2 Korint 5 - Ekajuk New Testament

E kpo jen go eltaame

¹ Tibre e kpꞌkahne re, ebkpatahk bi e wob a, bi li ngubjing enyahre nyi e li a nyi go njini nyia lꞌrannge, e kpi etahk ji Esowo si no, ji nne ki si go abo, ji bahke jolo go njinanjini go ejahbetul Esowo.

² Anv, e kpꞌtahnge etahng, eji e kpeke li go ngubjing nyia. E kpꞌsahb sꞌseb re wahr bel ngubjing nyio nyi li go ejahbetul Esowo.

³ E lꞌbel, e nehm kpe jol nehme nehme.

⁴ Tibre eji e kpeke li go ngubjing nyia, e kpꞌtahnge etahng, tib eji e kpꞌsolo egburu elsol. Jia lohngem re, e kpꞌsebe re wahr lud ngubjing nyia bum, e kpꞌsebe re wahr kak ngubjing nyio nyi ejahbetul Esowo, eji ngubjing nyi kpi elkpin lꞌtane ngubjing nyi bahke kpoko.

⁵ Esowo bi li nne no ma-r toobo bum re wahr bel nsol nyia, ye jꞌnehm wo ma-r bom esi, ka Etingi etohko.

⁶ Fvfo, e kpo bel esahb ngare anyehng anyehng. E kpꞌkahne re, eji e kpeke li go etahk ji li ngubjing nyia, e ka si rꞌrehng etahk ji Ntul Esowo.

⁷ Tibre e kpo jen go eltaame eltaame, e kpehme tohko nyehn go amahr.

⁸ Wahr ebbob eltim. Tibre bahk-r koro re wahr yake etahk ji li ngubjing nyia, fere song woomo go etahk ji Esowo.

⁹ Fvfo, afi e jolo go etahk, afi e fere tahme na etahk sa, e kpo nok re wahr lim ji kpo kor-e.

¹⁰ Tibre wahr ane kpee bahke yiimi go eti elam ji Kraist, eji nne awohng awohng lꞌbel ana ji á limi no ngare nyi á jolo go ngubjing nyia. Li ma jol ji kpꞌnobo, li ma jol ji kpꞌsabe.

Nne no lꞌjol ajehng a Kraist, ye nne a nfenfe wo

¹¹ Fvfo, eji e kpꞌkahne re, Ntul Esowo li nne no fuumu re wahr fahl-e, owo wahnge e kpo gare re wahr sennge ane ntim. Tibre Esowo kp-r kahne kpee ana wahr li no. Wo, n kpꞌbumu re, ń kpꞌtob kahn go egahna ntim.

¹² E nehme kpe tehk elnahre go egahne esamahr, e kp-n tibi na mbang nyi ḿ bahke jo geere kak-r, eji ń lꞌmal jo faange ane ba kpo geere kak nsol nyi nne kpꞌnyehne, ba kil jo geere kak nsol nyi wob go eltim nne.

¹³ Lꞌjol re wahr ebgbo esahl, e gbo esahl ka Esowo. E lꞌjol nseenge, e li nseenge ka wahn.

¹⁴ Tibre elkoro ni Kraist ni kp-r fili. Eji e ma seb kahn re, nne awohng wo kpo go esi ane kpee, owo fvfo ane kpee ma kpo.

¹⁵ Á kpo, ka ane kpee, eji ane ba li go elkpin lꞌkꞌkpe jol ka elbo antahng. Á kpo, eji bo lꞌjol ka nne no kpo no, fere nyahme tib go bo esi.

¹⁶ E kpehme kpe ko ane ana bo li go njini nyia. Ngare anyehng e ko Kraist go eyaame ji nne. Wo anv, e nehme kpe lim ano.

¹⁷ Fvfo, nne awohng awohng no li ajehng a Kraist, ye nne a nfenfe wo. Akꞌkulu nsol ebmal, anv, nya nfenfe nya ma fere ba.

¹⁸ Nsol nyia kpee lohng goji Esowo ba, ye ji ma lim etem a nahre, wahr ji jolo anebekv ebe. Etem bio sehng goji Kraist, á fere ka-r eltum ni e bahke jo lim ane bako, bo tob jol go etem a ne.

¹⁹ Ji n kpꞌbungu a, lohngo re, Esowo woomo Kraist go atahng, fere lim njini jol go etem a ne, bi li re, á nehm kpe fange abiafem ebo. Ye wo ma yake etib bio ka-r, bi kpo tib ana e bahke jolo go etem a ne.

²⁰ Anv, wahr ba li ane ba Kraist ma-r kak eltum, ba Esowo ma-r ko kpꞌrehke ane, fere jo gboongo bo go esi ji Kraist re, “Limen etem a Esowo!”

²¹ Tibre Kraist ji ki lim abiafem, ye wo Esowo ko-e lim ejum abiafem tib go egahre esi, eji e lꞌli eno go ege esamahr, e lꞌjol ajehng a Kraist.