भेजेड़ा चेला का काम 9 - जीवन को च्यानणो (सेकावाटी नया नियम की पोथ्या)

साऊल को बदलबो

¹ हाल बी साऊल नाम को मिनख जखो ईसु का चेलानै धमकार्यो हो अर जानऊँ मार्यो हो, बो म्हायाजक क कनै गयो।

² अर दमिसक नगरी की अरदास करबाळी झघा का नामऊँ इ बात को अधिकार कागद माँग्यो क ज कोई मिनख बिनै परबु का इ पंथ म लाधै चाए बो मोट्यार हो चाए लूगाई, सगळानै बां'दर यरूसलेम ल्या सकै।

³ अर जद चालता-चालता बो दमिसक क सांकड़ै लाग्योक जणा चाणचुकई आसमान मऊँ एक च्यानणो बिपै चमक्यो।

⁴ अर जि बजेऊँ बो धरती प पड़ग्यो। बिका काना म उवाज आई, “ओ साऊल, ओ साऊल तू मनै क्याले दिन घालै ह?”

⁵ जणा साऊल बुज्यो “परबु थे कूण हो?” जणा उवाज आई, “म ईसु हूँ जिनै तू सतावै ह।

⁶ पण इब खड़्यो होर नगरी क मांय चल्योजा अर बठै तनै काँई करबो ह बो तनै बता दिओ जासी।”

⁷ जणा जखा मिनख बिकै सागै हा बे एक झघाई खड़्या होगा अर बाकी जबान कोनी उपड़ी क्युं क बानै उवाज तो सुणै पण कोई दिखै कोनी।

⁸ जणा पाछै साऊल धरती पऊँ खड़्यो होयो अर जंय्यांई बो आपकी आँख्या खोली बिनै क्युंई कोनी सुज्यो अर बिनै बिकै सागै हाळाई बिको हात पकड़र दमिसक नगरी म लेग्या।

⁹ तीन दिना ताँई बिनै क्युंई कोनी सुज्यो अर आ तीन दिना म बो बिना खाया पीयाई रिह्यो।

¹⁰ बि दमिसक नगरी क मांयनै एक चेलो हो जिको नाम हनन्या हो बिनै परबु दरसाव देर बोल्यो, “हनन्या” जणा बो बोल्यो, “परबु म अठै हूँ”

¹¹ जणा परबु बिऊँ बोल्यो, “खड़्यो होर सिदी नाम की गळी क मांयनै यहूदा क घरा जार तरसुस का रेह्बाळा साऊल नाम का एक मिनख क बारां म बुज। देख, बो इब अरदास करर्यो ह अर

¹² बिनै दरसाव म दिखर्यो ह क हनन्या नाम को एक मिनख बिकन आर बिपै हात धर्यो ह जिऊँ बो पाछो देख सकै।”

¹³ पण हनन्या जुबाब देवै ह क, “परबु म तो बोळा मिनखाऊँ इ मिनख क बारां म सुण्यो हूँ, क ओ मिनख यरूसलेम म तेरा मिनखानै बोळो दिन घाल्यो ह।

¹⁴ अर अठै बी ओ परधान याजकाऊँ अधिकार लेर तेरो नाम लेबाळानै गिरफदार करबा ताँई आयो ह।”

¹⁵ पण परबु बिनै बोल्यो, “तू तो जा! क्युं क म इनै गैर-यहूदि, राजा-म्हराजा अर इजरायली मिनखा म मेरो नाम फेलाबा ताँई मेरो दास कर टाळ्यो हूँ।

¹⁶ अर मेरा नामऊँ दुख उठाबो कतो जरूरी ह आ बात म खुद बिनै दिखास्युं।”

¹⁷ इकै पाछै हनन्या खड़्यो होर बि घर म गयो जठै साऊल हो अर बिपै आपका हात धर'र बोल्यो, “मेरा लाडला बिस्वासी भाईड़ा, मनै परबु ईसु जखो गेला म तेरै सामै परगट होयो हो बो भेज्यो ह, जिऊँ तू ओज्यु देखबा लागै अर पबितर आत्माऊँ भर जावै।”

¹⁸ अर जदकी जद मछी का छिलका जंय्यां की कोई चिज बिकी आँख्याऊँ गिरी अर बिनै सुजबा लागगो जणा बो खड़्यो होयो अर बतिस्मो लिओ।

¹⁹ इकै पाछै रोटी टुकड़ो खार बिमै ओज्यु सत आग्यो। अर बो कई दिना ताँई चेला क सागै दमिसक नगरी मई टिक्यो रिह्यो।

दमिसक म साऊल को परचार

²⁰ अर बो बिना देर कर्या दमिसक नगरी की अरदास करबाळी झघा म जार परचार कर्यो क ईसु परमेसर को बेटो ह।

²¹ अर जखा बी बिकी सुणता बे ताजूब करता अर खेता, “ओ बोई कोनी के जखो यरूसलेम म ईसु को नाम लेबाळानै जानऊँ मार गेर्यो हो? अर के अठै बी ओ बिको नाम लेबाळानै पकड़र परधान याजक क कनै लेज्याबा ताँई कोनी आयो के?”

