खास चेलों 12 - Garhwali

हेरोदेस अग्रिप्पा को जुलम

¹ अर ऊं दिनों मा राजा हेरोदेस अग्रिप्पा न बिस्वासी समुदाय का कुछ लोगु तैं सतौण खुणि ऊंतैं जेलखाना मा डलण शुरु कैरी दिनी।

² अर वेन यूहन्‍ना का भै याकूब तैं तलवार से मरवै दिनी।

³ अर जब वेतैं पता चलि, कि ईं बात से यहूदी लोग भौत खुश होणा छिन, त वेन पतरस तैं भि पकड़वै दिनी। अर यू सब अखमीरी रुट्‍टी का त्योवार का दिनों मा ह्‍वे।

⁴ अर राजा हेरोदेस अग्रिप्पा न पतरस तैं पकड़वै के जेलखाना मा बन्द करवै दिनी। अर वेकी निगराणी करणु खुणि सोला पैरादारों तैं ठैरै, जु कि चार दलो मा बंटयां छा। अर वेकी इन इच्छा छै कि उ पतरस तैं त्योवार का दिनों का बाद लोगु का समणि पेस कैरो, इलै वेन पतरस तैं जेलखाना मा ही बन्द रखी।

⁵ मगर बिस्वासी समुदाय का लोग पतरस खुणि परमेस्वर बटि मन लगै प्रार्थना कना छा।

पतरस तैं जेलखाना बटि छुड़ौण

⁶ अर जब राजा हेरोदेस अग्रिप्पा पतरस तैं आम लोगु का समणि लाण वळु छौ वीं ही रात पतरस दुई सिपै का बीच मा सिणु छौ अर वेतैं दुई संगुळोन बन्धयूं छौ। अर पैरेदार जेलखाना का द्‍वार पर पैरा दिणा छा।

⁷ तबरि वीं कुठड़ी मा एक स्वर्गदूत उख खड़ु ह्‍वे, अर एक बड़ु उज्याळु चमकी। अर ये स्वर्गदूत न पतरस पर हाथ लगै के वेतैं निन्द बटि बिंजाळी। तब स्वर्गदूत न वेकू बोलि, “पतरस उठ, चल जल्दी कैर।” अर संगुळा वेका हाथों बटि अफि खुलि के भ्वीं पोड़ि गैनी।

⁸ अर वेन वेकू इन भि बोलि, “सुण, अपणी कमर बान्ध अर अपणा जुता पैर।” अर पतरस न उन्‍नि कैरी, फिर स्वर्गदूत न वेकू इन भि बोलि, “अपणा कपड़ा पैरि के मेरा पिछनै अऽ।”

⁹ अर पतरस वेका पिछनै-पिछनै जेलखाना बटि भैर ऐ गै, मगर वेतैं इन पता नि चलि कि वेका दगड़ा जु कुछ भि स्वर्गदूत का द्‍वारा किये जाणु च वु सब कुछ सच्‍च च, बल्किन मा पतरस इन समझणु छौ कि उ अभि भि दरसन ही दिखणु च।

¹⁰ अर ऊंन पैला पैरादारों तैं, अर दुसरा पैरादारों तैं पार कैरी अर एक लुवा गेट का पास पौंछिनी, जु नगर की तरफा लि जान्दु छौ अर उ गेट ऊं खुणि अफि खुलि गै। अर तब ऊ दुईया का दुई उख बटि चलि गैनी, अर जब ऊ एक सड़क बटि ह्‍वेके गैनी कि तुरन्त स्वर्गदूत वेतैं छोड़ि के चलि गै।

¹¹ अर जब पतरस तैं सुद ऐ त वेन बोलि, “अब मितैं सच्‍चि मा पता चलि गै, कि प्रभु न अपणा स्वर्गदूत तैं भेजि के मितैं हेरोदेस अग्रिप्पा बटि बचै अर ऊं सब बातों से भि जौं बातों की इच्छा यहूदी लोग कना छा।”

¹² अर सब कुछ बिंगण का बाद उ मरियम का घौर चलि गै। अर या मरियम यूहन्‍ना की माँ छै। अर यू यूहन्‍ना वु च जैकू मरकुस भि बुले जान्दु। अर वींका घौर मा भौत सरा लोग जमा ह्‍वेके प्रार्थना कना छा।

