मत्ती 3 - जीवन को च्यानणो (सेकावाटी नया नियम की पोथ्या)

यहून्ना बतिस्मो देबाळो

¹ जद ईसु नासरत नगरी म हो, बा दिना म यहूदिआ नगरी का उजाड़ म पाणी को बतिस्मो देबाळो यहून्ना आयो।

² अर आ खेर परचार कर्यो क, “थे थारा पापऊँ तौबा करो! क्युं क ईस्बर नगरी को राज सांकड़ै ह।”

³ ओ बोई मिनख ह जिकै बारां म यसाया परमेसर की खेबाळो खयो ह: “उजाड़ म एक हलकारो हेलो मारै ह, परबु ताँई गेलो बणाओ, अर बिको गेलो सिदो-सपाट करो।”

⁴ यहून्ना ऊँट क बाळाऊँ बणेड़ा गाबा पेरतो हो अर कमर प चमड़ा को पट्टो बांद्‍या करतो हो। बो टिड्या अर जंगली सहद खाया करतो हो।

⁵ यहूदिआ दिसावर, यरदन नदि क आस-पास की झघा का अर यरूसलेम नगरी का घणकराक मिनख बिकी सुणबा बिकन गया।

⁶ बे आपका पापनै मानर यरदन नदि म यहून्नाऊँ पाणी को बतिस्मो लिओ।

⁷ जद बो देख्यो क बोळासारा फरिसी अर सदुकी पाणी को बतिस्मो लेबा ताँई बिकन आर्या हीं, जणा बो बाऊँ बोल्यो, “अरै सपोलो, परमेसर की सजाऊँ थे बच सको हो इ बात क बारां म थानै कूण बता दिओ?

⁸ थारा करमाऊँ ओ बेरो पड़णो चाए क थे थारा हियानै पाप का गेलाऊँ फेर लिआ हो।

⁹ अर थे थारा हिया म अंय्यां मना सोचो क म्हारो बाप अब्राहम ह इ ताँई परमेसर म्हानै कोनी दंडसी; क्युं क म थारूँ बोलुँ हूँ क परमेसर आ भाठाऊँ बी अब्राहम ताँई टाबर पैदा कर सकै ह।

¹⁰ इब कुहाड़ो दरख्त की जड़्या प रखेड़ो ह, इ ताँई जखो दरख्त चोखो फळ कोनी देवै, बिनै का'टर आग म बाळ दिओ ज्यासी।

¹¹ म तो थानै पाणी को बतिस्मो द्‍युँ हूँ, जिऊँ ओ बेरोपाट सकै क थे थारा पापऊँ तौबा कर लिआ हो। पण जखो मेरै पाछै आबाळो ह बो मेरूँ बोळो म्हान ह; म तो बिकाळा जूता का सळू खोलबा जोगोई कोनी। बो थानै आग अर पबितर आत्मा को बतिस्मो देसी।

¹² बिको छाजळो बिकै हात म ह अर बो ग्युंआ मऊँ डूण्डळी साप करसी, ग्युंनै ओबरी म भेळा करसी पण डूण्डळ्यानै आग म बाळसी। अर बा आग बुत्तबा की कोनी।”

ईसु को बतिस्मो

¹³ बि टेम ईसु गलिलऊँ यरदन किनारै यहून्नाऊँ पाणी को बतिस्मो लेबा आयो।

¹⁴ पण यहून्ना अंय्यां बोलर बिनै रोकबा लाग्यो, “मनै तो थारै हातऊँ पबितर आत्मा को बतिस्मो लेबा की जुर्त ह अर थे मेरै कनै आया हो!”

¹⁵ ईसु बिनै अंय्यां ओडायो, “इब तो अंय्यांई होबा दे, क्युं क जखी परमेसर चावै ह बोई आपानै करनो ह।” जणा बो बिकी बात मान लिनी।

¹⁶ अर ईसु पाणी को बतिस्मो लेर जंय्यांई पाणी मऊँ बारनै आयो अकास खुलग्यो, अर ईसु परमेसर की पबितर आत्मानै कबूतर क रूप म आपकै उपर उतरता देख्यो।

¹⁷ जणा अकासऊँ हेलो आयो, “ओ मेरो लाडलो बेटो ह, जिऊँ म बोळो राजी हूँ।”