Zaburi 114 - Kifuliiru

Ku kyanya Abahisiraheeri bakalyoka i Miisiri

¹ Abahisiraheeri, beene Yakobo, bakalyoka mu kihugo kyeꞌMiisiri, mu bandu beꞌgindi-gindi ndeto.

² Haaho, ikihugo kyeꞌBuyuda hanayiji ba handu hataluule ha Nahano. Ee! Akatondeera ukutwala mu kihugo kyeꞌHisiraheeri.

³ Inyaaja Ndukula, iri ikabonaga kwo bagweti bagayija, yanayami yeguuka, gira balenge. Kiri noꞌlwiji Yorodaani, nalwo lwanagalukira inyuma.

⁴ Imigazi yanakizi simbuka-simbuka nga bipanga. Noꞌtugangazi twanakizi ganga-ganga nga byanabuzi.

⁵ E nyaaja, kituma kiki ukayami yeguuka? Na naawe, e Yorodaani, kituma kiki ukagalukiraga inyuma?

⁶ E migazi, kituma kiki mwâli kizi simbuka-simbuka nga bipanga? E tugangazi, kituma kiki mwâli kizi ganga-ganga nga byanabuzi?

⁷ E kihugo, ukizi juguma imbere lya Nahano. Ukizi juguma imbere lya Rurema wa Yakobo.

⁸ Si ye kahindula ulwala lube kiziba! Kundu lwâli lwala lukomu, haliko lwanayiji shyoka mwoꞌtudota.