Romans 16 - De Beebaa Dabu

Hagaboo hagaodi

¹ Au e hai adu goodou gi abodonu ange gi taadeu daina hahine go Phoebe, ia se hine hai hegau i de nohoanga dabu o Cenchrea.

² Goodou balea ange ia i de ingoo o Tagi Maolunga, bei dagodo hegau e heohi i de hai i daho dangada o de Maadua, gai goodou bale ange ia i mee alodahi oona e duasala ai, go hiidinga gu soa dangada aana ne bale ange, gai ia ne bale mai hogi au.

³ Dagu hagaboo ange gi Priscilla ma Aquila, luoogu soa hai hegau i lodo o Klisdo Iesu.

⁴ Gilaau ne hagahai ngadaa olaau mouli i ogu hiidinga. Gai e dee go au donu huu, gai denga nohoanga dabu alodahi o denga Gentile e hagaahe ange hogi de abodonu i olaau hiidinga.

⁵ Dagu hagaboo ange gi de nohoanga dabu e daumaha laa i delaau hale. Dagu hagaboo ange gi dogu soa hagamogomogo go Epenetus, go taane ne hagadonusia Klisdo i Asia i taamada.

⁶ Dagu hagaboo ange gi Mary, e hagammahi laa ma e hai hegau adu gi goodou.

⁷ Dagu hagaboo ange gi Andronicus ma Junias, luu dangada Ssuu bei ogu dagodo, gai ne hhao hogi gi lo te hale pono madali au. Gilaau ni dangada e hagadubu i daho de gau tala, gai go gilaau i mua ne daudali ange i Klisdo i de au.

⁸ Dagu hagaboo ange gi dogu soa hagamogomogo i lodo o Tagi Maolunga go Ampliatus.

⁹ Dagu hagaboo ange gi Urbanus, tangada nogo hai hegau ange gi Klisdo madali gimaadeu, aama dogu soa hagamogomogo go Stachys.

¹⁰ Dagu hagaboo ange gi Apelles, ia se daane e hai hegau i de muna abodonu i lodo o Klisdo. Dagu hagaboo ange gi de huaabodu o Aristobulus.

¹¹ Dagu hagaboo ange gi Herodion, taane Ssuu bei ogu dagodo. Dagu hagaboo ange gi dangada alodahi i de hale o Narcissus, go denga daina i lodo o Tagi Maolunga.

¹² Dagu hagaboo ange gi Tryphena ma Tryphosa, go luu hine e mmahi i de hai ange gi Tagi Maolunga. Dagu hagaboo ange gi ssoa hagamogomogo go Persis, go de hine e hagaduu ngae ma e hai hegau ange gi Tagi Maolunga.

¹³ Dagu hagaboo ange gi Rufus, go taane hagadubu i lodo o Tagi Maolunga, aama ange hogi gi dono dinana gu se dinana laa hogi niiogu.

¹⁴ Dagu hagaboo ange gi Asyncritus, ma Phlegon, ma Hermes, ma Patrobas, ma Hermas, aama denga daina madali gilaadeu.

¹⁵ Dagu hagaboo ange gi Philologus, ma Julia, ma Nereus ma dono daina hahine, ma Olympas, aama dangada alodahi o de Maadua madali gilaadeu.

¹⁶ Goodou hagadau hagaboo i de oso dabu. Denga nohoanga dabu alodahi o Klisdo e gaavadu hogi delaadeu hagaboo gi goodou.

¹⁷ Denga daina, au e dangidangi adu goodou gi dagidiiloo dangada e hagadee heloongoi ina laa magavaa o dangada, ma de haia mee e dee bei de hai oodou gu agoago ai. Goodou gi dee hagabuni ange gi gilaadeu.

¹⁸ Go hiidinga de gau bee naa e dee hai hegau ange donu gi Klisdo taadeu Dagi Maolunga, aagai e maanadu donu huu de hhao olaadeu dinae. Gai gilaadeu e hagasegesege ange ma de hagasenga dangada tigi maua laa, i de vvae de mee danuaa mai i de mee baubau i alaadeu muna.

¹⁹ Go hiidinga dangada alodahi gu iloo dagodo o doodou hagallongo i muna, deenei ai, au gu malangilangi mmao i oodou hiidinga, gai au e lodo goodou gi heiangi i de mee danuaa gai gi dee heiangi i de baubau.

²⁰ De Maadua o de baba e moolau naa donu dana dagadagahi Satan gi lalo luoono vae. De abodonu o Iesu Klisdo taadeu Dagi Maolunga gi dagodo i oodou daha.

²¹ Timothy, dogu soa e hai hegau laa madali au, e gaavadu hogi dana hagaboo gi goodou, aama denga daane Ssuu go Lucius, ma Jason aama Sosipater.

²² Go au go Tertius ne siia nei de leda nei, au e hagaboo adu gi goodou i de ingoo o Tagi Maolunga.

²³ Gaius, taane gu abodonu mai nei gi de au ma de nohoanga dabu alodahi i kinei, e gaavadu dana hagaboo gi goodou. Erastus, tangada doange o de aduhale ma taadeu daina daane go Quartus e gaavadu delaau hagaboo gi goodou. [

²⁴ De abodonu o Iesu Klisdo taadeu Dagi Maolunga gi dagodo i oodou daha alodahi! Amen.]

Muna tuhi ma talodalo hagaodi

²⁵ Gidaadeu ga tuhi de ia e maua laa i de hagammahi oodou lodo, bei dagodo o de longo danuaa aagu gu agoago ai laa dagodo o Iesu Klisdo, bei de hai gu hagaago mai ai laa gi de au, de mee nogo dee iloo laa i dahi masavaa dau looloa,

²⁶ aagai iainei gu hagaago mai ma de hai gi iloo e denga huaahenua alodahi i muna a denga pelaabisi gu lava laa i de sisi, bei dagodo muna a de Maadua e dee ngado mai laa, gi maua ai e gilaadeu i de daudali ai i de gai —

²⁷ gidaadeu ga tuhi de Maadua donu huu e iloo mee laa ga hano ai i daho Iesu Klisdo! Amen.