Ɩzayi 36 - A SƐB-SÕW

A Asiiri tẽw nãà bɛ bɔbr a Zerizalɛm bɛ́rʋ ɛ

¹ A Ezekɩasɩ naalʋ-dɩb yome pie nɩ anaar sob, a Asiiri tẽw nãà, Senakerib, tɩ wa na wa zɛb'ɩ a Zuda naalʋ-tẽw tẽ-bɛrɛ bɛ na cɔbrɩ a kpɛmɛ a zɛbr ƴãw a, zɛb de a.

² A Asiiri tẽw nãà tɩ be n Lakisɩ, ɛ́ tõ a sojarɩ nɩ-kpɛ̃ɛ ʋl na mɩ́ be a ʋ zie a nɩ zɛbr-nɩbɛ na yãwmɛ a, a nãà Ezekɩasɩ zie a Zerizalɛm. A sojarɩ nɩ-kpɛ̃ɛ na mɩ́ be a nãà zie a tɩ àr'a pɩɛlɩ a bɔw-wɛra kʋ̃ɔ ƴãwfʋ zie ʋl na be a saa-zu a, a sɔ́r na cere a Fɔbr-pɛwrbɛ pu-pʋɔ a zu.

³ Lɛ n'a Hɩlkɩahu bidɛb, Elɩakɩm, na ɩ a nãà yir nɩ-kpɛ̃ɛ a tɩ yi tuor'ʋ, ʋlɛ nɩ a sɛ-sɛbrɛ Sevina nɩ Asafʋ bidɛb, Yoa, na mɩ́ ƴɛ̀rɛ a nãà yúor ƴãw a.

⁴ A Asiiri tẽw dem sojarɩ nɩ-kpɛ̃ɛ na mɩ́ be a nãà zie a tɩ yel bɛ na: «Nyɩ cen tɩ ƴɛ̀r a Na-kpɛ̃ɛ na ɩ a Asiiri tẽw nãà a ƴɛ̀rʋ ŋa kʋ̀ a Ezekɩasɩ: “Bʋnʋ ƴãw n'a fʋ ƴãw a fʋ tɩɛrʋ?

⁵ Fʋ tɩɛrɛ kɛ́ ƴɛ̀rʋ tɛwr na tʋ̃ɔ́ na ɩ zɛbr pɔ̀lɛ́ nɩ kanyir a zɛbr ƴãw bɩɩ? Anʋ ƴãw n'a fʋ ƴãw a fʋ tɩɛrʋ, sʋ̃ɔmɩ gaarɩ bɛ cãà sàwr a ɩ̃ nɩ-kpɛ̃ɛnʋ a fʋ zu?

⁶ A Eziptɩ tẽw ƴãw n'a fʋ ƴãw a fʋ tɩɛrʋ, a bàa-kɛkɛr-kaba ŋa na mɩ́ nyɩ̀r sob nɛ za na mɩ́ yel k'ʋʋ nyɔw ʋ kɛ́ àr a nũu a. À ŋá n'a a Eziptɩ tẽw nãà, Faarawɔ̃, ŋmɛ̃ a bɛlɩ dem na mɩ́ ƴãw a bɛ tɩɛrʋ a ʋ ƴãw a zie!

⁷ Kapaw fʋ na sɔw mɛ̃ na: “A Sore tɩ Naaŋmɩn ƴãw n'a tɩ ƴãw a tɩ tɩɛrʋ.” Ɛcɛ a fʋ̃ʋ Ezekɩasɩ tɔr za n'ʋ ír a maalʋ-ziir nɩ a bàwr-maal-kube bɛr, ɛ́ yel a Zerizalɛm nɩ a Zuda tẽw dem k'aa Zerizalɛm bàwr-maal-kuur ŋa yõ niŋé n'a bɛ na puore a Sore.”

⁸ Ƴɛrɛŋa a, ɩ fʋ̃ʋ nɩ a ɩ̃ nɩ-kpɛ̃ɛ, a Asiiri tẽw nãà, nyɩ pɔ cier taa: ɩ̃ na kʋ̀ b'ɩ wie túr-ayi (2 000) fʋ̃ʋ na na tʋ̃ɔ́ nyɛ̃ wi-zɔmnbɛ bɛ zɔm a a.

⁹ Fʋ̃ʋ n'ɩ ŋan kʋ̃ tʋ̃ɔ́ ɩ a ɩ̃ nɩ-kpɛ̃ɛ tõ-tõ-bi-pʋrɩ woro ʋ lɩɛb zɔ ɩ! Ɛ́ fʋ ƴãw a fʋ tɩɛrʋ Eziptɩ tẽw ƴãw kɛ́ fʋ tʋ̃ɔ́ páw zɛbr-torkori nɩ wie!

¹⁰ Ɛ́ lɛb waar, a ɩ̃ nɩ-kpɛ̃ɛ wa na k'ʋʋ wa zɛb'ɩ a tẽw ŋa ɛ́ sãw ʋ bɛr, ɛ́ a bɛ ɩ a Sore n'ʋ bɔbr a lɛ bɩɩ? A Sore mɩŋa n'ʋ ƴãw a nʋɔr kʋ̀ ʋ a lɛ!»