¹³ अर जब वेन द्‍वार तैं खखटै, त द्‍वार पर दिखणु खुणि रुदे नौ की एक नौकराणि ऐ।

¹⁴ मगर जब वींन पतरस की आवाज सुणी, त पछ्याण गै कि यू त पतरस च अर इथगा जादा खुश ह्‍वे गै, कि वींन द्‍वार भि नि खोली अर भागी के वापिस गै, अर बोलि, “सुणा, पतरस भै द्‍वार पर खड़ु होयुं च।”

¹⁵ अर ऊंन वींकू बोलि, “तू बौल्या छैई क्या?” पर फिर भि वा अपणी बात पर अड़ी रै, सच्‍चि मा उ पतरस ही च। तब ऊंन बोलि, “अरे वु वेकी हिफाजत करण वळु स्वर्गदूत होलु।”

¹⁶ अर पतरस द्‍वार तैं तभि भि खखटाणु रै। अर जब ऊंन द्‍वार खोली, त वेतैं देखि के हकदक रै गैनी।

¹⁷ तब पतरस न ऊंतैं चुप रौण खुणि हाथळ इसारा कैरी, अर वेन सभ्यों तैं बतै कि प्रभु न वेतैं कनकै जेलखाना बटि भैर निकाळि। अर वेन ऊंकू बोलि, “यू सब बात याकूब अर दुसरा बिस्वासी भै-बैंणो तैं भि बतै दियां।” तब उ उख बटि निकळि के दुसरि जगा कू चलि गै।

¹⁸ अर जब सुबेर ह्‍वे त सिपयों मा खळबळी मची गै कि आखिर मा पतरस कख गै होलु?

¹⁹ अर राजा हेरोदेस अग्रिप्पा न अपणा सिपयों का द्‍वारा वेकी खोज करवै, पर पतरस को कुछ भि अता-पता नि चलि, तब हेरोदेस न ऊं पैरादारों की पूछताछ कैरिके ऊंतैं मरवौण को हुकम दिनी। अर कुछ बगत का बाद हेरोदेस यहूदिया मुलक बटि निकळि के कैसरिया नगर मा रौण लगि गै।

हेरोदेस अग्रिप्पा की मौत

²⁰ अर राजा हेरोदेस अग्रिप्पा सूर अर सैदा नगर का लोगु पर भौत गुस्सा करदु छौ। तब दुई जगा का कुछ लोग एक मन ह्‍वेके राजा से मिलणु कू ऐनी, मगर पैलि ऊ राजा का करमचारी बलास्तुस तैं मनौण लगि गैनी अर वेसे बिन्ती कैरी, कि हमरु राजा का दगड़ा मा समझौता करवै द्‍या। अर इन ऊंन इलै कैरी, किलैकि राजा हेरोदेस का मुलक बटि ऊंका मुलक खुणि रासन-पाणि औन्दु छौ।

²¹ अर एक चुण्यां दिन पर राजा हेरोदेस अग्रिप्पा न अपणा राजा वळा कपड़ा पैरिनी, अर राजगद्‍दी पर बैठि अर लोगु तैं भासण देण लगि गै।

²² अर भीड़ का लोगु न चिल्‍लै-चिल्‍लै के बोलि, “या मनखि की ना, बल्किन मा एक द्‍यबता की आवाज च।”

²³ अर देखा, प्रभु को एक स्वर्गदूत तुरन्त ऐ, अर वे पर एक बिमारि डाल दिनी, अर वेका सरील पर कीड़ा पोड़ि गैनी ज्यां की वजै से वेकी मौत ह्‍वे गै। अर यू सब त इलै ह्‍वे किलैकि राजा हेरोदेस अग्रिप्पा न परमेस्वर तैं तारीफ देण की वजै लोगु बटि खुद की तारीफ करवै।

²⁴ अर परमेस्वर का वचन को भि जादा परचार किये गै, अर लोगु का बीच मा फैलदी गै।

²⁵ अर जब बरनबास अर शाऊल न इकट्‍ठा कियां दान तैं यरूशलेम का बिस्वासी समुदाय का अध्यक्षों मा देण को काम पूरु कैरी दिनी, त जाण दौं वु यूहन्‍ना तैं जैकू मरकुस भि बुल्दिन वेतैं अफ दगड़ा मा लि गै।