यहून्ना 18 - जीवन को च्यानणो (सेकावाटी नया नियम की पोथ्या)

ईसु की गिरफदारी

¹ आ अरदास कर ईसु आपका चेला क सागै कीद्रोन घाटी क परली पार एक बाग म गयो।

² अर बि झघा क बारां म बिनै धोकाऊँ पकड़ाबाळो यहूदा बी जाणतो हो क्युंक घणकरी बार ईसु आपका चेलाऊँ बठैई मिल्या करतो हो।

³ जणा यहूदा रोमी सिपाईड़ा की एक टुकड़ी अर परधान याजक अर फरिसीया का भेजेड़ा मनदर का पेरेदारा क सागै बठै आयो। बाकै हाता म मसाल, लालटेन अर राछ हा।

⁴ जणा पाछै ईसु जखो सक्यु जाणता हो आगै आर बाऊँ बोल्यो, “थे किनै ढुंढो हो?”

⁵ बे बोल्या, “ईसु नासरीनै।” जणा बो बाऊँ बोल्यो, “बो म हूँ।” बिनै पकड़ाबाळो यहूदा बी बाकै सागै हो।

⁶ ईसु क अंय्यां बोलताई, “बो म हूँ,” बे चिमकर जमीन प पड़गा।

⁷ जणा एक बार ओज्यु ईसु बाऊँ बुज्यो, “थे किनै ढुंढो हो?” बे बोल्या, “ईसु नासरीनै।”

⁸ ईसु बोल्यो, “म बोल्यो तो हो, बो मई हूँ। ज थे मनै ढुंढो हो जणा आ मिनखानै जाबा द्‍यो।”

⁹ अंय्यां बो इ ताँई बोल्यो जिऊँ जोक्यु बो बोल्यो हो बो सच होवै, “म बामैऊँ एकनैई कोनी खोयो जखा थे मनै सूप्या हा।”

¹⁰ इकै पाछै समोन पतरस, जिकै कनै तलवार ही, बो तलवार काडी अर म्हायाजक का दास को दाइणो कान काट गेर्यो। बिको नाम मलखुस हो।

¹¹ जणा ईसु पतरसऊँ बोल्यो, “तेरी तलवारनै म्यान म घाल ले! के म पिड़ा को बो प्यालो कोनी पीऊँ जखो मेरो परम-पिता मनै दिओ ह?”

अनास क सामै ईसु की पेसी

¹² इकै पाछै रोमी टुकड़ी का सिपाईड़ा, सुबेदार, यहूदि अर मनदर का पेरेदार मिलर ईसुनै गिरफदार कर लिआ अर बिनै बां'दर,

¹³ पेली अनास क कनै लेग्या, जखो बि बरस का म्हायाजक केफा को सुसरो हो।

¹⁴ ओ केफा बोई मिनख हो जखो यहूदि नेतानै राय दि ही क, “सगळा क बदला म एक को मरबो चोखो ह।”

पतरस को ईसुनै जाणबाऊँ नटबो

¹⁵ समोन पतरस अर एक ओर चेलो ईसु क गेल होलिओ। म्हायाजक इ चेलानै सूल्या जाणतो हो, इ ताँई बो ईसु क गेल म्हायाजक क आँगणा म बड़गो।

¹⁶ पण पतरस बारनै बारना क कनैई डटगो जणा पाछै म्हायाजक की जाण-पिछाण हाळो दुसरो चेलो बारनै आयो अर बारना प खड़ी पेरेदारनीनै बोलर पतरसनै मांयनै लेगो।

¹⁷ इपै बा पेरेदारनी बोली, “मनै तू ईसु को चेलो लागै ह। के ओ सच ह?” पतरस जुबाब दिओ, “नइ, म कोनी।”

¹⁸ जाडा की बजेऊँ दास अर मनदर का पेरेदार बास्ते बाळर बठै खड़्या-खड़्या तपै हा, अर पतरस बी बाकै सागै खड़्यो होर तपै हो।

ईसुऊँ सुवाल जुबाब

¹⁹ जणा पाछै म्हायाजक ईसुऊँ बिका चेला-चपाटी अर बिकी सीख क बारां म बुज्यो।

²⁰ ईसु बिऊँ बोल्यो, “म हर बार दुनिया का मिनखा म खुलर बोल्यो हूँ। म अरदास करबाळी झघा अर मनदर म जठै सगळा मिनख भेळा होवीं हीं सीखायो हूँ। म कदैई ओला म कोनी बोल्यो।

²¹ जणा पाछै तू मेरूँ क्याले बुजै ह? म काँई बोल्यो ज ओ जाणबो चावै ह जणा बाऊँ बुज जखा मनै सुण्या हीं। म काँई बोल्यो बे जाणी हीं।”

²² आ सुणर बठै खड़्यो मनदर को एक पेरेदार ईसु क रेपटो मारतोई बोल्यो, “म्हायाजक क सागै जबान लड़ाबा की तेरी हिमत कंय्यां होई?”

