फिलेमोन 1 - Garhwaliपौलुस को सलाम 1 हे मेरा प्यार भै फिलेमोन, मि पौलुस ईं चिठ्ठी तैं हमरा भै तीमुथियुस का दगड़ा मा मिली के त्वे खुणि लिखणु छौं जु कि हमरा दगड़ा मा सेवा को काम करदु। मेरा दगड़्या, मि इख यीशु मसीह की सेवा का बानो कैदी होयुं छौं, 2 अर मि या चिठ्ठी हमरि बिस्वासी बैंण अफफिया, अर हमरा दगड़ा मा सिपै की तरौं काम करण वळा अरखिप्पुस भै खुणि भि लिखणु छौं। हे मेरा भै, या चिठ्ठी तुमरा घौर मा जमा होण वळा बिस्वासी समुदाय का लोगु खुणि भि च। 3 अर मि इन प्रार्थना करदु कि तुम सभ्यों तैं परमेस्वर जु कि हमरु पिता च वेकी अर प्रभु यीशु मसीह की तरफा बटि किरपा अर शान्ति मिलदी रौ। धन्यवाद अर प्रार्थना 4 हे फिलेमोन भै, जब-जब मि प्रार्थना मा त्वेतै याद करदु, त मि हमेसा अपणा परमेस्वर तैं धन्यवाद देन्दु, 5 किलैकि मिन तेरा वे बिस्वास का बारा मा सुणी जु तू प्रभु यीशु मसीह पर करदी, अर वे प्यार का बारा मा भि सुणी जु तू बिस्वासी लोगु से करदी। 6 अर मि इन प्रार्थना करदु, कि बिस्वास की ज्वा संगत तू दुसरा लोगु का दगड़ा मा रखदी, वेका द्वारा त्वेतै या बात भौत अच्छे से पता चलु कि यीशु मसीह पर बिस्वास करण से हम लोगु तैं क्या-क्या अच्छी आसीस मिलदिन। 7 हे मेरा दगड़्या, तेरा प्यार का सभौ तैं देखि के मितैं बड़ी तसली अर खुशी मिलदी। किलैकि तेरा द्वारा बिस्वासी लोगु का मन भौत खुश ह्वेनि। उनेसिमुस खुणि पौलुस कि फिलेमोन से बिन्ती 8 हे फिलेमोन भै, मि यीशु मसीह को छौं इलै मि त्वेतै बड़ी हिम्मत से आज्ञा दे सकदु, कि त्वेतै क्या-क्या करण चयेणु। 9 मेरा प्यारा भै, मि त्वेसे भौत प्यार करदु इलै मि त्वेसे बिन्ती करदु कि मि पौलुस जु कि अब बुढ्या ह्वे ग्यों, मि यीशु मसीह का खातिर इख जेलखाना मा छौं। 10 मि त्वेसे तेरा नौकर उनेसिमुस खुणि बिन्ती करदु, जु कि बिस्वास मा अब मेरा नौना का जन च। अर कैद का ये बगत मा ही उ मेरी वजै से यीशु मसीह पर बिस्वास करण वळु बणि। अर आत्मिक बाटा पर वेतैं चलौणु खुणि मि वेको आत्मिक बुबा का जन बणि ग्यों। 11 पैलि त उ तेरा कै काम को नि छौ, मगर अब उ त्वे खुणि अर मि खुणि बड़ा काम को मनखि ह्वे गै। 12 अर अब मि उनेसिमुस तैं तेरा पास भेजणु छौं, हाँ, वेतैं जु कि मेरा कलेजा को कतर च। 13 अर मि इख शुभ समाचार का खातिर संगुळों मा बन्धयूं छौं, इलै मि वेतैं अपणा पास ही रखण चान्दु छौ, ताकि उ तेरा बदला मा मेरी मदद कनु रौ। 14 मगर मि तेरी इजाजत का बगैर कुछ नि करण चान्दु, ताकि भलै का जु काम तू मि खुणि करदी ऊ जोर-जबरदस्ती से ना हो, बल्किन मा तेरा द्वारा बड़ी खुशी से किये जा। 15 अर क्या पता इलै ही उनेसिमुस त्वेसे कुछ बगत तक दूर ह्वे गै रे हो, ताकि अब उ हमेसा खुणि तेरु ह्वे जौ। 16 पर अब वु एक गुलाम नि च बल्किन मा गुलाम से भि कई बढी के च, किलैकि अब उ एक बिस्वासी भै च जै बटि मि भौत प्यार करदु। पर अब वु त्वे खुणि जादा लाडलु होलु, किलैकि अब वु त्वे खुणि एक गुलाम का दगड़ा-दगड़ि एक बिस्वासी भै भि च। 17 इलै अगर जु तू मितैं अपणु खास दगड़्या समझदी, त उनेसिमुस तैं भि उन्नि स्वीकार कैर जन तिन मितैं स्वीकार कैरी छौ। 18 अर अगर जु वेन तेरु कुछ नुकसान कैरी होलु, या तेरु कुछ देण होलु, त उ सब कुछ मेरा खाता मा लिखी दे। 19 अर मि पौलुस खुद अपणा हाथळ त्वे खुणि लिखणु छौं, कि मि ऐके सब कुछ चुकै द्यूलु। अर मितैं यू याद दिलौण कि कुई जरुरत नि च कि तेरु पराण ही मेरु करजदार च। 20 हे मेरा भै, सच्चि मा हम दुईया का दुई प्रभु यीशु मसीह का छां, इलै फैदे की बात या च कि तू उनेसिमुस तैं स्वीकार कैर। अर अगर तू वेतैं स्वीकार करली, त इन कैरिके तू मेरी जिकुड़ी तैं खुश कैरी दिली। 21 अर मि या चिठ्ठी ये यकीन से लिखणु छौं, कि तू मेरी बात तैं जरुर मणिली। अर मि यू भि जणदु छौं, कि जु कुछ भि मि लिखणु छौं तू वेसे भि जादा बढी के करली। 22 अर यों सब बातों का दगड़ा-दगड़ि मि त्वेसे कुछ और बात भि बोन्न चान्दु, कि तू मि खुणि एक घौर को इंतजाम कैर, किलैकि मितैं ईं बात कि आस च कि ज्वा प्रार्थना तुम लोग मि खुणि करद्यां, वींतैं पिता परमेस्वर जरुर सुणलु अर जल्दी ही मि तुमरा इख ऐ जौलु। आखिरी सलाम 23 अर इपफ्रास भै जु कि मेरा दगड़ा मा यीशु मसीह का खातिर जेलखाना मा च, त्वे खुणि सलाम बोन्नु च। 24 अर मेरा दगड़ा मा सेवा को काम करण वळा मरकुस भै अर वेका दगड़ा-दगड़ि अरिस्तर्खुस, देमास अर लूका भै भि त्वे खुणि सलाम बोन्ना छिन। 25 हे मेरा भै-बैंणो, मि इन प्रार्थना करदु, कि हमरा प्रभु यीशु मसीह की किरपा तुम सभ्यों पर होणी रौ। आमीन। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.