यहून्ना 3 - जीवन को च्यानणो (सेकावाटी नया नियम की पोथ्या)

ईसु अर निकेदेमुस

¹ बठै निकेदेमुस नाम को यहूदि नेता हो, जखो एक फरिसी हो।

² एक रात बो ईसु कनै गयो अर बिऊँ बोल्यो, “गरूजी, म्हें जाणा हां क म्हानै सीखाबा ताँई परमेसर तनै भेज्यो ह। अर ज परमेसर थारै सागै नइ होतो तो थे चमत्कार कोनी कर सका हा।”

³ ईसु जुबाब दिओ, “म तेरूँ सची बोलुँ हूँ जद ताँई कोई मिनख ओज्यु नइ जलमै जद ताँई बो परमेसर का राजनै कोनी देख सकै।”

⁴ जणा निकेदेमुस बोल्यो, “एक बूडो मिनख ओज्यु आपकी माँ का पेट म जार कंय्यां जलम ले सकै ह?”

⁵ ईसु बोल्यो, “म थारूँ सची-सची बोलुँ हूँ, पबितर आत्मा अर पाणीऊँ जलम्या बिना कोईबी मिनख परमेसर का राज म कोनी बड़ सकै।

⁶ मिनख मिनखनै जलम दे सकै ह, पण बा पबितर आत्मा ह जिकै जरिए बो आत्मिक रूप म जलमै ह।

⁷ था सगळानै ओज्यु जलम लेणोई ह, मेरी इ बात प ताजूब मना करो।

⁸ भाळ जठै चावै बठै भेवै ह, जिकी उवाज थे सुणो हो, पण थे आ कोनी जाणो क बा कठैऊँ आवै अर कठै जावै ह। पबितर आत्माऊँ जलम लेबाळो हरेक मिनख इकी जंय्यांई ह।”

⁹ निकेदेमुस बोल्यो, “ओ कंय्यां हो सकै ह?”

¹⁰ ईसु बिऊँ बोल्यो, “तू इजरायल्यानै सीख देबाळो होर बी, आ बातानै क्युं कोनी समज सक्यो?

¹¹ म तनै सची बोलुँ हूँ, म्हें जोक्यु जाणा बो बोलां हां, अर जोक्यु देखां बिकी गुवाई देवां हां, इकै बावजुद बी थे म्हारी बातानै कोनी मानो।

¹² थे जद इ धरती की बाता पई बिस्वास कोनी करो जखी म थानै बताऊँ हूँ। जणा पाछै ज म थानै ईस्बर नगरी की बाता बताऊँ, थे बापै कंय्यां बिस्वास करस्यो?

¹³ बो जखो ईस्बर नगरीऊँ उतर्यो बि मिनख का बेटा क अलावा कोई ईस्बर नगरी म कोनी चढ्यो।

¹⁴ जंय्यां मूसा बि उजाड़ म कांसा का साँपनै उचो उठायो हो बंय्यांई मिनख को बेटो बी उचो उठायो ज्यासी।

¹⁵ जिऊँ जखो बी बिपै बिस्वास करै बो अजर-अमर जीवन पावै।”

¹⁶ “क्युं क परमेसर जगत का मिनखाऊँ अंय्यां को परेम कर्यो, जिकै चलतै बो आपको इकलोतो बेटो दे दिओ। जिऊँ जखो बी बिपै बिस्वास करै बो नास नइ होवै पण अजर-अमर जीवन पावै।

¹⁷ परमेसर आपका बेटानै, जगत का मिनखानै सजा देबा को हुकम देबा ताँई कोनी भेज्यो। पण बानै बचाबा ताँई भेज्यो ह।

¹⁸ जत्ता बी बिपै बिस्वास करै ह, बानै परमेसर माफ करै ह। पण जखा बिपै बिस्वास कोनी करै बे सजा का भागी ह, क्युं क बे परमेसर का इकलोता बेटा प बिस्वास कोनी कर्या।