²³ ईसु बिऊँ बोल्यो, “ज म क्युं गळत बोल्यो हूँ, जणा साबित कर। अर ज म सई बोल्यो हूँ, जणा तू मनै क्याले मारै ह?”

²⁴ इकै पाछै अनास बिनै भंदेड़ानैई म्हायाजक केफा क कनै भेज दिओ।

पतरस को ओज्यु ईसुनै जाणबाऊँ नटबो

²⁵ जद पतरस ताव क आगै तपै हो, बि टेम बिऊँ बुज्यो गयो, “तू बी तो बिका चेला मऊँ एक ह, के आ बात सई कोनी?” पण पतरस नटगो अर बोल्यो, “म बामैऊँ कोनी।”

²⁶ म्हायाजक को एक दास जखो बि मिनख को रिस्तेदार हो जिको पतरस कान काट्यो हो। बिऊँ बोल्यो, “के म तनै बिकै सागै बाग म कोनी देख्यो?”

²⁷ जणा पतरस ओज्यु नट्यो अर नटता क सागैई मुरगो बांग दिनी।

ईसु की पीळातुस क सामै पेसी

²⁸ इकै पाछै बे सुआरै ईसुनै केफा क घराऊँ रोमी राजपाल का दरबार म लेग्या पण यहूदि अधिकारी मांयनै कोनी गया, क्युं क बे खुदनै असुद कोनी करबो चावै हा, जिऊँ क बे फसै की रोटी खा सकै।

²⁹ जणा पीळातुस बारनै आर बाऊँ बोल्यो, “ओ काँई अपराद कर्यो ह?”

³⁰ जणा बे जुबाब दिआ, “ज ओ क्युंई अपराद नइ कर्यो होतो जणा म्हें इनै अठै कोनी ल्याता।”

³¹ जणा पीळातुस बाऊँ बोल्यो, “थे इनै अठैऊँ लेज्याओ अर थारा नेम-कायदा गेल इको न्याय करो।” यहूदि बोल्या, “म्हानै ओ अधिकार कोनी क म्हें कोईनै मोत की सजा सुणावां।”

³² अंय्यां इ ताँई होयो क ईसु की आपकी मोत क बारां म बोलेड़ी बात पूरी हो।

³³ जणा पीळातुस दरबार म पाछो गयो अर ईसुनै बुलार बुज्यो, “तू यहूदि मिनखा को राजा ह के?”

³⁴ ईसु बोल्यो, “आ बात तू मनै जाणबा ताँई बुजी ह नहिस कोई आ बुजबा ताँई तनै बोल्यो ह?”

³⁵ पीळातुस बोल्यो, “के म यहूदि हूँ? तेराई यहूदि मिनख अर परधान याजक तनै मेरै हाता म सूप्या हीं। तू अंय्यां को काँई कर्यो ह?”

³⁶ ईसु बोल्यो, “मेरो राज इ दुनिया को कोनी। ज मरो राज अठै को होतो जणा मेरै गेल चालबाळा मनै यहूदि मिनखा क हाता म पड़बाऊँ बचाबा ताँई लोय भवाता। पण मेरो राज अठै को कोनी।”

³⁷ इपै पीळातुस बिऊँ बोल्यो, “इको मतबल तू राजा ह के?” ईसु बोल्यो, “तू बोलै ह क म राजा हूँ। म सच की गुवाई देबा ताँई इ धरती प जलम्यो अर आयो हूँ। जखा बी सचा ह बे मेरा बचन सुणै ह।”

³⁸ पीळातुस बिऊँ बुज्यो, “सच काँई ह?” आ खेर बो ओज्यु यहूदि मिनखा क कनै बारनै गयो अर बाऊँ बोल्यो, “मनै इ मिनख म कोई खोट कोनी लाधी।

³⁹ पण थारी आ रीत ह क, फसै का त्युंहार प म थारै ताँई कोई एक केदिनै अजाद करूं, ज थे चाओ तो, के म इ यहूदि मिनखा का राजानै थारै ताँई छोड द्‍युँ?”

⁴⁰ ओज्यु बे एक सागै चिलाया, “इनै नइ पण बरअबानै छोड दे।” बरअबा एक बागी हो।