इबरानीआ 7 - जीवन को च्यानणो (सेकावाटी नया नियम की पोथ्या)

याजक मिलिकीसिदक

¹ ओ मिलिकीसिदक सलेम नगरी को राजा हो अर ओ सऊँ सक्‍तिसाली परमेसर को याजक हो। जद अब्राहम बा च्यार राजानै हरा'र पाछो आर्यो हो जाऊँ बो राड़ करी ही जणा ओई याजक बिऊँ मिल्यो अर आसिरबाद दिओ

² अर अब्राहम बा सगळी चिजा मऊँ जखी बो राड़ म जीतर ल्यायो हो बाको दसवो हिस्सो बिनै दिओ। मिलिकीसिदक का नाम को पेलो मतबल “धारमिक्‍ता को राजा” होवै ह अर सलेम को राजा होबा की बजेऊँ बिका नाम को मतबल “स्यांती को राजा” बी ह।

³ जिका नइ तो माँ-बाप अर बडका क बारां म कोई लेखो-जोखो ह अर नइ इका जलम अर मोत क बारां म लेखो-जोखो ह। पण बो परमेसर का बेटा की जंय्यां सदा-सदा को याजक ह।

⁴ इ ताँई थे सोचो तो सई, क बो कतो म्हान हो जिनै कूणबा को खास बडको अब्राहम मेंगी लूट को दसवो हिस्सो दिओ हो।

⁵ अर इब देखो, नेम-कायदा गेल जखा लेवी की ओलाद हीं बेई याजक बणै अर बानै मिनखाऊँ मतबल आपका यहूदि भायाऊँ दसवो हिस्सो लेबा को हुकम मिलेड़ो ह। जदकी बिका भाईड़ा अब्राहम किई ओलाद हीं।

⁶ अर मिलिकीसिदक जखो लेवी वंस को कोनी हो, जणा बी बो अब्राहमऊँ दसवो हिस्सो लिओ हो। अर बो अब्राहमनै आसिरबाद दिओ जिकै कनै परमेसर का करेड़ा करार हा।

⁷ इमै सक की कोई गुंजाईस कोनी क बडा छोटानै आसिरबाद देवै ह।

⁸ लेवी वंस का याजका का मामला म दसवो हिस्सो लेबाळा याजक मिनखई तो ह जखा मरै ह, पण याजक मिलिकीसिदक क बारां म सास्तर बोलै ह क बो इब ताँई जीवै ह।

⁹ इ ताँई आपा अंय्यां बी खे सकां हां क जखा लेवी दसवो हिस्सो लेवै ह, बे अब्राहम क जरिए मिलिकीसिदकनै दसवो हिस्सो दे बी दिओ।

¹⁰ क्युं क हाल ताँई तो लेवी वंस निकळ्योई कोनी हो जद मिलिकीसिदक अब्राहमऊँ मिल्यो हो। पण जिमैऊँ ओ वंस निकळ्यो बाको बडको अब्राहमई तो ह।

¹¹ परमेसर इजरायल का मिनखानै लेवी याजकपुणा का आधार प नेम-कायदा दिओ। पण लेवी वंस को याजकपुणो परमेसर की नजर्या म मिनखानै धरमी कोनी बणा सक्यो। इ ताँई परमेसरनै दुसरा याजकनै भेजबा की जुर्त पड़ी जिको याजकपुणो लेवी वंस का याजक हारुण का याजकपुणा की जंय्यां कोनी हो। पण बिको याजकपुणो मिलिकीसिदक की रीत गेल हो।

¹² ज याजकपुणो बदलै ह जणा जरूरी ह क नेम-कायदो बी बदल्यो जावै।

¹³ जिकै बारां म अ बाता बोली गई ह बो दुसरा कूणबा को ह अर बि कूणबा को कोईबी मिनख कदैई बेदी प सेवा कोनी करी।

¹⁴ आ बात साप-साप ह क आपणो परबु यहूदा का कूणबा म जलम्यो अर मूसा कदैई इ बात को जिकर कोनी कर्यो क इ कूणबा मऊँ कोई याजक निकळसी।

¹⁵ अर ओ बदलाव ओर बी साप होगो क्युं क मिलिकीसिदक की जंय्यां को एकोर याजक परगट होगो ह।

¹⁶ जखो मिनखा का आदेसा क आधार प नइ पण जीवन देबाळी सक्‍ति क आधार प बण्यो जखी कदैई नास कोनी होवै।

¹⁷ क्युं क पेल्याऊँई इ बात की गुवाई दि गई ह क, “तू मिलिकीसिदक की रीत गेल, सदा-सदाई को याजक ह।”

¹⁸ पुराणो हुकम इ ताँई हटा दिओ गयो क्युं क बो कमजोर अर बेकार हो।

¹⁹ क्युं क नेम-कायदा ख्यानैई निधान कोनी बणायो। पण एक अंय्यां की चोखी आस की पिछाण कराई गई ह जिकै जरिए आपा परमेसर क कनै जा सकां हां।

²⁰ परमेसर बिनै सोगन की बजेऊँ याजक बणायो जदकी दुसरा बिना सोगन कई याजक बण्या।

²¹ पण ईसु सोगन क सागै बि टेम याजक बण्यो जद परमेसर बिऊँ बोल्यो हो क, “परबु सोगन खाई ह, अर आपका हियानै कदैई कोनी बदलै: ‘तू सदा-सदा को याजक ह।’ ”

²² इ सोगन की बजेऊँ ईसु एक चोखा करार की जामनी बणगो।

²³ अंय्यां तो बोळासारा याजक बणता आया हीं पण बानै मोत सदा ताँई कोनी रेह्बा दि।

²⁴ पण ईसु अमर ह, इ ताँई बो सदा-सदाई को म्हायाजक रेह्सी।

²⁵ अर बिकै जरिए जखो बी परमेसर क कनै जावै ह, बाको बो पूरो-पूरो छुटकारो कर सकै ह। क्युं क बो बाकै ताँई अरदास करबा ताँई सदाई जिंदो ह।

²⁶ अर आपानै तो अंय्यां कोई म्हायाजक चाए हो जखो पबितर, निरदोस, पापी मिनखाऊँ न्यारो, सुद अर जिको ईस्बर नगरी म उचो पद हो।

²⁷ अर बिनै इकी जुर्त कोनी ही क बो म्हायाजका की जंय्यां पेल्या खुद ताँई पाप बलि चढावै बिकै पाछैई मिनखा ताँई पाप बलि चढावै। पण बो बाकै पाप ताँई खुदनै सदा-सदा ताँई बलि कर दिओ।

²⁸ मूसा का नेम-कायदा गेल बणाएड़ा म्हायाजका म तो कमीया ही; पण जखी सोगन नियमा पाछै आई बा, बेटानै टाळी जखो सदा-सदा ताँई निधान म्हायाजक बणगो।