Titus 2 - De Beebaa Dabu

Denga agoago heohi abodonu

¹ Aagai koe gi agoagona mee e bei dagodo o denga agoago heohi abodonu.

² Agoagona ange denga daane maatua gilaadeu gi dee unu gi ssenga, gilaadeu gi ni dangada e hagadubu i daho dangada, ma de maua i de golomagi olaadeu lodo; gilaadeu gi tuu gi makaga i de gai, ma de aloha, aama de hagaduu ngae i de lodo mmahi.

³ Gai e bei ai hogi denga haahine maatua, agoagona ange gilaadeu gi ni haahine dabu i delaadeu hai e hai hegau ai, gilaadeu gi dee hai samu, aabe gi ssenga ange gi de unu uvaini, aagai gilaadeu gi ni haahine e agoagona mee danuaa.

⁴ Gai gilaadeu gi agoago ange denga gauligi haahine, gi aaloha i olaadeu bodu ma alaadeu dama.

⁵ Gilaadeu gi golomagi ina olaadeu lodo, gai gi gilimalali, gilaadeu gi kana ange gi haia hegau i olaadeu hale, gilaadeu gi abodonu ange, aama de hagadubu olaadeu bodu, gi dee hagabaubau ina ai muna a de Maadua.

⁶ Gai koe gi agoagona ange hogi denga dama daane gilaadeu gi maua i de dugu iho olaadeu lodo.

⁷ Gai koe haia doo mouli gi se hagaago danuaa i au hegau alodahi e hai. Gai koe gi agoago i de lodo se muna abodonu gai e dee hai gi ni mee e hakadanga ai,

⁸ gai au mee e agoago ai gi dee maua e dangada i de hagabaubau, gai gi dogaa ai tangada e hai baasi adu gi de goe, gu deai ana mee e maua i de hagabaubau ai gidaadeu.

⁹ Agoagona ange de gau hai hegau dee ilaage gilaadeu gi daudali i lodo olaadeu dangada aamua, ma de hagamalangilangi gilaadeu i mee alodahi, aagai gi dee hagadaumee ange gi gilaadeu.

¹⁰ Gilaadeu gi dee gaiaadia mee a olaadeu dangada aamua, gai gilaadeu gi hagaagona ange bolo gilaadeu ni dangada e dee hadu muna gai e hai hegau i de muna abodonu, gai alaadeu hegau danuaa gi hagamahamaha ina muna a de Maadua taadeu Ia Hagaola.

¹¹ Go hiidinga de abodonu o de Maadua ne hagaago mai, gi hagamouli ai dangada alodahi,

¹² ma de agoago mai ai gidaadeu gi dilia hegau baubau ma lodo o henua i lalo, gai gi golomagi ina odaadeu lodo, ma de hai hegau i de heohi, aama de hai lodo o de Maadua i henua i lalo nei;

¹³ i de masavaa adaadeu e tali ai de mee adaadeu e tali hagalodolodo ange laa aagena, go de hagasula mai i de mahamaha taadeu Maadua maolunga, go taadeu Ia Hagaola go Iesu Klisdo.

¹⁴ Ia ne gaavange ia e hagao ai ma de hagaola mai ai gidaadeu i odaadeu baubau alodahi, gai ia ga hagagilimalali ai gidaadeu e hai ai ono dangada donu, go dangada e llodo abodonu laa e haia hegau danuaa.

¹⁵ Agoagona mee nei; e hagammahi ai olaadeu lodo, ma de hagakana ange gilaadeu i ssauaa gu gaavadu naa gi de goe. Gai koe gi dee dugua ange dahi dangada gi hagangadi mee ina goe.