Linge 98 - Ghari

God Aia e Tagaovi Kaputia Na Barangengo

¹ !Lingena na linge vaolu vania na Taovia; rongona aia nogo e naugira na omea loki! Tana nina mana segeni mi tana susuligana tabu aia e gini managana.

² Na Taovia nogo e katevulagia laka e managana; me sauvulagia na susuligana loki vanigira na puku sui.

³ E manalinogoa nina veke e nauvanigira na toga ni Israel ma nina galuve vanigira e totu kalavata me vô ke oli. Migira na tinoni pipi tana nauna sui ara reia kalina e managana nida God.

⁴ !Igamu sui tana barangengo popono, kamu gudato vania na Taovia tana magemage; kamu tsonikaea me ke tangidato nimui linge na magemage!

⁵ !Linge na tsonikaeana na Taovia! !Taigira na itai tatangi!

⁶ Uvigira na riga ma kara tangi na tavuli, gudato tana mage vania na Taovia aia nogo nida taovia tsapakae.

⁷ !Igoe na tasi loki, me pipi sui lakalaka na omea ara mauri i laomu, kamu viri leleo takuti; migoe na barangengo, migira na tinoni sui ara mauri i laomu kamu lilinge!

⁸ Igamu na ko loki sui kamu tapotapo; migamu sui na tetena, kamu linge kolu tana magemage i matana na Taovia,

⁹ rongona aia e mai nogo na pedeana na barangengo. Maia sauba ke pedegira na tinoni sui tana barangengo tana pedegoto ma na pedelaka.