¹¹ Lɛ n'a a Hɩlkɩahu bidɛb, Elɩakɩm, a Sevina nɩ a Yoa tɩ yel a Asiiri tẽw dem sojarɩ nɩ-kpɛ̃ɛ na mɩ́ be a nãà zie a: «Tɩ zɛlɛ fʋ na, ƴɛ̀rɛ nɩ tɩ arameyɛ̃, tɩ wone a na. Ɛcɛ ta ƴɛ̀rɛ nɩ tɩ ebre ɩ, a nɩbɛ na be a dacin zu bɛrɛ wone a tɩ ƴɛ̀rʋ a ƴãw.»

¹² Ɛcɛ a sojarɩ nɩ-kpɛ̃ɛ na mɩ́ be a nãà zie a tɩ sɔw na: «Nyɩ tɩɛrɛ k'aa nyɩ nɩ-kpɛ̃ɛ nɩ a nyɩɩm tɛwr so a ɩ̃ nɩ-kpɛ̃ɛ ƴɛ̀rʋ bɩɩ? A nɩbɛ bɛ ŋa za na be a dacin zu, ɛ́ kʋ̃ yaa kɛ́ dɩrɛ a bɛ bine nyúur'ɩ a bɛ dʋ́rʋ tɛwr mɛ̃ a nyɩɩm a, bɛlɛ mɩ̀ so a ƴɛ̀rʋ.»

¹³ Al pùorí, a sojarɩ nɩ-kpɛ̃ɛ na mɩ́ be a nãà zie a tɩ ìr'a àr, ɛ́ yel'ɩ kɔkɔ-kpɛ̃w nɩ a ebre: «Nyɩ bɛrɛ wone a Na-kpɛ̃ɛ, a Asiiri tẽw nãà, ƴɛ̀rʋ:

¹⁴ “Nyɩ ta ɩ a Ezekɩasɩ bɛ̀lɛ nyɩ ɛ: ʋ kʋ̃ tʋ̃ɔ́ faa nyɩ ɛ.

¹⁵ Ʋ yel kɛ́ nyɩ ƴãw a nyɩ tɩɛrʋ a Sore ƴãw, k'aa bɛ tɛr à ŋá ɩ, ʋʋ na faa nyɩ na, k'aa tẽ-kpɛ̃ɛ ŋa bɛ lore a Asiiri tẽw nãà nuru pʋɔ ɛ.

¹⁶ Nyɩ ta bɛrɛ wone a Ezekɩasɩ ƴɛ̀rʋ ɛ, nyɩ nɩ̃ɛ bɛrɛ wone a lɛ a Asiiri tẽw nãà na yere kʋ̀rɛ nyɩ a: Nyɩ nyɔw nɩ mɛ̃ báalʋ, nyɩ bɛr nyɩ tʋɔra kʋ̀ m. Lɛ n'a a nyɩ kãw za na mɩ́ dɩrɛ a ʋ divɛ̃ tɩɛ nɩ a ʋ kãkã-tɩɛ wɔmɛ, ɛ́ nyúur a ʋ sa-bie-kʋ̃ɔ-bɔw kʋ̃ɔ

¹⁷ gùre nɩ ɩ̃ wa lɛb wa tɛr nyɩ cen nɩ tẽw na ɩ mɛ̃ a nyɩ tẽw a, tẽw na tɛr ble nɩ divɛ̃ tɩɩr póru a, na tɛr dipɛ̃ nɩ divɛ̃ a.

¹⁸ A na ɩ à ŋá a, nyɩ ta sàw a Ezekɩasɩ bɛ̀lɛ nyɩ, ʋ na mɩ́ yel k'aa Sore na faa nyɩ na a ɩ. A nɩ-bʋʋr-yoru ŋmɩmɛ piw mɛ̃ nɩ vuo a bɛ ten deb ƴãw bɩɩ?

¹⁹ Bʋ̃ʋ n'ʋ a Amatɩ nɩ a Arpadɩ ŋmɩmɛ ɩ? Ɛ́ a Sefarwayim tẽw ŋmɩmɛ, bʋ̃ʋ n'ʋ a ɩ? Nɩr piw mɛ̃ nɩ sɔ́r a Samaari tẽw deb ƴãw ɩ?

²⁰ A ten á ŋá ŋmɩmɛ za pʋɔ a, buor'ʋ faa a ʋ tẽw a ɩ̃ nuru pʋɔ, a Sore na wa piw mɛ sɔ́r a Zerizalɛm deb ƴãw?”»

²¹ A bɛlɩ dem za na tɩ be be a tɩ ɩ n gbili, bɛ bɛ tɩ sɔw bom ɛ. Bʋ̃ʋ n'ʋ vɛ̃, lɛ n'a a nãà Ezekɩasɩ tɩ yel.

²² Al pùorí, a Hɩlkɩahu bidɛb, Elɩakɩm, na ɩ a nãà yir nɩ-kpɛ̃ɛ a, a sɛ-sɛbrɛ Sevina nɩ a Asafʋ bidɛb, Yoa, na mɩ́ ƴɛ̀rɛ a nãà yúor ƴãw a, tɩ taw nɩ a bɛ kparɩ cɩɛrɩ ɛ́ lɛb wa a Ezekɩasɩ zie, wa manɩ a lɛ a Asiiri tẽw dem sojarɩ nɩ-kpɛ̃ɛ na mɩ́ be a nãà zie a na yel a kʋ̀ ʋ.