2 Samuel 1 - Ghari

A David e Rongomia na Mateana a Saul

¹ Mi murina na mateana a Saul, maia David e visumai talu tana vailabu i tana e tangomana i koniqira na Amalek, me totu i Siklag i laona e ruka na dani.

² Mi tana dani ngana, me kesa na mane e maitsau i tana, talu tana nauna i tana e totu nina valepolo a Saul. Maia e ratsia na polona, me moloa na papasa i lovana gana ke gini sauvulagia laka aia e melu sosongo. Me ba laba i konina a David, me tsuporu tsuna tana kao i matana tana kukuni.

³ Maia David e veisua na mane ia, “?Laka iava vaga o talumai igoe?” Maia e tsarivania, “Inau au tsogoligi tania niqira nauna na tototu igira na Israel.”

⁴ Ma David e tsaria, “?Laka nagua e laba? Ko turupatumai vaniau.” Maia e gokovisu vania a David me tsaria, “Nimami mane vaumate ara viri tsogo tania na vailabu, mara danga sosongo na vidamami ara mate. Mi kaira goto a Saul ma Jonatan na dalena ara ka mate goto.”

⁵ Ma David e veisuâ, “?E koegua vaga ti o dona igoe laka ara ka mate kaira a Saul ma Jonatan?”

⁶ Ma na mane e gokovisu me tsaria, “Inau au totu nogo i kelana na Vungavunga Gilboa, mau reia a Saul e gini tsotso varara nina bao, mau reigotoa laka igira na gala ara sage tana ose kolugira niqira terê ara maimai varangi nogo i konina.

⁷ Mi muri, maia Saul e pilomai me reiau inau, me soaau. Minau au tsarivania, ‘Eo, taovia.’

⁸ Maia e veisua laka asei inau, minau au tsarivania laka inau kesa na Amalek.

⁹ Mi tana maia e tsarivaniau, ‘!Ko mai ieni mo ko labumatesiau! Inau au boka seko sosongo nogo, me varangi nogo kau mate.’

¹⁰ Minau au tû mau ba varangi i konina mau labumatesia, rongona au dona nogo laka sauba ke puka lê moa me ke mate. Mi muri minau au adiligia nina kepi taovia i lovana ma na bore i limana, mau adimaigira vanigo taovia.”

¹¹ Ma David e ratsia na polona tana melu loki, migira sui lakalaka goto nina mane ara totu kolua ara nauvaganana goto.

¹² Mara melu mara tangitangi mara tsoni vitoaqira segeni poi tsau tana ngulavi tana ka rongoqira a Saul ma Jonatan, mi tana rongona goto ara danga sosongo na Israel, igira nina tinoni nogo na Taovia, ara mate tana vailabu.

¹³ Ma David e veisuâ na borau aia e aditurupatu mai vania, “?Laka na ava vaga igoe?” Maia e gokovisu vania me tsaria, “Inau na Amalek, mau totu moa i veramu igoe.”

¹⁴ Ma David e veisuagotoa, “?Egua vaga igoe ti o tau matagu na labumatesiana na taovia tsapakae aia nogo na Taovia e vili segeni nogoa?”

¹⁵ Mi tana, ma David e soamaia kesa nina mane me ketsalia, “!Ko labumatesia!” Ma na mane ia e labua na Amalek ia me mate,

¹⁶ ma David e tsarivania na Amalek, “Igoe segenimu nogo o tsukia te e laba vanigo na omea iani. Eo, igoe nogo o kede segenimu kalina o tsarivulagia laka igoe nogo o labumatesia na taovia tsapakae, aia nogo na Taovia e vili segeni nogoa.”

A David e Tangisikaira a Saul ma Jonatan

¹⁷ Ma David e teâ kesa na linge na tangitangi tana ka rongoqira a Saul ma Jonatan na dalena,

¹⁸ me moloketsa kara sasaniginigira na tinoni sui tana Juda. Ma na linge iani ara maretsunanogoa tana Nina Papi a Jasar.

¹⁹ “!I kelana na tetena ni Israel ara ka ba mate kaira gada ida loki! !Mara puka lê sui igira nida mane vaumate malagai!

²⁰ Kamu laka na ba tsarivulagiana tana vera ni Gat, se tana sautu loki i Askelon. Kara tau gini mage igira na daki ni Pilistia; ma kara tau magemage loki na daleqira daki igira na ponotoba.

²¹ “!Ke tau goto tumu sa usa se ke puka sa kolobu i kelaqira na tetena ni Gilboa; me ke tau goto vovo dato sa omea i laona nina uta! Rongona niqira tako igira na malagai ara tsaro lê tana vangamâ; mara tau kiki nogo ninaginia na oela nina tako a Saul.

²² Nina pipili a Jonatan e vo savi, ma nina isi a Saul e tau goto gaea kesa, ara ka labu pukaligira igira na mane susuliga, mara ka matesigira na gala.

²³ “A Saul ma Jonatan, ara padalokikaira mara galuvekaira sosongo; kaira ara ka totusai tana mauri, mara ka totusai goto tana mate; kaira ara ka tsaku liusigira bâ na manuloki, mara ka susuliga liusigira bâ na laeone.

²⁴ “!Igamu na daki ni Israel kamu tangisia a Saul! Aia e sageli vanigamu na polo sagesage tsitsi-marara loki matena me inilauginigamu na vatu angaanga ma na qolumila.

²⁵ “Igira na mane vaumate malagai ara puka nogo, ara mate sui tana vailabu. Maia goto a Jonatan e tsaro mate lê tana tetena.

²⁶ “!Au ngangaisi sosongoligo igoe Jonatan na kulaqu; au padaloki sosongoligo igoe! Migoe o galuve sosongoliau, loki liusia bâ niqira galuve na daki.

²⁷ “Igira na mane vaumate malagai ara puka nogo, ma gaqira sagore ara viri tsaro bamai lê.”