ngà nø̀ ni vrv̀m nàmaq nv̀ng tiqdø vl nø̀ Noqngø̀m Tø̀ngnø vdòngø shvngø:tnì we, Ngà sv̀ng lemètvpshà. Íwe, yalòng nø̀ Shànshér Kàru vhømlv́m rvt íe,” a:lòe.

⁵⁰ Wekvt coqcv́nrì shvngbeí Àng sv̀ng ca là:ngò nø̀ vtshìá:mì.

⁵¹ Gùchàngré tiqpè nø̀ vzi shv́nàng laqtun tiqdù:ngí rvbeshì nø̀, Yesu mèpvng cà:nòe. Àng sv̀ng gø àngmaqí ta:pmò nìnø,

⁵² àng vzi shv́nàng laqtun dùng vchutná:mì nø̀ góngsér vtshìá:mì.

Shvrúngshú vgopè mv́rdv̀ng Yesu koò we

⁵³ Wekvt àngmaqí Yesu sv̀ng shvrúngshú vgopè yv́ng shøl bǿà. Shvrúngshú vjìrì, shaqré shaqtvngrì nv̀ng dvrá svrarì shvngbe weyv́ng dvkǿmshìe.

⁵⁴ Piter mv̀ng nø̀, Yesu mèpvng vsar dø cv̀n dá:rà we, shvrúngshú vgopè chø̀m gùrpuq yv́ng vsóngshúrì nv̀ng tiqdø rung sórí svmi lǿmshìe.

⁵⁵ Wekvt Yesu sv̀ng dvshílv́m rvt shvrúngshú vjìrì nv̀ng Shaqré Lìpòngmè vsv̀ngrì shvngbeí Àng sv̀ng vtù we shvkse láòe. Íwe tiqpv̀n gø lá mvlú:nò.

⁵⁶ Àng sv̀ng vtùò vsv̀ng mvme nø̀ mvdìng we shvkse wáshì nìgø, àngmaq shvkse kà màrá.

⁵⁷ Wekvt vrá vsv̀ng tiqmaq búng lú:ngì nø̀ Àng sv̀ng vtùlv́m mvdìng we shvkse wáshì nø̀,

⁵⁸ “‘Vsv̀ng wu:rí wà yà:ngà we Shànshér Tø̀ngnø yachø̀m sv̀ng Ngàí catnò nø̀, vshø̀m nií, vsv̀ng wu:rí màwáshaq tiqchø̀m Ngàí wàlv́m íe,’ wa yapè shø̀n kà nøngmaqí táìe,” a:lòe.

⁵⁹ Wedø shø̀n nìgø, àngmaq shvkse kà nø̀ màrá.

⁶⁰ Wekvt shvrúngshú vgopè nø̀ shvngbe dvhø̀ø zvng rip lú:ngì nø̀ Yesu sv̀ng, “Nàí tiqkà gø mènàtv́nshà má? Nà sv̀ng yadv́ng gǿí nàchaq nø̀ shvkse wáshì we mètáò má?” wa rø:tnòe.

⁶¹ Ínìgø, Yesu nø̀ dø màwá vl nø̀ tiqkà gø màtv́nshì. Wekvt shvrúngshú vgopèí vrá tiqkvt Àng sv̀ng, “Ìshøt ìgv̀n vl we Gvray Àngcèpè, Kristu wapè nø̀ nà èí má?” wa rø:tnòe.

⁶² Wekvt mv̀ng Yesuí, “Ngà ni ǿngàe. Vsv̀ng Àngcèpè nø̀ Jórnònggùn vl pè vbàngpaø rung we nv̀ng, muqlàng rvmøtrì nvngnvng døng dak we sv̀ng nàmaqí èyv̀ng lóngnø̀nge,” a:lòe.

⁶³ Wekvt shvrúngshú vgopè nø̀ bèlaq hweq ringshì sórí, “Wemvdv̀m nøngmaq kapà shvkse ràìe má?

⁶⁴ Gvray kaq shvyǿmkà yalòng sv̀ng nàmaqí gø ètá bǿshà, kadø dèdvmnø̀nge má?” wae. Àngmaq shvngbeí, “Àng nø̀ shí vpǿ we mvrà vle,” wa nø̀ kàciq ra:tnòe.

⁶⁵ Wekvt tiqmaqí Yesu sv̀ng tølí vpíò nø̀, Àng mv́rdaq wa:mò dá:ngí wur dvpuqí vdipmò nø̀ Àng sv̀ng, “Kà dètut lè,” a:lòe. Vsóngshúrìí gø Àng sv̀ng mv́r vpaqò nø̀ shøl bǿà.

Piterí maò we

⁶⁶ Piter nø̀ pvnglàm, chø̀m gùrpuq yv́ng vl dvgvp, shvrúngshú vgopè dvzømshú tiqmè dì ráì weí,

⁶⁷ Piter svmi lǿmshì we sv̀ng yv̀ng bǿà nìnø, àng sv̀ng dvjaqò sórí, “Nà gøni Nazaretpè Yesu nv̀ng tiqdø lèvlvp ni!” a:lòe.

⁶⁸ Íwe àng mashì sórí, “Nàí pà èshø̀:nò má mvshángò, cíng gø mvcíngò,” a:lò dá:ngí gùrpuq vngám lap gòngchit sv̀ng búngá:mì. Wekvt nø̀ dv̀nggú gì daqì.

⁶⁹ Dvzømshú mèí vrá tiqkvt àng sv̀ng yv̀ng bǿà nø̀ gùrhøm rip rì sv̀ng, “Yapè gø àngmaq nv̀ng tiqmvdò íe,” a:lòe.

⁷⁰ Íwe vrá tiqkvt àng mashìe. Mèpvng tiqlvngcèí gùrhøm rip rìí gø Piter sv̀ng, “Jø̀ngjǿng nà nø̀ àngmaq nv̀ng tiqmvdò lèíni nø̀. Pàwá wani nà nø̀ Galili vsv̀ng ni èíe,” a:lòe.

⁷¹ Ínìgø, àng dvgv́mshì sórí, “Nàmaqí èshø̀nnø̀ng we yapè sv̀ng ngàí mvshángò,” a:lòe.

⁷² Wela:ngí ni dv̀nggú vnírí warí gì daqì. Wekvt wa, Yesuí àng sv̀ng, “Dv̀nggú vnírí gø shini mvgì dvgvp, nàí Ngà sv̀ng vshø̀m kvt èmang lóngàe,” vl dárà kà sv̀ng Piterí dvdvm rǿn daqà nø̀ ung ung dvdǿrshì ngøe.