Romans 11 - De Beebaa Dabu

Dangada o Israel e doe

¹ Gai au e ssili adu hogi: de Maadua gu tili laa donu ono dangada? E dee maua donu! Go hiidinga au donu se dangada Israel, go dahi hagadiilinga o Abraham, mai i de aamuli o Benjamin.

² De Maadua tigi tili donu ono dangada, go dangada aana gu iloo laa madagidagi. Goodou e dee iloo laa muna a de Beebaa Dabu e tala ai laa dagodo o Elijah, i dono dalodalo ga hagabaubau ange de gau Israel gi de Maadua?

³ “Tagi Maolunga, gilaadeu gu daa oo pelaabisi ma gu maakau, gilaadeu gu oha oo mommee o ssigidaumaha, gai go au donu huu e doe, gai gilaadeu e ssala hogi au e daa gi magau.”

⁴ Gai aahee muna a de Maadua ne hai ange gi de ia? “Au gu hagadoe e hidumano dangada, tigi ino laa e daumaha ange gi Baal.”

⁵ Gai e bei ai donu hogi denga laangi nei, goi hanu donu gilaadeu e doe, gu hili i de abodonu o de Maadua.

⁶ Aagai noo mee nei ne maua i dono abodonu, gai gu dee go hiidinga ai loo hegau a dangada; ana vakaa de abodonu nei ga dee se abodonu.

⁷ Gai dee hee ai tagodo? De gau Israel tee maua i de kave de mee alaadeu ne hagammahi laa ga ssala. Gai go gilaadeu gu hili laa ne gaavee, aagai gilaadeu ange laa ne hagamakaga olaadeu lodo,

⁸ bei de hai gu sisi ai laa, “De Maadua gu hai gilaadeu gi ssenga, olaadeu ganomada gi dee gidee, gai olaadeu dalinga gi dee langona, ga dae mai ai gi anailaa nei.”

⁹ Gai David ne hagadaba, “Alaadeu daonga gi bei ssele ma de galauna, gi baakuu ai gilaadeu ma de kave ai hagaoanga o alaadeu hegau baubau,

¹⁰ olaadeu ganomada gi hagagohu gi dee maua ai e gilaadeu gi gidee, ma de ino gi lalo ga hano ai.”

Denga Gentile gu hagamouli hogi

¹¹ Deelaa ai, au e ssili adu ange: E aha, de gau Israel gu baakuu laa ma gu dee maua ange i de hiihidi age? E dee maua donu! Gai delaadeu haisala ne hai ga maua e denga Gentile de hagamouli, gi llodo gaiaa ai de gau Israel.

¹² Gai noo delaadeu haisala ne hai ga laumalie de manuuia ange gi henua i lalo, gai noo delaadeu dee maua ne hai ga manuuia denga Gentile, gai dee hee maa ai naa de laumalie de manuuia e humai noo gilaadeu alodahi gu dau!

¹³ Iainei gai au e basa adu gi goodou denga Gentile. I hiidinga au se dangada tala niio denga Gentile, gai au e tuhi donu dagu duuhanga hegau,

¹⁴ gai au ga hai ai gi llodo gaiaa ogu dangada go de gau Ssuu, gi hagamouli ai hanu gilaadeu.

¹⁵ Gai noo delaadeu tili ne hai ga maua i de hagadanuaa magavaa o de Maadua ma henua i lalo, gai dee hee maa ai naa noo gilaadeu gu hagaahe mai, e dee go de mouli mai i de magau?

¹⁶ Noo tiba i mua o de laabunga ne sigidaumaha laa e dabu, gai de laabunga alodahi e dabu hogi; noo denga aga o de manu somo e dabu, aagai denga laa alodahi e dabu hogi.

¹⁷ Aagai noo hanu laa gu aau gee, gai koe, de laa o de uli o dahi olive de vao, gu hagapigi ange madali denga laa ange laa, gai iainei koe gu kave hogi mahi mai i aga o de olive laa,

¹⁸ gai koe gi dee hagadaba bolo koe e maolunga ange i denga laa ange laa. Noo koe e lodo maolunga, gai koe gi manadua: e dee go koe e daohia age denga aga, aagai go denga aga e daohia age goe.

