लूका 3 - जीवन को च्यानणो (सेकावाटी नया नियम की पोथ्या)

बतिस्मो देबाळा यहून्ना को परचार

¹ आ बात जणा की ह जद तिबिरियुस कैसर का राज-काज को पन्दरवो बरस हो, जद यहूदिआ को राजपाल पिन्तुस पीळातुस हो, अर गलिल को राजपाल हेरोद हो, अर बिको भाई फलिपूस इतूरिया अर तरखोमीतिस को, अर अबिलेन को राज-काज लिसानियास क तळै हो।

² बि टेम हन्ना अर केफा म्हायाजक हा, बा दिना म जकरयाह का छोरा यहून्नानै उजाड़ म परमेसर का समचार लाग्या।

³ अर बो यरदन नदि अर बिकै आसपड़ोस की सगळी झघा म घूम-घूम परचार करतो हो क, “थारा पापऊँ तौबा कर पाणी को बतिस्मो लेल्यो जिऊँ परमेसर थारा पापनै माफ कर देसी।

⁴ जंय्यां की यसाया परमेसर की खेबाळा का बचना हाळी पोथी म मंडर्यो ह क, ‘कोई उजाड़ म हेलो देवै ह, परबु ताँई गेलो बणाओ अर बिको गेलो सिदो-सपाट करो।

⁵ सगळी घाट्या को भराव कर इकसार कर्यो जाणो, टेडा-मेडा गेला सिदा कर्या जाणा अर बेढंग का गेलानै ढंग का बणाया जाणा जरूरी ह।

⁶ अर सगळा मिनख परमेसर का छुटकारा का कामनै देखसी।’”

⁷ जत्ता बी यहून्ना क कनै पाणी को बतिस्मो लेबा आता बा सगळानै बो एकई बात बोलतो, “अरै सपोलो थानै, थार प पड़बाळी परमेसर की झाळऊँ बचबा ताँई कूण बता दिओ?

⁸ जणा इब थारा करमाऊँ ओ बेरो पड़णो चाए क थे पाप करबो छोड दिआ हो। अर अंय्यां मना जताओ की म्हें अब्राहम की ओलाद हां। क्युं क म जाणू हूँ अर थारूँ बी बोलुँ हूँ परमेसर आ भाठाऊँ बी अब्राहम ताँई ओलाद पैदा कर सकै ह।

⁹ इब कुहाड़ो दरख्त की जड़्या प ह जखो बोजो चोखो फळ कोनी ल्यावै बिनै का'टर आग म बाळ दिओ ज्यासी।”

¹⁰ जणा बा भीड़ बिऊँ बुजी, “म्हानै काँई करबो चाए?”

¹¹ बो बोल्यो, “जिकनै दो कुर्ता हीं बे बिकै सागै बाट ले जिकनै कोनी। अर जिकनै रोटी ह बो बी अंय्यांई करै।”

¹² चुंगी लेबाळा बी बिकन पाणी को बतिस्मो लेबा आया अर बिऊँ बुज्या, “म्हानै काँई करबो चाए म्हराज?”

¹³ बो बानै ओडायो, “जत्तो थानै बताएड़ो ह बिऊँ बेत्ती मना लिज्यो।”

¹⁴ सिपाईड़ा बी बिऊँ बुज्यो, “म्हें काँई करां?” बिको जुबाब ओ हो क, “थे पिसा ताँई मिनखानै मना डराज्यो बस थारी तनखा म राजी रेहज्यो अर कोई प झूठो दोस मना लगाज्यो।”

¹⁵ इब मिनखा की आस बढबा लागी क मसी परगट होबाळो ह। अर बे सोचबा लागर्या हा क, “कदै ओई तो मसी कोनी ह?”

