Linge 11 - Ghari

Na Vataragi Kakai i Konina na Taovia

¹ Inau au norukakaia na Taovia rongona aia ke ravisiau. Mamu bule rago igamu ti amu tsarivaganana vaniau iani, “Ko lovoligi bâ tana vungavunga vaga kesa na manu,

² rongona igira na tinoni vanga tsutsukibo ara tû tana rodona, mara nari manogatinogoa niqira parige mara matania niqira pipili, rongona kara vanasiginigira na tinoni dou.

³ Me tau saikesa tangomana vania sa tinoni dou ke naua sa omea kalina ara taveo lê vaganana na omea sui lakalaka.”

⁴ Ma na Taovia aia e totu rago i laona nina valetabu; me tamanina nina sasana na totu i baragata. E morosigira na tinoni pipi tana nauna sui me donaginia na omea sui igira ara naua.

⁵ Aia e vilekegira na douna ma na sekona tana atsa; me reisavi sosongoligira igira ara dona moa na sekoli tinoni.

⁶ Maia nogoria te aia e naua me gini tumu tsunamai na madaova gagâ ma na papasa mila iruiru i koniqira na tinoni vanga tsutsukibo; me kedeginigira na guguri papara.

⁷ Na Taovia aia e gotolaka me reingaoa na omea e dou me goto; migira ara naudou vaganana ia sauba kara totu sailagi i matana aia.