इफिसुस 5 - जीवन को च्यानणो (सेकावाटी नया नियम की पोथ्या)

उजाळा म जिबो

¹ थे परमेसर का लाडला टाबर हो, इ ताँई परमेसर का सुभाव प चालो।

² अर प्यार-परेमऊँ जीवन बसर करो, जंय्यां मसी आपणाऊँ प्यार-परेम कर्यो अर परमेसर क सामै आपणै ताँई खुदकी भेंट चढा दि बिको आपणा ताँई ओ परेम चोखी सुगंद हाळी धूप की जंय्यां ह जखी परमेसरनै भावै ह।

³ थे परमेसर का मिनख हो इ ताँई थारै म कुकरमा की, लुचापुणा की अर लोभ-लालच की चरचा बी नइ होणी चाए;

⁴ अर थारा मुंडाऊँ कोई बेसरमी की, बेतुकी, बेहूदा मजाक अर जखी बाता चोखी कोनी बे नइ निकळनी चाए पण इकी बजाय थारा मुंडाऊँ परमेसर ताँई धनेवाद निकळणो चाए।

⁵ थानै इ बातनै सूल जाणणोई ह क कुकरमी, सूगला काम करबाळा, अर लोभी मिनखा को जखा मूरतीपुजा करबाळा की जंय्यां हीं, मसी अर परमेसर का राज म आकी कोई पाँती कोनी।

⁶ कोईबी थानै बेकार की बाताऊँ धोको नइ देदे; क्युं क आ कामा की बजेऊँ परमेसर को परकोप बिका हुकमानै नइ मानबाळा प पड़ै ह।

⁷ इ ताँई अंय्यां का मिनखा को संगरो मना राखो।

^8-9 क्युं क थे इब अँधकार म नइ पण परबु का उजाळा म हो, उजाळो भलाई, धारमिक्‍ता अर सच जंय्यां का फळ ल्यावै ह। इ ताँई उजाळा का टाबरा की जंय्यां जीओ।

¹⁰ परमेसरनै काँई चोखो लागै ह इकै बारां म खोज करो।

¹¹ अर अँधकार का बुरा कामा म सामिल मना होवो जंय्यां मिनख करै ह इकी बजाय बानै बाका बुरा कामा ताँई चेताओ।

¹² (क्युं क बाका ओलैछानै करेड़ा कामा क बारां म बात करबो बी सरम की बात ह।)

¹³ पण जद सगळी चिजा उजाळा म आवै ह जणा बाकी असलियत सामनै आवै ह।

¹⁴ क्युं क जखो सक्यानै परगट करै ह बो उजाळोई ह। इ ताँई अंय्यां खेयड़ो ह, “ओ सोबाळा, जागज्या अर मरेड़ा मऊँ जी उठ; अर मसी को उजाळो तेरै प भळकसी”

¹⁵ इ ताँई थे ध्यान द्‍यो क कंय्यां को जीवन जीवो हो। अनाड़ी की जंय्यां मना जीओ पण बुदीमाना की जंय्यां जीवो।

¹⁶ हरेक मोकानै सई काम म ल्यो, क्युं क दिन बुरा हीं।

¹⁷ इ ताँई मूरख मना बणो, पण परमेसर थारूँ काँई चावै ह बिनै ध्यानऊँ समजो।

¹⁸ दारू पीर मतवाळा मना बणो, क्युं क इऊँ मत्त मारी ज्यावै, पण इकी बजाय पबितर आत्मा म भर्यापूरा होता जाओ।

¹⁹ भजन-किरतन अर आत्मिक गीत का सब्दाऊँ एक दुसराऊँ बतळाता रिह्यो। अर थारा सगळा हियाऊँ परबु का भजन-किरतन करता रिह्या करो।

²⁰ अर आपणा परबु ईसु मसी का नामऊँ परम-पिता परमेसर को सगळी बाता ताँई सदाई धनेवाद देता रह्यो।

²¹ मसी को डर राख'र एक-दुसरा क बस म रह्यो।

²² ओ लूगायो, थे थारा मोट्यारा क बस म रह्यो जंय्यां परबु क रेह्ओ हो।

²³ क्युं क मोट्यार लूगाई को सीर ह जंय्यां मसी बिस्वासी मंडळी को सीर ह अर मसीई बिस्वासी मंडळीनै छुटाबाळो ह।

²⁴ इ ताँई जंय्यां बिस्वासी मंडळी मसी क बस म ह बंय्यांई लूगायानै बी चोखी बाता म आपका मोट्यारा क बस म रेह्णो चाए।

²⁵ ओ मोट्यारो, थे बी थारी लूगायाऊँ प्यार-परेम राखो जंय्यां मसी बिस्वासी मंडळीऊँ प्यार-परेम राख'र खुदकी ज्यान बिस्वासी मंडळी ताँई दे दिनी।

²⁶ जिऊँ बिस्वासी मंडळीनै मसी परमेसर का बचना अर पाणी का बतिस्माऊँ धोर पबितर अर उजळी बणावै,

²⁷ जिऊँ बो बिनै अंय्यां की भळका मारबाळी बिस्वासी मंडळी बणार आप ताँई त्यार करै, जिमै कोईबी दाग कोनी होवै, अर नइ बिकी खाल लटकेड़ी होवै अर नइ बिमै अंय्यां की कोई दुसरी कमी होवै पण पबितर अर बेदाग होवै।

²⁸ मसी मंडळीऊँ परेम राखै ह, इ ताँई आ जरूरी ह क मोट्यार आपकी लूगायाऊँ अंय्यां को परेम राखै जंय्यां बो खुदकी कायाऊँ राखै ह क्युं क मोट्यार अर लूगाई एक काया जंय्यां हीं। अर जखो मोट्यार आपकी लूगाईऊँ प्यार-परेम राखै ह बो खुदऊँ परेम राखै ह।

^29-30 क्युं क कोईबी आपकी कायाऊँ कदैई बैर कोनी राखै पण बिनै पाळै-पोसै ह। आपा मसी की काया का अंग हां इ ताँई मसी बिस्वास्या की बिस्वासी मंडळीनै पाळै-पोसै ह।

³¹ मोट्यारनै आपकी लूगाईनै पाळबो चाए इ ताँई परमेसर बोलै ह क, “मिनख आपका माँ-बापनै छोडर आपकी लूगाई क सागै रेह्सी अर बे दोन्यु एक जीव होसी।”

³² ओ तो बोळो उंडो भेद ह, जिनै म अठै मसी अर बिस्वास्या की बिस्वासी मंडळी क बारां म बताऊँ हूँ।

³³ इ ताँई थारै म हरेक मोट्यार आपकी लूगाईनै खुदकी जंय्यां परेम करै अर लूगाया बी आपका मोट्यारा की ईज्जत करै।