¹⁶ जणा यहून्ना बा सगळाऊँ बोल्यो, “म तो थानै पाणी को बतिस्मो देर्यो हूँ पण जखो आबाळो ह बो बोळो सक्‍तिसाली ह म तो बिकाळा जूता का सळू खोलबा जोगोई कोनी। अर बो थानै लाय अर पबितर आत्मा को बतिस्मो देसी।

¹⁷ अर बो छाजळो लेर त्यार ह जिऊँ बो ग्युंआ मऊँ डूण्डळी साप करसी, जिऊँ ग्युंनै तो आपकी ओबरी म धर देसी अर डूण्डळ्यानै बाळबा ताँई कदैई कोनी बुत्तबाळी लाय म गेर देसी।”

¹⁸ अर बो मिनखानै ओर बोळी बाताऊँ समजार चोखो समचार सुणातो रिह्यो।

यहून्ना को काम खतम होबो

¹⁹ पण जद यहून्ना राजपाल हेरोदनै बिका भाईड़ा की लूगाई हेरोदिआसऊँ ब्या करबा अर बिका सूगला कामा क पेटै ओळमो दिओ।

²⁰ जणा हेरोद सऊँ बुरो काम ओ कर्यो की यहून्नानै काळ-कोठड़ी म गिरवा दिओ।

ईसु को बतिस्मो

²¹ जद सगळा मिनख पाणी को बतिस्मो लेर्या हा, बाकै पाछै ईसु बी पाणी को बतिस्मो लिओ। अर जंय्यांई ईसु अरदास कर्यो बि टेम परमेसर अकासनै खोल दिओ।

²² अर पबितर आत्मा कबूतर की काया को रूप लेर बिपै उतर्यो, जणा अकासऊँ हेलो आयो “तू मेरो लाडलो बेटो ह, म तेरूँ बोळो राजी हूँ।”

ईसु को कूणबो

²³ ईसु करीब तीस बरस को होयो हो जणा बो बचन की सीख देबो चालू कर्यो। ईसु मिनखा की नजर्या म युसूफ को बेटो हो अर युसूफ एली को छोरो हो,

²⁴ एली जखो मत्तात की, मत्तात लेवी की, लेवी मलकी की, मलकी यन्ना की, यन्ना जखो युसूफ की,

²⁵ युसूफ जखो मत्तीया की, मत्तीया आमोस की, आमोस नहूम की नहूम असल्याह की, असल्याह नोगह की,

²⁶ नोगह जखो मात की, मात जखो मत्तीया की, मत्तीया जखो सिमी की, सिमी योसेख की, योसेख योदहा की,

²⁷ योदहा योनान की, योनान रेसा की, रेसा जरूबाबील की, जरूबाबील बरसतियेल की, बरसतियेल नेरी की,

²⁸ नेरी मलकी की, मलकी अद्दि की, अद्दि कोसाम की, कोसाम इलमोदाम की, इलमोदाम ऐर की,

²⁹ ऐर जखो यहोसू की, यहोसू एलीयाजर की, एलीयाजर योरीम की योरीम मत्तात की, मत्तात लेवी की,

³⁰ लेवी समोन की, समोन यहूदा की, यहूदा युसूफ की, युसूफ योनान की, योनान इल्याकीम की।

³¹ इल्याकीम मलेआ की, मलेआ मिन्नाह की, मिन्नाह मत्तात की मत्तात नातान की, नातान दाऊद की,

³² दाऊद यिसै की, यिसै ओबेद की, ओबेद बोआज की, बोआज सलमोन की, सलमोन नहसोन की,

³³ नहसोन अमिनादाब की, अमिनादाब ऐराम की, ऐराम हेजरोन की, हेजरोन फरिस की, फरिस यहूदा की

³⁴ यहूदा याकूब की, याकूब इसाक की, इसाक अब्राहम की अब्राहम तिरह की, तिरह नाहोर की,

³⁵ नाहोर जखो सरूग की, सरूग रऊ की, रऊ फिलीग की, फिलीग एबिर की, एबिर सिलह की,

³⁶ सिलह केनान की, केनान अरफछद की, अरफछद सेम की सेम नूह की, नूह लिमिक की,

³⁷ लिमिक मथूसिलह की, मथूसिलह हनोक की हनोक यिरिंद की, यिरिंद महलेल की, महलेल केनान की,

³⁸ केनान जखो एनोस की एनोस जखो सेत की, सेत जखो आदम की ओलाद ही, आदम जिनै परमेसर रच्यो।