इबरानीआ 4 - जीवन को च्यानणो (सेकावाटी नया नियम की पोथ्या)

परमेसर का मिनखा ताँई अराम

¹ जदकी बिकी अराम हाळी झघा म जाबा को बादो हाल बी ह, जणा आपानै चेता म रेह्बो चाए क्युं क कदै अंय्यां नइ होवै क थारै मऊँ कोईसो बी बठै जाबाऊँ चूक ज्यावै।

² क्युं क आपानै बी आपणा बडका की जंय्यांई चोखो समचार सुणायो गयो ह पण बानै बि समचारऊँ क्युंई फाईदो कोनी होयो क्युं क बे बि समचारनै तो सुण्यो पण बिपै बिस्वास कोनी कर्यो।

³ पण आपा जखा बिस्वास करां हां बानै बो करार करेड़ो अराम मिलै ह। जंय्यां क बो बोल्यो ह; “म बानै झाळ्या म आर आ सोगन खार खयो, ‘बे कदैई मेरी अराम हाळी झघा म कोनी बड़सी।’ ” जदकी इ सरस्टि की रचना क टेमऊँई बिको काम पूरो होगो हो।

⁴ क्युं क सातुआ दिन क बारां म बो सास्तर म एक झघा अंय्यां बोल्यो ह, “परमेसर सातवै दिन आपका सगळा कामानै निमेड़र अराम कर्यो।”

⁵ अर बो बठै ओज्यु खेवै ह, “बे कदैई मेरी अराम हाळी झघा म कोनी बड़सी।”

⁶ सऊँ पेली जखा मिनखानै चोखो समचार सुणायो गयो हो बे अराम हाळी झघा म कोनी बड़ सक्या क्युं क बे खयो कोनी मान्या। इ ताँई हाल बी क्युंक मिनखा क बड़बा ताँई बा अराम हाळी झघा त्यार ह।

⁷ इ ताँई परमेसर ओज्यु एक खास दिन ते कर्यो अर बिनै नाम दिओ “आज” अर बो बोळा बरसा क पाछै दाऊद क जरिए बोल्यो, “ज थे आज बिकी उवाज सुणो, जणा थे थारा हियानै काठो मना करो।”

⁸ अर ज यहोसू बानै बि अराम हाळी झघा म बाड़ देतो जणा पाछै परमेसरनै कोई ओर दिन क बारां म चरचा करबा की जुर्तई कोनी होती।

⁹ जखोबी हो, बो सातुआ दिनहाळो अराम, हाल बी परमेसर का मिनखानै उडिकर्यो ह।

¹⁰ क्युं क जखो बी बि अराम म बड़ै ह जिकै बारां म परमेसर करार कर्यो हो, बठै बानै बाका कामाऊँ बी अराम मिलसी जंय्यांकी परमेसर आपका कामानै निमेड़र अराम कर्यो हो।

¹¹ जणा आओ आपा बि अराम हाळी झघा म बड़बा ताँई पूरी कोसिस करां, क्युं क कदै अंय्यां नइ होवै क आपणा बा बडका की जंय्यां परमेसर का हुकमानै नइ मानबा की बजेऊँ बि अराम हाळी झघा म जाबाऊँ चूक ज्यावां।

¹² क्युं क परमेसर को बचन जिंदो अर काम करबाळो ह। बो दोधारी तलवारऊँ बी बेत्ती पेनो ह। परमेसर को बचन आत्मा, पिराण, जोड़ अर गुली म जार बानै न्यारो-न्यारो कर सकै ह। अर ओ हिया का बिचारानै अर मनस्यानै बिचासै ह।

¹³ परमेसरऊँ क्युंई लुखेड़ो कोनी। बिकी नजर्या म हरेक चिजा खुली अर उघाड़ी पड़ी ह जिकै सामै आपानै लेखो देणो ह।

ईसु आपणो म्हायाजक ह

¹⁴ इ ताँई परमेसर को बेटो ईसु मसी अंय्यां को म्हान म्हायाजक ह जखो ईस्बर नगरी गयो। जणा आओ आपा बा बाता म मजबूत रेह्‍वां जानै आपा मानी ह।

¹⁵ क्युं क आपणो म्हायाजक अंय्यां को कोनी जखो आपणी कमजोरीनै म्हेसुस कोनी कर सकै; क्युं क बिनै सगळी बाता म आपणी जंय्यां बिचास्यो गयो हो जणा बी बिमै कोई पाप कोनी लाध्यो।

¹⁶ जणा आओ, आपा हिमत बां'दर परमेसर की दया का सिंघासन कानि चालां, जिऊँ आपणानै दया अर किरपा मिलै अर जुर्त की टेम प आपणी मदद हो सकै।