Romans 2 - De Beebaa Dabu

De hagamodu heohi a de Maadua

¹ Deenei ai, koe, tangada e hagabaubau ina laa tangada ange laa, koe e deai donu soo heohi e hagabaubau ai dahi dangada. Koe e hagaduasala naa donu i dau hagabaubau dahi dangada, aagai koe e haisala hogi i mee nei.

² Gai gidaadeu e iloo bolo de hagamodu a de Maadua e heohi, gai ia e hagaduasala naa donu gilaadeu e haia mee nei.

³ Gai koe, tangada e hagabaubau ina gilaadeu e haia hegau bee nei, aagai koe e hai donu hogi mee nei, koe e maanadu naa bolo koe e maua gi ola mai i de hagaduasala a de Maadua?

⁴ Aabe koe e hagangadi mee naa donu de abodonu laumalie o de Maadua, ma tee moolau ono lodo aama de golomagi ono lodo? Koe e dee iloo laa donu bolo go de abodonu o de Maadua e haia ga maua gi dahuli oo lodo?

⁵ Aagai de makaga o oo lodo ma tee dahuli oo lodo, ne hai gi laumalie de lili e hagadabena adu gi de goe i de laangi o de bole, go de masavaa a de Maadua e hagasula mai ai dana hagamodu heohi.

⁶ Gai ia e hagamodu naa muna o dahi ma dahi gi bei dagodo o ana hegau:

⁷ gilaadeu ne duudagi de hai mee danuaa gi maua ai e gilaadeu de tuhi, ma de hagadubu, aama de angaanga e dee magau laa, gai ia ga gaavange ai gi gilaadeu de mouli e dee ngado mai.

⁸ Aagai gilaadeu e dee anga ange gi dangada, ma tee hagallongo ange gi de mee abodonu, gai e hagallongo ange gi de mee dee heohi, e tuu ange donu gi de bole ma de lili ⌊o de Maadua⌋.

⁹ Gai e dae mai naa de hagaduasala ma de hai ngadaa gi dangada alodahi e haia de baubau, ange gi de gau Ssuu i mua aama ange hogi gi denga Gentile,

¹⁰ gai gilaadeu alodahi e haia tanuaa e kave naa de mahamaha, ma de hagadubu, aama de baba, ange gi de gau Ssuu i mua aama ange hogi gi denga Gentile.

¹¹ Go hiidinga de Maadua e dee vae dangada.

¹² Dangada alodahi gu haisala gai tee iloo e gilaadeu de hainga e maakau naa hogi, e dee galemu delaadeu dee iloo de hainga; gai dangada alodahi ne haisala gai e iloo e gilaadeu de hainga e hagamodu naa hogi olaadeu muna i de hainga.

¹³ Gai e dee go gilaadeu e iloo laa de hainga e heohi i mada luu mada o de Maadua, aagai go gilaadeu e daudali i de hainga e hagaheohi ai.

¹⁴ (De masavaa naa huu o denga Gentile, go gilaadeu e dee iloo laa de hainga a Moses, e daudali ai i mee gu sisi i de hainga, gai de hainga laa gu se mee ange donu hogi gi gilaadeu, e dee galemu donu delaadeu de iloo de hainga.

¹⁵ Gai gilaadeu e hagaago mai bolo de hainga gu sisi donu i olaadeu lodo, gai tagi o olaadeu lodo e tala hagadonu hogi mee nei, gai alaadeu maanadu e hagabaubau aabe e hagaheohi gilaadeu,)

¹⁶ De mee nei e hai naa donu, i de laangi a de Maadua e hagamodu ai maanadu e dee iloo laa, i daho Klisdo Iesu, bei de hai gu tala ai i de longo danuaa oogu e agoago ai nei.

De gau Ssuu ma de hainga

¹⁷ Aagai noo koe e hagadaba bolo koe se dangada Ssuu e lango ange gi de hainga, ma de tala hagasoenga bolo koe se dangada niio de Maadua,

¹⁸ gai koe e iloo ono mee e lodo ai ma de buni ange gi de mee e heohi, i hiidinga koe gu agoago i de hainga;

¹⁹ gai noo koe gu iloo abodonu bolo koe se dangada e dagina gilaadeu e dee kide, gai se dangada e hagamaalama ina gilaadeu e nnoho i lo te gohu,

²⁰ gai se dangada e hagaheohi ina ange gilaadeu e llodo ssenga ma de agoago ange denga gauligi, go hiidinga koe gu iloo de hainga alodahi ma de muna abodonu —

²¹ gai koe tangada e agoagona ange dangada, gu aha goe gu dee agoago iho ai naa donu huu goe? Koe e agoago ange dangada gi dee gaiaa, aagai koe e gaiaa?

²² Koe e hagadaba, “Aude dagodo haisala,” aagai koe e dagodo haisala? Koe e kino i denga diinonga, aagai koe e gaiaa mee i lodo hale daumaha?

²³ Koe tangada e duuhia laa donu huu goe i dau iloo de hainga, koe e dee hagangadi mee laa de Maadua i dau oha de hainga?

²⁴ Gai gu sisi e hai ange, “De ingoo o de Maadua gu hagangadi mee ina i daho denga Gentile i oodou hiidinga.”

²⁵ De tuu dagaholiage e hanu donu ono haigamaiana noo koe e daudali i de hainga; aagai noo koe e oha de hainga, gai doo tuu dagaholiage gu bei donu tee tuu dagaholiage.

²⁶ Deelaa ai, noo tangada tigi tuu dagaholiage e daudali i muna o de hainga, gai e dee dau ai naa dono dee tuu dagaholiage laa gi se tuu dagaholiage?

²⁷ Gilaadeu e dee tuu dagaholiage laa gai e daudali i de hainga e hagabaubau naa de gau Ssuu ne gaavee laa de hainga gu sisi ma de tuu dagaholiage aagai e oha de hainga.

²⁸ Gai tangada Ssuu abodonu e dee se Ssuu donu huu i de baasi gi de angaanga, gai de tuu dagaholiage abodonu e dee se mee donu huu e hai laa daha o de angaanga.

²⁹ Aagai tangada Ssuu abodonu se mee mai i de lodo, gai de tuu dagaholiage abodonu se mee e hai i de lodo o tangada, i ssauaa o de Hagasaalunga ⌊Dabu⌋, e dee go hiidinga o de hainga gu sisi laa. Gai dono tuhi e dee se mee mai i daho dangada, aagai mai i daho de Maadua.