Linge 16 - Ghari

Na Nonginongi na Noruana God

¹ Au norugo igoe God ko reitutuguau. Minau kau totu ravi dou i konimu.

² Au goko vania na Taovia mau tsaria, “Igoe nogo niqu Taovia. Ma na omea dou sui inau au tamanina ara talumai sui i konimu igoe.”

³ Ara doulaka saikesa igira ara totukakai i konina na Taovia. Me gini mage loki na tobaqu inau na totu koluaqira na tinoni vaga gira.

⁴ Migira moa ara viri ulo bâ i koniqira na god tavosi mara alomai vanigira segeni danga na rota. Minau sauba ke utu saikesa vaniau kau sangapata kolugira tana niqira savori kodoputsa; me sauba e utu goto kau samasama vanigira niqira god.

⁵ Taovia, igoe saikesa moa gaqu tuva, mo tusuvaniau na omea sui au kilia vania na mauriqu. Migira na omea sui kara labamai vaniau i muri ara totu sui nogo tana limamu igoe.

⁶ !Ara dou sosongo nomoa nimu vangalaka gira igoe o sauvaniau! !Eo, ara dou manana nomoa!

⁷ Au tsonikaego Taovia, rongona igoe o mataliau dou. Me atsa moa ti tana bongi migoe o tagaovia na papadaqu.

⁸ Au pada sailaginigo moa Taovia. Igoe o totu varangisiau, me tagara goto sa omea tangomana ke sekoliau.

⁹ Maia nogoria na rongona ti e gini dou sosongo na tobaqu mau gini magemage, mau totu raviravi dou i konimu igoe.

¹⁰ Rongona igoe nogo o dilaau mau gini savi tania na susuligana na mate. Me sauba e utu vanigo ko tsonilea vania na verana na mate kesa aia e totukakai i konimu.

¹¹ Igoe sauba ko tusuvulagi vaniau na sautu e vano kalea na mauri. Igoe o totu varangisiau me gini danga tovu niqu magemage, ma niqu mage na totu i matamu igoe e utu goto ke sui.