Marko 11 - Gvray Shànshér Mòngkà Kagvp Àngshv́r

Yerusalem sv̀ng Yesu gòng we

¹ Àngmaq nø Yerusalem wamà sv̀ng níshì ráì nø̀, Zanlún Pung shvnvng Betfaji nv̀ng Betani mvrìng sv̀ng tuq ráì dvgvp, Yesuí Àng coqcv́n vnípè sv̀ng,

² “Vzv̀ng lap rvwá sv̀ng èdìv́mshì. Rvwá sv̀ng ègòngv́mshì weó, vsv̀ng tiqgǿ gø shini mvzúnshì dvr we lòzècè tiqgo vdǿn dáò we sv̀ng, nàníí chàng èyv̀ng bǿshòe. Èpǿnshò nø̀ èshølvtshò.

³ Nàní sv̀ng tiqgǿgǿí, ‘Pawá yadø èwàshòe?’ wa ra nìnø, ‘Kàngpè zǿmdv̀nge, tv́n tiqlvng ni vtv̀ngvtnòe wae,’ èvlshò,” a:lò nø̀ dvzá:ròe.

⁴ Wekvt àngní dìá:mì nìnø, tvrà nvmdøng tiqyv́ng, bv́ngkà vngámlap lòzècè tiqgo vdǿ:nò we sv̀ng yv̀ng bǿà nø̀, wego pǿ:nòe.

⁵ Weyv́ng rip rì tiqmaqí nø àngní sv̀ng, “Lòzècè go pawá èpǿnshòe?” a:lòe.

⁶ Yesuí vl bǿà dø àngníí àngmaq sv̀ng a:lò nìnø, àngmaqí dvzá:ròe.

⁷ Àngníí lòzècè go Yesu yv́ngsv̀ng shøla:tnà nø̀, àngmaq mvdv̀m bèlaqrì wego dv̀ngkùngø pvluaò dá:ngí, Àng zúnshìe.

⁸ Wekvt vsv̀ng mvmeí nø, àngmaq bèlaqrì tvrà yv̀nggùng pvluaòe. Dvgá tiqmaqí nø, weshvnvng rvgaq kèní pènàm ra:tnò nø̀ pvluaòe.

⁹ Àng vzv̀ng di rì gø, mèpvng cà:nò rì gø, “Hosana! Kàngpè bø̀ng taqkèní di daqì pè Àng nø ìshøt ìgv̀n vle.

¹⁰ Tuq ra we nøngmaq vkop vkàng Dawiò móngdàn nø ìshøt ìgv̀n vle. Vháng vtvng yv́ng gø Hosana wa laq shvri:ngò,” wa nø̀ vkiqe.

¹¹ Yesu nø Yerusalem wamà sv̀ng tuq ráì nø̀, Noqngø̀m Tø̀ngnø wáng sv̀ng gòngá:mì. Gùrhøm shvngbe sv̀ng À:ngí yà:ngò dá:ngí, dørø̀m høqa:tnà rvt coqcv́n Tiqcé Vnípè nv̀ng tiqdø Àng nø Betani mvrìng sv̀ng dìá:mì.

Nv̀mgwè tø̀ng mvtá:nò we

¹² Mèpvng ni àngmaq nø Betani mvrìng kèní dì ráì dvgvp, Yesu svríshì lú:ngì.

¹³ Vrúm yv́ngø àngcvp pǿng we nv̀mgwè tiqtø̀ng sv̀ng yv̀ng bǿà nø̀, wetø̀ng taq àngshí tiqchv̀ngchv̀ng zíe má wa yv́ng nv̀ng die. Weyv́ng tuqá:mì nìnø, nv̀mgwè zí rvtø̀ mø̀í rvt, àngcvp wa mø̀íni pà gø mvyà:ngò.

¹⁴ Wervt À:ngí wetø̀ng sv̀ng, “Akvt kèní kukaq tiqgǿí gø nà yv́ngkèní àngshí v́m laq mvlún dá:rò,” a:lòe. Wekà nø Àng coqcv́nrìí gø táòe.

Noqngø̀m Tø̀ngnø dvshè:rò we

¹⁵ Àngmaq Yerusalem yv́ng tuq ráì nìnø, Yesu nø Noqngø̀m Tø̀ngnø wáng vdòng sv̀ng gòng nø̀, weyv́ng nvmshì rì wvnshì rì sv̀ng lù:ngò nø̀, gv̀msùng cheshì rì shvbóy nv̀ng kaø nvmke rì àngmaq rúngdvngrì ngaqaòe.

¹⁶ Vrá, À:ngí Noqngø̀m Tø̀ngnø wáng vdòngdòng kagǿ sv̀ng gø pà dvrè gø shvle màdvzá:rò.

