Revelation 7 - De Beebaa Dabu

De 144,000 dangada o Israel

¹ Dua mee laa gai au ne gidee e dogohaa dangada de langi e tuu i denga dege e haa o henua i lalo, ma e daohi ai de madangi gi dee ssau mai gi henua i lalo ma honga tai, aama honga denga manu ssomo.

² Gai au ne gidee ange hogi dahi dangada de langi e hanage i baasi i dua, gai ia e poo de mee hagamakaga a de Maadua e mouli laa. Gai ia ne oo ga hai ange gi denga dangada de langi e dogohaa laa, go de gau de langi gu gaavange laa aagena ssauaa e oha ai honga de henua ma honga tai,

³ ga hai ange, “Goodou aude dugua ange de madangi gi oohaa henua i lalo, be go tai aabe go denga manu ssomo, ga dae ai gi de lava taadeu hagailonga honga lae o de gau hai hegau o taadeu Maadua.”

⁴ Gai au ne langona taelodo o dangada gu hagailonga, se 144,000 ne hagailonga i denga aamuli alodahi o de gau Israel:

⁵ se 12,000 mai i de aamuli o Judah ne hagailonga, se 12,000 mai i de aamuli o Reuben, se 12,000 mai i de aamuli o Gad,

⁶ se 12,000 mai i de aamuli o Asher, se 12,000 mai i de aamuli o Naphtali, se 12,000 mai i de aamuli o Manasseh,

⁷ se 12,000 mai i de aamuli o Simeon, se 12,000 mai i de aamuli o Levi, se 12,000 mai i de aamuli o Issachar,

⁸ se 12,000 mai i de aamuli o Zebulun, se 12,000 mai i de aamuli o Joseph, gai se 12,000 mai i de aamuli o Benjamin.

Dahi hagabuulingaa dangada soa mmao

⁹ Dua mee nei, gai au ne galo age ga gidee dahi hagabuulingaa dangada soa mmao, gai e dee maua donu i de dau, gilaadeu ni dangada mai i denga huaahenua alodahi, ma aamuli, ma huaadangada aama denga hagadaagangaa muna; gilaadeu e tuu i mada i mua o de nohoanga laa, ma mada luu mada o Ssiibi Gauligi. Gilaadeu e kahu i malo tea, ma de daohi hanu lau palm.

¹⁰ Gai gilaadeu e oo ma e hagataba, “De hagaola se mee mai i daho taadeu Maadua e noho laa i honga de nohoanga laa, ma mai i daho Ssiibi Gauligi!”

¹¹ Gai de gau de langi alodahi e tuu laa i luu baasi de nohoanga laa, ma denga daane maatua, aama denga mee mouli e haa laa, ga hagabaakuu gi honga de gelegele i mada i mua o de nohoanga laa ga daumaha ange gi de Maadua,

¹² ga hagataba, “Amen! De manuuia, ma de mahamaha, ma de heiangi, ma de hagaahe ange de abodonu, ma de hagadubu, ma ssauaa aama de mmahi ni mee nii taadeu Maadua ga hano ai e dee ngado mai! Amen.”

¹³ Gai dahi daane madua laa ne ssili mai gi de au, “Goai aanei e kahu nei i denga malo tea, gai go hee olaadeu ne loomai ai nei?”

¹⁴ Gai au ne hai ange, “Dogu dangada aamua, koe e iloo.” Gai ia ne hai mai gi de au, “Aanei gilaadeu ne ola mai i de hagaduasala laumalie laa; gilaadeu gu taa olaadeu malo ma gu tea i dodo o Ssiibi Gauligi.

¹⁵ Deelaa ai, gilaadeu e tuu naa i mada i mua o de nohoanga o de Maadua, ga daumaha ange ai gi de ia i dono temple i de laangi ma de boo; gai de ia e noho laa i honga de nohoanga laa e buibui naa gilaadeu i dono noho i olaadeu daha.

¹⁶ Gai gilaadeu e dee hiikai ange naa donu, aabe e hieunu, gai de laa e dee maua naa donu i de hagammae gilaadeu, aabe go de dudu gilaadeu.

¹⁷ Gai Ssiibi Gauligi e duu laa i lo te ungaalodo o de mommee iai de nohoanga laa, go ia e hagaloosi ina gilaadeu; ia e dagi naa gilaadeu ga kave gi denga saalingaa vai o de mouli. Gai de Maadua e ssolo naa denga loimada i olaadeu ganomada.”