¹⁹ बाको न्याय इ आधार प ह क ईस्बर नगरीऊँ च्यानणो धरती प आयो। पण बे च्यानणाऊँ बेत्ती अँधकारऊँ लगाव राख्या। क्युं क बाका करम बुरा हा।

²⁰ जखो बुराई करै ह, बो च्यानणाऊँ नफरत राखै ह। अर च्यानणा म कोनी आवै, क्युं क बो डरै ह क बिका करम चोड़ा म नइ आज्यावै।

²¹ पण जखा खराई प चालै ह, बे च्यानणा म आवै ह। जिऊँ ओ सामै आ सकै, क जोक्यु परमेसर चातो हो बोई बे कर्या।”

ईसु अर यहून्ना बतिस्मो देबाळो

²² आ बाता क होबा क पाछै ईसु आपका चेला क सागै यहूदिआ का निचला इलाका म आयो। अर बठै बाकै सागै रिह्यो अर पाणी को बतिस्मो दिओ।

²³ सलेम नगरी क सांकड़ैई एनोन नाम की झघा एक कूंड हो जठै यहून्ना बी पाणी को बतिस्मो दिआ करतो हो, क्युं क इ झघा म बोळो पाणी हो। मिनख बिकन आर पाणी को बतिस्मो लेता हा।

²⁴ अ यहून्नानै केद म लेबाऊँ पेली की बाता हीं।

²⁵ सुद होबा का रिवाजा क बारां म यहून्ना का क्युंक चेला एक यहूदि अधिकारीऊँ जिरै करर्या हा।

²⁶ जणा बे यहून्ना कनै जार बिऊँ बोल्या, “गरूजी जखो मिनख यरदन क परलै नाकै तेरै सागै हो जिकै बारां म तू बोल्यो हो, इब बो पाणी को बतिस्मो देर्यो ह अर हरेक जणो पाणी को बतिस्मो लेबा बिकन जार्यो ह।”

²⁷ यहून्ना जुबाब दिओ, “जद ताँई परमेसर नइ दे, कोईनै क्युंई कोनी मिलै।

²⁸ थे खुद मेरा गुवा हो, म थानै बोल्यो हो क, ‘म मसी कोनी पण बिकै अगाऊ भेजेड़ो हूँ।’

²⁹ बिंद बोई ह जिकै बिनणी ह। पण बिंद को भाईलो जखो खड़्यो होर बिकी सुणै ह, बो जद बिंद बोलै जणा बिकी उवाज सुणर राजी होज्यावै ह। ठिक बंय्यांई म बी राजी होयो।

³⁰ आ जरूरी ह क मिनखा म ईसु को मान बढै अर मेरो घटै।

³¹ “जखो उपरऊँ आवै ह, बो सऊँ बढर ह। जखो मिनख धरतीऊँ आवै बो धरती को ह अर बो धरती की बाता करै ह। पण जखो ईस्बर नगरीऊँ आवै बो सऊँ उपर ह।

³² बो जोक्यु देख्यो अर सुण्यो बिनैई बोलै ह, पण कोईबी मिनख बिकी बातानै कोनी मानै।

³³ जखो बी बिकी बातानै मानै ह, बो आ दिखावै ह क परमेसर सचो ह।

³⁴ क्युं क जिनै परमेसर भेज्यो ह, बो परमेसर का बोल बोलै ह। क्युं क परमेसर बिनै बेथां पबितर आत्माऊँ भर्यो ह।

³⁵ परम-पिता आपका बेटाऊँ परेम करै ह अर बिकै हाता म सक्यु सूप दिओ ह।

³⁶ जखो मिनख परमेसर का बेटा प बिस्वास करै, बिनै अजर-अमर जीवन मिलसी। पण जखो बिकी कोनी मानै, बि ताँई जीवन कोनी अर बो परमेसर की झाळ भोगसी।”