¹⁷ À:ngí àngmaq sv̀ng shvngø:tnò nø̀, “‘Ngà chø̀m nø vsv̀ng dvcì í dv́ngte dvpvt júrøt chø̀m, wa tǿ ràe,’ wa nø̀ vru yà:ngà. Íwe nàmaqí nø, yachø̀m sv̀ng ‘ tølv́mshúrì àngdv̀ng’ lè í dèzv́r bǿshà,” a:lòe.

¹⁸ Vsv̀ng loksokrì nø, Yesu shvngøtkà sv̀ng dádv̀ng wa rvt shvrúngshú vjìrì nv̀ng dvrá svrarì nø Àng sv̀ng svree. Wervt àngmaqí Àng shvngøtkà tá bǿà nìnø, Àng sv̀ng shvtlv́m tvrà láòe.

¹⁹ Nv̀m dø ráì ke Yesu nv̀ng coqcv́nrì nø wamà kèní búngá:mì.

Kv́mnø:tní wá dá:ngò we

²⁰ Mèpvng shá:ngí, àngmaq di dvgvp, nv̀mgwè tø̀ng nø àngrø kèní shúnga:pmì we àngmaqí yv̀ng bǿà.

²¹ Wekvt Piterí dvdvm rǿn daqà nø̀ Àng sv̀ng, “Rabiá, ku! Nàí mètv́napmà nv̀mgwè tø̀ng nø shúnga:pmì,” a:lòe.

²² Yesuí àngmaq sv̀ng, “Gvray kaq èkv́mnø̀ng.

²³ Ngàí jø̀ngjǿng vla:tnìni, nøt màdvtiqshìshaq, kadø shø̀:nò ni wedøni í rae, wa kv́m we kagǿ í nìgø, ya shigùng sv̀ng, ‘Nàcílshì nø̀, tìnúngmè vdòng sv̀ng dègupshìvm,’ a:lò nìnø à:ngí shø̀n bǿò døni bǿna lú:ngòe.

²⁴ Wervtnø̀ Ngàí vla:tnìni, nàmaqí vjú èrøtnø̀ng kvt, èrøtshìnø̀ng dv́ngte pà í nìgø lún bǿngà, wa èkv́mnø̀ng kèní nø èlún daqnø̀nge.

²⁵ Nàmaq èripnø̀ng sórí vjú èrøtnø̀ng dvgvp nàmaq nø vsv̀ng tiqgǿgǿ nv̀ng nøt nàyv̀ngkénø̀ng we vl nìnø, èchutnanø̀ng. Wekvt wa muqlàng taqlap vl we nàmaq Nvpèí gø nàmaq mvràrì èchutna daqnø̀nge.

²⁶ [Íwe, nàmaqí vsv̀ng mvrà mèchutnanø̀ng nìnø, muqlàng taqlap vl we nàmaq Nvpèí gø, nàmaq mvràrì mèchutna daqnø̀ng],” a:lòe.

Yesuò vmíng vkv́ng dang rø:tnò we

²⁷ Wemèpvng àngmaq nø vrá tiqkvt Yerusalem sv̀ng tuq ráì. Yesu nø Noqngø̀m Tø̀ngnø wáng vdòng vriqò dvgvp, shvrúngshú vjìrì, dvrá svrarì nv̀ng shaqré shaqtvngrì Àng yv́ng dì ráì.

²⁸ Àngmaqí, “Nàí èwàò we yadv́ng pv̀n nø pà vmíng kèní èwàò we í má? Yarì walv́m kagǿí Nà sv̀ng vmíng èzie má?” a:lòe.

²⁹ Yesuí àngmaq sv̀ng, “Ngàí gø nàmaq sv̀ng tiqkà røtna:tnìni, nàtv́nshà. Wekvt wa yadv́ng pv̀n nø kapà vmíng kèní Ngàí wv̀ngò we nàmaq sv̀ng gø dvtádv̀ng íe.

³⁰ Yohaní tìløpmaò lòng nø muqlàng kèní í má? Mø̀íni vsv̀ng kèní í má? Nàtv́nshà,” a:lòe.

³¹ Wekvt àngmaq nø àngmaq, “‘Muqlàng kèní íe,’ a:lì nìnø, À:ngí nøngmaq sv̀ng, ‘Wedø íni, àng sv̀ng nàmaq pàwá mèkv́mnø̀ng?’ dvwa rani.

³² ‘Vsv̀ng kèní íe,’ a:lì nìnø, màdu,” wa vrùnge. Pàwá wani Tìløp Yohan nø kàdvtutshú mvdø̀ng tiqpè í we sv̀ng vsv̀ng shvngbe kv́m rvtnø̀, àngmaq sv̀ng svree.

³³ Wervt Yesu sv̀ng àngmaqí, “Nøngmaqí mvsháì,” wa vtá:nòe. Yesuí, “Íni pà vmíng kèní yadv́ng pv̀n wv̀ngò we Ngàí gø màdvtáì,” a:lòe.