Linge 146 - Ghari

Na Tsonikaeana God Aia na Vagamauri

¹ !Tsonikaea na Taovia! !Igoe na tidaoqu ko tsonikaea na Taovia!

² Sauba kau tsonikaea tana mauriqu popono; sauba kau linge vania niqu God pipi dani tana mauriqu popono.

³ Laka na vataraginiana nimui vainoru i koniqira gamui ida ni lao eni, rongona e tau tangomana sa tinoni lê ke maurisigamu.

⁴ Kalina kara mate, kara visutugua tana kao; mi tana dani ia pipi sui niqira vorogoko sauba kara sui lê.

⁵ Ke mage na tinoni aia e norua nina God a Jakob ke sangâ, me tsotsovata moa i konina na Taovia nina God,

⁶ aia e aqosia na baragata ma na barangengo ma na tasi, me pipi sui na omea i laoqira. Na Taovia e manaligira pipi sui nina veke,

⁷ me saua na pedegoto vanigira igira ara bingi sekoligira, me palagira igira ara vitoa. Na Taovia e nusigira igira ara totu tana vale sosori,

⁸ me naua mara moro na koko. Maia e tatatuugira igira ara puka; me reingaogira nina tinoni igira e goto niqira sasaga.

⁹ Na Taovia e reitutugugira igira na veratavosi ara mai totu i verada; me sangagira na daki tinamate kolu daleqira, me pualasia niqira vorogoko igira na vanga tsutsukibo.

¹⁰ Na Taovia aia nogo e taovia tsapakae saviliu. Nimui God nogo igamu na Sion sauba ke tagao saviliu na dani ma na dani. !Tsonikaea na Taovia!