मरकुस 8 - जीवन को च्यानणो (सेकावाटी नया नियम की पोथ्या)

च्यार झार मिनखा को पेट भर्यो

¹ बा दिना म एक बार ओज्यु ईसु कनै घणीसारी भीड़ भेळी होई। अर बाकन खाबा ताँई क्युंई कोनी हो। इ बजेऊँ ईसु आपका चेलानै बुलायो अर बानै बोल्यो,

² “मनै आपै तरस आर्यो ह क्युं क अ मिनख तीन दिनाऊँ मेरै सागै हीं अर आकै कनै खाबा ताँई क्युंई कोनी।

³ अर म आनै भूखानैई घरा भेजूँ तो अ गेला मई आखता होर बठैई गोडा टेक देसी। क्युं क कई तो बोळी दूरऊँ आएड़ा हीं।”

⁴ चेला ईसुनै बोल्या, “इ उजाड़ म म्हें रोटी कठैऊँ ल्यावां, जिऊँ आको पेट भर सकां।”

⁵ ईसु बाऊँ बुज्यो, “थारै कनै कत्ती रोट्या ह?” बे बोल्या, “म्हारै कनै सात रोट्या ह।”

⁶ ईसु भीड़नै हुकम दिओ थे पंगत बणार जमीन प बेठ ज्याओ। अर इकै पाछै ईसु बा सात रोट्यानै हात म लेर परमेसरनै धनेवाद देर बा रोट्या का टुक कर-कर आपका चेलानै देतो गयो अर चेला भीड़नै परोसता गया।

⁷ बाकन थोड़ीसिक मछी बी ही ईसु बानै बी लिओ अर परमेसरनै धनेवाद देर चेलानै दिओ अर चेला मिनखानै देता गया।

⁸ बे सगळा खार धापगा अर चेला रोट्याऊँ भरेड़ा सात चोल्या बठैऊँ उठाया।

⁹ बठै करीब च्यार झार मिनख हा

¹⁰ इकै पाछै ईसु बानै बठैऊँ बिदा कर्यो। अर खुद आपका चेला क सागै न्याव म चढर दलमनूता दिसावर चलेगो।

फरिसी ईसुऊँ ईस्बर नगरी की सेलाणी माँगी

¹¹ फरिसी ईसु कनै जार बिऊँ जिदबा लाग्या क, तू सचमई परमेसर कानिऊँ भेजेड़ो ह जणा म्हानै ईस्बर नगरी की कोई सेलाणी दिखा। क्युं क बे ईसुनै फसाबो चावै हा।

¹² ईसु बाकी इ बातनै सुणर आपकी आत्मा म जोरऊँ हूँकार भर'र बाऊँ बोल्यो, “इ पिडी का लोग चमत्कार क्युं माँगै ह? आनै सचमई ईस्बर नगरी की कोई सेलाणी कोनी दिज्यासी।”

¹³ इकै पाछै बो बानै छोडर ओज्यु न्याव प चढगो अर दरिआव क परलै नाकै चलेगो।

फरिसीया अर हेरोद को खमिर

¹⁴ चेला आपकै सागै रोटी लेबो भूलगा पण बाकन न्याव म एकई रोटी ही अर इनै छोडर बाकन खाबा ताँई क्युंई कोनी हो।

¹⁵ ईसु बानै चेतार ओडायो क, “थे फरिसीया अर हेरोद का खमिरऊँ बचर रेहज्यो।”

¹⁶ चेला आपसरी म बतळाबा लाग्या क ईसु आ बात इ ताँई बोलै ह क्युं क आपणा कनै रोटी कोनी ह।

¹⁷ ईसु बाकी इ बातनै भापगो अर बाऊँ बोल्यो, “थे आपसरी म अंय्यां क्युं सोचो हो क म्हारै कनै खमिर हाळी रोटी कोनी ह? थारै हालबी क्युंई कोनी पलै पड़ी? थारी मती क्युं बंदगी।

¹⁸ थारै आँख्या होतासोता बी थानै कोनी सुजै? अर थारै कान होतासोता बी थानै कोनी सुणै? थानै क्युंई याद कोनी?

¹⁹ जनाड़ै म पाच झार मिनखानै पाच रोटीऊँ खुवायो हो बी दिन थे रोट्याऊँ भरेड़ा कत्ता चोल्या उठाया हा?” अर बे ईसुनै बोल्या, “बारा चोल्या।”

²⁰ “अर जनाड़ै म च्यार झार मिनखानै सात रोट्याऊँ धपायो हो बी दिन थे रोट्याऊँ भरेड़ा कत्ता चोल्या उठाया हा?” बे बोल्या, “सात चोल्या।”

²¹ ईसु बाऊँ बोल्यो, “थारै हालबी पलै कोनी पड़ी के?”

