Romans 14 - De Beebaa Dabu

Gi dee hagadau hagabaubau

¹ Goodou abodonu ange gi tangada e baageaa i de gai, aagai gi dee hagadaumee i mee e dagodo geegee ai maanadu a dangada.

² Dahi dangada e hagadonusia bolo ia e maua i de gai mee alodahi, gai tangada e baageaa dono gai e gai donu huu denga manu ssomo.

³ Tangada e gaina mee alodahi gi dee hagangadi mee ina tangada e dee maua i de gai mee alodahi. Gai tangada e dee gaina mee alodahi gi dee hagabaubau ina tangada e gaina; go hiidinga de Maadua gu abodonu ange gi de ia.

⁴ Gai go koe goai, gai koe ga hagabaubau ai tangada hai hegau o dahi dangada gee? Go dono dangada aamua donu huu e hagamodu ina be ia e duu ma e makaga aabe e deai. Gai ia e duu naa donu ga makaga, i hiidinga Tagi Maolunga e maua i de hai gi duu ia gi makaga.

⁵ Dahi dangada e hagadaba bolo dahi laangi e maolunga ange i laangi ange laa, gai tangada ange laa e hagadaba bolo laangi alodahi se dagodo daudahi donu huu. Gai dahi ma dahi gi iloo too donu bolo dana mee e iloo laa e heohi donu.

⁶ Tangada e hagadubu ina dahi laangi e hai e hagadubu ai Tagi Maolunga. Tangada e gaina laa gai alodahi e hagadubu Tagi Maolunga i dana gai mee laa, i hiidinga ia e hagaahe ange de abodonu gi de Maadua; aagai tangada e dee gaina mee laa e hagadubu hogi Tagi Maolunga ma de hagaahe ange ai de abodonu gi de Maadua.

⁷ E deai donu se dangada e huahua ai i dono mouli, aabe e huahua ai i dono magau.

⁸ Noo gidaadeu e mouli, gidaadeu e mouli e hagadubu ai Tagi Maolunga; noo gidaadeu e maakau, gai gidaadeu e maakau e hagadubu ai Tagi Maolunga. Deenei ai, gidaadeu nii Tagi Maolunga e dee hilihili be gidaadeu e mouli be maakau.

⁹ Deenei de hiidinga o Klisdo ne magau ai laa ma de mouli age ange, gai ia ga hai ai go Tagi Maolunga olaadeu e maakau aama gilaadeu e mouli.

¹⁰ Gai gu aha goe gu hagabaubau ai naa doo daina? Gai gu aha goe gu hagangadi mee ai naa doo daina? Go hiidinga gidaadeu alodahi e odi naa donu i de tuu i mada i mua o de nohoanga hagamodu muna o de Maadua.

¹¹ Go hiidinga gu sisi e hai ange, “E hagadaba Tagi Maolunga: au e hagatoo donu i dogu mouli, dangada alodahi e duuduli naa ga ino mai gi de au; dangada alodahi e hagataba naa bolo go au donu de Maadua.”

¹² Deelaa ai, dahi ma dahi e tala ange naa ono dagodo gi de Maadua.

Aude haia gi baageaa lodo o dahi

¹³ Deenei ai, gidaadeu ga tuu taadeu hagadau hagabaubau; aagai gi baba i odaadeu lodo bolo gidaadeu e dee hai dahi mee e hagabaageaa ai lodo o dahi, aabe gi ahe dua ai dahi oodou daina.

¹⁴ Au e iloo abodonu ma de hagadonusia i lodo o Tagi Maolunga go Iesu, bolo e deai donu se mee daudahi e dee gilimalali. Aagai e dee gilimalali donu huu noo tangada e maanadu bolo e dee gilimalali.

¹⁵ Noo dahi oo daina gu daemaha ono lodo, i hiidinga o au mee e gai, gai koe gu dee hai hegau i de aloha. Koe gi dee hagahaisala ina dahi dangada o Klisdo ne magau laa i ono hiidinga i au mee e gai.

¹⁶ Deenei ai, aude haia dau mee e hagadaba laa bolo e danuaa gi se mee e hagabaubau ina i daho dangada.

¹⁷ Go hiidinga de nohoanga hodooligi o de Maadua e dee go gai ma mee unu, aagai go de heohi ma de baba aama de malangilangi mai i daho de Hagasaalunga Dabu.

¹⁸ Be goai e hai hegau ange gi Klisdo i de lodo nei, e hagamalangilangi de Maadua aama de tuhi i daho dangada.

¹⁹ Deenei ai, gidaadeu ga hagaduu ngae e nnoho hagabuni i de baba ma de hagadau hagammahi odaadeu lodo.

²⁰ Goodou aude oohaa hegau a de Maadua i hiidinga o oodou mee e gai. Mee alodahi e gilimalali i de gai, aagai e dee heohi dau hagabaageaa lodo o dahi dangada i hiidinga o au mee e gai.

²¹ Gai e danuaa ange taadeu dee gai giidagi be go de unu denga uvaini, aabe go de hai dahi mee daudahi e hidi mai ai laa de haisala o doo daina.

²² Gai doo gai gi se mee i ooluu magavaa ma de Maadua. E manuuia tangada e dee hagabaubau donu huu ia i ana mee e hagabinga bolo e heohi i dana hai.

²³ Aagai tangada e lodo lagolago gu hagabaubau ina donu i ana mee e gai, go hiidinga ia e dee gaimee i de gai; gai mee alodahi e dee hai i de gai e haisala donu.