Golosaayi 1 - NEAJEEDA EESH BEA BUUNEESSEAN

¹ Baulo was giijasoochcheanda Gristo Yeesu aba gidagasiida Aseetta, ea Dimotteo oorjeeda iyya.

² Heeda Aseetta fuga ghaydidi doobiiweadi was oorjoogiyya aba jeeda Gristo Yeesu ida Golosaayi: Gagasa anyasa dagheerjeandumeeda ea hoyyoo jea gwaleabu heeda Aseetta was Ghweandeanya.

Mooshta ghawooda bea Badischooda

³ Inyeessa galagasean geabadischeesi Aseetta was ghweanda Ng'uttamiideanya Yeesu Gristo, iisumwaashchchi Aseetta appadahuukkeagwa

⁴ aba gideaba siyiinyi iitta masaweegeagwa appadayda Gristo Yeesu ea gidoobwariydi fuga sean ghaydidi,

⁵ aba gideaba gidoararji jea egooneegwa aba hoowa bea humng'eedean. Aba ng'asheanda noobay ayiinya ammwadi aba jeeda giijasta miy bea huumwaan,

⁶ nea nihidu heedeang'wa, ea gidaguulleatta ng'eanyiissean gil, ak gwaji haghweega ak gwaheedu gawurji gidaheetteayda aba heedeang'wa, ghang'eada damanda ghayi oayinyi ak ghoanalli dagheerjeandumeeda Aseetta bea huumwa,

⁷ gawuurji gidanaaldaneegwa Epafra was soomjeanda subwariinyi. Niny ea doabiiwaat nea gagadiyeesa Gristo appadahuukkeagwa

⁸ ak ea ninung' eanala bariinyeegeagwa aba gurorooda.

⁹ Ak aba sareani dea ghayi siyinyi ng'asheesu ea miyeenung'waada mooshta ghawooda appadahuukeagwa, gideaba gagooneegwa Aseetta fughareeda huumwa bea gidagassiida niny ak gagooneegwa weaghumeeda ea nalooda aba jeesingeagwa,

¹⁰ ak abeeda gajoommuusa oppideatta gidagasiida Ng'uttamiida nea goosinnyi gichchea goohoosan, ak gibindeang'wa gaygwaji haghweega aba gadiyoojiga miyaas neagoheettu aba fughareeda Aseetta.

¹¹ Gagasa gagooneegwa gimusta sean bea uurdaannyi gheambiidaat, jea oammuusa nea ghoammuughu haleanjeesean nea goobeayi hoseaneega,

¹² nea goobadischeesi Bwaabwa nung' eammuusa eanyasa gheatta hearaniischooda sea fugaaschi ghaydidi aba jeeda weeshinda.

¹³ Ak niny gwalealnaneasa jeeda uurda misanumeeda ak goobaleegeasa ea ghwadeasa jeeda sugoochcheandumeeda Balleandaannyi bwariiy,

¹⁴ nea aba niny geendeawi lealeanooda nea ea samsiinda ring'eeda.

Gristo ea gadiyeadaannyi

¹⁵ Nea niny geegala Aseetta miidaachi ak ea duweachcheeda gil aba haleanjeesean;

¹⁶ aba gideaba haleanjeessean geesin appadaydeaba niny, gea mida humng'eeda ea gea mida ng'eanyiida, gea daach ea gea mii daach, ea hoorgajeega sugoodiga gil, ghanea sugoochcheandumeeda ghanea gea ambaliischi ghanea gheambalmeeda suu seaniin gwasin niny nea gwasin appadaydaannyi.

¹⁷ Niny ghayi gabay gwanda madeeda haleanjeessean, nea aba niny ghwanoas geat haleanjeessean.

¹⁸ Nea niny ea uhuuda saseeda gil, nea dea Ganiisa, nea niny ea ging'eetta, ak ea duweachcheeda leabu miyeeda, ak abeeda ghoaw siichchea goosheedeawa haleanjeessean.

¹⁹ Aba niny gammiisa goobiida headaannyi haleanjeeda hidaat bea Aseetta,

²⁰ nea aba niny gooduupchi geaw haleanjeessean gea mida ng'eanyi ghana gea mida humng'eeda, ak gwasin hoyyoo aba foojeanda weay appadayda beehiidaannyi.

²¹ Nea ammwadi agooga ea sihheelleweegwa nea gowoschi munyas fughareen, nea gosinnyi sinaweega munyas,

²² ak ea niduupchi aba saseadaannyi niny aba miyeadaannyi, ak abeeda ghwanung' ahuuwa fuga ghaydidi meerukunana badahuukka ng'asheega munyas ammwadeadaannyi.

²³ Asi iyoppiidi jeeda masaweega, ak ghoomiinaadi nea noahang'waanyichchi, nea meayameagwa aba heeda giijasta miy oayiinyi, ghayi surukkwiisa haleanjeessean mida hiing'eadayda humng'eeda, nea aniini Baulo geawoschi siidaannyi bea gadiyeeda.

Baulo soomjeanda gadiyeeda ganiisa

²⁴ Ak ghamneawa geang'weelayi aba sawanadeeda anyaschi appadahuukkeagwa, nea aba saseedeanyu ghahiichchi giikka shoodaan aba sawanadeeda Gristo appadayda saseadaannyi, nea ea ganiisa,

²⁵ ak aniini ea sinung' doaw siideaba gadiyeani, gawurji siida siitteaga gadiyeeda Aseetta sigoonan appadahuukkeagwa, ak geasinnyi gadiyeeda Aseetta ak geanal,

²⁶ nea makcheameani ghayi sifuyiin ghang'eada gweannyeekka ghayi bea garayiin ea jeachcheenga ak ghamneawa ea siitteajiisa fugaaschi ghaydidi.

²⁷ Aba jeannyaawa ghwaloat Aseetta ak ghwang' ghwanal Emoojiga gitteenna hawunda meanang'oochcheandumeeda ea makcheameeda gheambalmeadaannyi was Gristoyda mida jeedeang'wa, was rarooda gigheambiitta.

²⁸ Niny geergu aseasa, nea gereekusi giliwas sih nea geannaalji giliwas sih aba weaghuumeeda sean, ak geeyeadu giliwas sih nihissa heeda aba jeeda Gristo.

²⁹ Nea geasawannyi geaw aba nii, nea geamajeekchi aba uurda sinoodeaba gadiyeeni iin jeedeanyuun.