²² पण साऊल को परचार ओर बी तगड़ो होतो गयो अर ईसुई मसी ह इ बात का सबूत देर बो दमिसक नगरी का यहूदिआनै बोलबा जोगोई कोनी छोड्यो।

²³ पण क्युं क दिन बित्याक जणा यहूदि मिनख बिनै मारबा की साजिस घड़ी।

²⁴ अर साऊलनै इ बात को बेरो पड़ग्यो, क बे नगरी का दरूजा प बिनै मारबा की ताक म दिन-रात रेह्‍वै।

²⁵ जणा रातनै बिकाळा चेला-चपाटी बिनै नगरी की भीत पऊँ बडासारा चोल्या म बिठायो अर रस्सा क सारै लटकार बठैऊँ पार कर दिओ।

यरूसलेम म साऊल

²⁶ अर बो यरूसलेम गयो। इकै पाछै बो चेला म मिलबा की कोसिस करी पण चेला बिऊँ डरता हा क्युं क बानै ओ बिस्वास कोनी होर्यो हो क ओबी इब ईसु को चेलो बणगो।

²⁷ जणा बरनाबास बिनै भेजेड़ा चेला कनै लेगो अर बानै बतायो क कंय्यां ओ गेला म परबुनै देख्यो, अर कंय्यां परबु बिऊँ बतळायो। अर इकै पाछै कंय्यां ओ हिमत क सागै दमिसक नगरी म ईसु का नाम को परचार कर्यो।

²⁸ जणा साऊल बाकै सागै सगळा यरूसलेम म आतो जातो हो अर बेधड़क परबु का नाम म परचार करतो हो।

²⁹ अर यूनानी भासा बोलबाळा क सागै जिरै बाजी करतो हो, जि बजेऊँ बे बिनै मारबा की ताक म रेह्बा लागगा।

³⁰ अर जद बिस्वासी भाई-भाणानै इ बात को बेरो पड़्यो जणा बे बिनै कैसरिया लिआया अर बठैऊँ तरसुस भेज दिआ।

³¹ जणा अंय्यां सगळा यहूदिआ, गलिल, अर सामरीया की बिस्वासी मंडळ्यानै स्यांती मिली। अर बिस्वास्या की बिस्वासी मंडळी मजबूत होती गई अर परमेसर का गुणगान करती गई। अर पबितर आत्मा का हियावऊँ गिणती म बढती गई अर परमेसर का डर म रेह्ती।

याफा अर लुद्दा नगर्या म पतरस

³² पतरस च्यारूमेर होर लुद्दा नगरी का परमेसर का मिनखाऊँ मिलबा आयो।

³³ बठै बिनै आठ बरसाऊँ खाटली म पड़्यो, एनियास नाम को एक मिनख मिल्यो जिमै भाळ भेयड़ी ही।

³⁴ बिनै पतरस बोल्यो, “एनियास खड़्यो हो अर तेरा बिछावणा समेट क्युं क परबु ईसु मसी तनै निरोगो करै ह।” अत्ती बोलताई बो खड़्यो होगो।

³⁵ अर बिनै देखर लुद्दा अर सरोन नगरी का रेह्बाळा परबु प बिस्वास कर्या।

³⁶ बठै याफा नगरी म तबिता नाम की एक बिस्वासी रिह्या करती ही जिनै यूनानी भासा म दोरकास खेवै ह जिको मतबल हिरणी होवै। बा बोळा चोखा-चोखा काम कर्या करती अर गरीबानै दान दिआ करती ही।

³⁷ बा दिना म बा बिमार पड़ी अर पिराण तज दिआ अर लोग बिकी लासनै नुहार चोबारा म धर दिआ।

³⁸ याफा नगरी लुद्दा नगरी क सारैई ही, चेला आ सुण क पतरस लुद्दा नगरी म आयड़ो ह बिकन दो मिनखानै भेज्या क बे बिऊँ अरदास करै क, “बिना देर कर्या दया कर म्हारै कनै आज्या।”

³⁹ जणा पतरस त्यार होर बाकै सागै होलिओ अर बिकै बठै पुगताई बे बिनै चोबारा म लेग्या अर बे सगळी खाली होईड़ी बार घालती पतरस क च्यारूमेर खड़ी होगी अर बिनै बे कुर्ता अर गाबा दिखाबा लागगी जखा दोरकास जीता जी बणाई ही।

⁴⁰ जणा पतरस बा सगळानै कोठा क बारनै भेज्यो अर आपका गोडा टे'कर अरदास करी अर बि लास कानि देखर बोल्यो, “तबिता उठ।” जणा बा आपकी आँख खोली अर पतरसनै देखर बेठी होगी।

⁴¹ जणा बो बिनै हात को सारो देर खड़्यो कर्यो अर परमेसर का मिनखा अर खाली होईड़ीयानै बुलार जीती जागती बानै सूप दि।

⁴² आ बात सगळा याफा नगरी म फेलगी अर बोळाजणा परबु का नाम प बिस्वास कर्या।

⁴³ अर पतरस याफा नगरी म चमड़ा को धंधो करबाळा समोन नाम का एक मिनख क घरा बोळा दिना ताँई रिह्यो।