ईसु आँदा की आँख्या खोली

²² बे बेतसदा पुग्या अर बठै लोग एक आँदानै ईसु कनै ल्याया अर ईसुऊँ अरदास करता बोल्या बिपै हात धरद्‍यो।

²³ ईसु बी आँदा मिनख को हात पकड़्यो अर बिनै गाँव क बारनै लेगो। अर बिकी आँख्या म थूक्यो अर आपका हात बिपै धर्यो अर इकै पाछै बिनै बुज्यो, “तनै क्युं सुजै ह के?”

²⁴ बो बोल्यो, “मनै हाल तो धुन्दो-धुन्दो सुजै ह। मनै मिनख चालता दरख्ता की जंय्यां सुजीं हीं।”

²⁵ ईसु ओज्यु बिकी आँख्या प हात धर्यो जणा बो गोर कर देख्यो अर पाछै बिनै सूल सुजबा लाग्यो। अर बो सगळी चिजानै सूल ढंगऊँ देखबा लाग्यो।

²⁶ बो बिनै आ खेर घरा भेज्यो, “गाँव म मना जाए।”

पतरस बोल्यो ईसुई मसी ह

²⁷ ईसु अर बिकाळा चेला कैसरिया फलिपी गाँव म जार्या हा गेला म ईसु बानै बुज्यो लोग मनै काँई खेवीं हीं, “म कूण हूँ।”

²⁸ बे ईसुनै बोल्या, “कई तो थानै बतिस्मो देबाळो यहून्ना अर कई एलिआ अर कई परमेसर की खेबाळा मऊँ एक समजै ह।”

²⁹ ईसु बाऊँ बोल्यो, “थे मनै काँई समजो हो?” पतरस बोल्यो, “थे मसी हो।”

³⁰ ईसु बानै चेतायो क, “थे इ बात क बारां म कोईनैई मना खिज्यो।”

ईसु आपकी मोत क बारां म चेलानै बतायो

³¹ ईसु आपका चेलानै बताबा लाग्यो क मिनख का बेटानै दुख भोगणो ह। बो बोळो दुख भोगसी अर यहूदि नेता, परधान याजक अर सास्तरानै सीखाबाळा बिनै तजसी अर जिकै पाछै बो मार्यो जासी। पण बो तीसरा दिन मरेड़ा मऊँ जिज्यासी।

³² अंय्यां बोलर ईसु आपका चेलानै खुद क बारां म सगळी बाता सची-सची बता दिओ। जणा पतरस ईसुनै एकला म लेगो अर ईसुनै दकाल्यो।

³³ पण ईसु पाछो मुड़र आपका चेलानै देख्यो अर पतरसनै दकालर बोल्यो, “सेतान! मेरै कनैऊँ चल्योजा। तू परमेसर की जंय्यां कोनी सोचै पण मिनखा की जंय्यां सोचै ह।”

ईसु क पिछै चालबा को मतबल

³⁴ ईसु आपका चेला अर भीड़नै आपकै कनै बुलार बानै बोलबा लाग्यो, “ज कोई मेरै गेल आबो चावै ह बो खुदनै तज'र, आपकी सुळी उठार मेरै गेल होले।

³⁵ जखो बी आपको पिराण बचाबो चावै ह बो आपका पिराणा की हानी उठासी। अर जखो बी मेर ताँई अर चोखा समचार ताँई आपका पिराण तजसी, बो बिनै बचासी।

³⁶ कोई मिनख आपका पिराणा की हानी उठार सगळा जगतनै जीत ले जणा बिनै काँई फाईदो?

³⁷ कोई चिज क बदला म मिनख खुदका पिराण दे सकै ह के?”

³⁸ ईसु बाऊँ बोल्यो, “जखो बी इ कुकरमी अर सचा परमेसरनै कोनी ध्यार बाळी पिडी मऊँ, मेरूँ अर मेरा बचनाऊँ मुंडो फेरसी जणा मिनख को बेटो बी जद बो पबितर ईस्बर नगरी दुता क सागै अर आपका परम-पिता की मेमा म आसी बो बी बा मिनखाऊँ मुंडो फेर लेसी।”