¹⁹ Gai koe e hagadaba, “Denga laa donu ne aau gee, gi maua ai i de hagapigi ange au.”

²⁰ Ni muna abodonu; gilaadeu ne aau gee, i hiidinga delaadeu dee hagadonusia, gai koe e pigi ange donu huu i doo gai. Deenei ai, koe gi dee hagamaolunga, aagai koe gi madagu.

²¹ Noo de Maadua ne aau gee denga laa donu, gai ia e aau gee naa donu hogi goe.

²² Deenei ai, galo ange diiloo dagodo o de abodonu ma de hagamaatagu o de Maadua: ia e hagamadagu ange gi gilaadeu gu tuu ma gu too, aagai e abodonu adu gi de goe, noo koe e duudagi de noho i lalo dono abodonu. Gai noo e deai, gai koe e tuu donu hogi ga doo.

²³ Gai e bei ai hogi de gau Israel, noo gilaadeu e dee duudagi delaadeu dee hagadonusia, aagai gilaadeu e hagaahe ange donu ga hagabigibigi ange gi de manu laa, i hiidinga de Maadua e maua i de hagaahe ange gilaadeu e hagabigibigi ange.

²⁴ Noo koe se laa ne aau mai i dahi olive de vao, ga hagapigi ange gi de olive ne doo laa, gai e kii ange donu de hai ngaohie, de hagaahe ange denga laa donu e hagabigibigi ange gi de olive ne aau mai ai laa.

De abodonu o de Maadua ange gi dangada alodahi

²⁵ Denga daina, au e lodo goodou gi tonu ange gi dagodo o de mee nogo dee iloo laa, gi dee hagataba ai goodou bolo goodou e heiangi i doodou hagassoenga: hanu dangada Israel ne hagamakaga olaadeu lodo ga dae ai gi de odi ange taelodo o denga Gentile i de loomai.

²⁶ Deenei de hai o Israel alodahi e hagamouli ai. Bei de hai gu sisi ai laa: “De Ia Hagaola e humai naa i Zion; gai ia e aau gee naa baubau o Jacob.

²⁷ Gai deenei dagu hagatoo donu hagaheloongoi e hai madali gilaadeu i dagu masavaa e aau gee ai olaadeu haisala.”

²⁸ Gai e soa dangada Ssuu gu hai ma gu ni hagadaumee niio de Maadua i oodou hiidinga, i hiidinga delaadeu dee hagadonu de longo danuaa. Aagai gilaadeu ni dangada niio de Maadua e aloha ai, i hiidinga ia ne hili olaadeu dubuna madagidagi.

²⁹ Go hiidinga de mee ngadi gaavange ma de hagahi a de Maadua e dee maua donu i de sui.

³⁰ I mua gai goodou e dee hagallongo ange gi de Maadua, gai iainei goodou gu kave dono abodonu i hiidinga tee hagallongo i muna o de gau Ssuu;

³¹ iainei gilaadeu gu dee hagallongo i muna, gi maua ai hogi e gilaadeu i de kave de abodonu o de Maadua gu hagaago adu naa gi goodou iainei.

³² Go hiidinga de Maadua gu hhao dangada alodahi gi lo te hale pono o tee hagallongo i muna, gi maua ai e ia i de abodonu ange gi gilaadeu alodahi.

Taahili tuhi

³³ Ga dae laa de gelo de lava ma de heiangi, ma de iloo mee o de Maadua! Ana hagamodu e dee maua e gidaadeu gi tonu ange aagena, ana haingaa mee e dee maua gi iloo!

³⁴ “Goai e donu ange gi maanadu a Tagi Maolunga, gai goai e balea ange ana hagasaele?

³⁵ Gai goai ne gaavange dahi mee gi de Maadua, gai ia ga hagao ange ai ia?”

³⁶ Gai go ia ne haia mee alodahi, gai mee nei ne loomai i ono daha, ma de hagahai hegau i dono sauaa. Gidaadeu gi hagamahamaha ina ia ga hano ai! Amen.