Revelation 6 - De Beebaa Dabu

Denga mee hagamakaga e hidu

¹ Gai au ne gidee bolo Ssiibi Gauligi ne oha tahi mee hagamakaga i denga mee e hidu laa, gai au gu langona dahi mee mouli laa ne hagadaba i de leo mmahi, bei de paa o de hatuli, “Sao hannoo!”

² Gai au ne galo age ga gidee dahi hoosa tea, gai de ia e gage ai e poo dahi mee hholu, gai gu dugu ange dahi hau gi honga dono biho, gai ia ga sao ga hano e hagamaakulu aama de hagadee kii.

³ Gai de masavaa huu a Ssiibi Gauligi ne oha ai de lua mee hagamakaga, gai au gu langona de lua mee mouli laa e hagadaba, “Sao hannoo!”

⁴ Gai gu sao mai ange hogi dahi hoosa, se hoosa mmea. Gai gu gaavange gi tangada e gage i ono elunga ssauaa e hai ai gi dee nnoho paba dangada i henua i lalo, ma de hai dangada gi hagadau daia gilaadeu gi maakau. Gai ne gaavange hogi dahi gadilaasa looloa gi de ia.

⁵ Gai de masavaa huu a Ssiibi Gauligi laa ne oha ai tolu mee hagamakaga laa, gai au gu langona tolu mee mouli laa e hagadaba, “Sao hannoo!” Gai tilo, au ne gidee dahi hoosa uli, gai de ia e gage i ono elunga e daohi mee hagahidi i lo tono lima.

⁶ Gai au ne langona dahi mee be se leo i magavaa o denga mee mouli e haa laa, e hagadaba, “Dahi koada wheat se dahi denarius e hagao ai, gai e dolu koada barley se dahi denarius e hagao ai, gai koe aude hai moumou ina denga lolo ma uvaini!”

⁷ Gai de masavaa huu a Ssiibi Gauligi ne oha ai de haa mee hagamakaga, gai au gu langona de haa mee mouli laa e hagataba, “Sao hannoo!”

⁸ Gai au ne galo age, ga gidee dahi hoosa mada tea, gai de ia e gage i ono elunga e hagaingoo ange go de Magau, gai Hades e daudali ange i de ia. Gai gu gaavange gi gilaau ssauaa e daa ai gi maakau e dahi diba i diba e haa o dangada i henua i lalo, i de gadilaasa, ma de onge, ma denga mee hagamaakau, aama denga manu alasala i honga de henua.

⁹ Gai de masavaa huu aana ne oha ai de lima mee hagamakaga laa, gai au ne gidee i lalo de mommee o ssigidaumaha denga hagasaalunga o dangada ne daia ga maakau, i hiidinga muna a de Maadua ma delaadeu agoago i muna laa.

¹⁰ Gai gilaadeu e hevaalogi ma e hagataba, “Tagi Maolunga e dabu ma de hai hegau i de mee abodonu, go aahee maa aau e hagaduasala ai ma de sui ange hegau a de gau henua i lalo i hiidinga omaadeu dodo?”

¹¹ Gai gu gaavange gi gilaadeu denga malo tea, ma de tala ange gilaadeu gi hagammabu ange i dahi masavaa bodobodo, ga dae ai gi de odi mai olaadeu soa ange laa, gai olaadeu daina ne daia laa ga maakau bei olaadeu dagodo gu odi ange hogi.

¹² Gai de masavaa aana ne oha ai de ono mee hagamakaga laa, gai au ne gidee bolo gu kona de ngalungalue de henua; de laa gu gohu bei de malo daladala uli, gai de maasina alodahi gu mmea bei denga dodo,

¹³ gai denga heduu i lo te langi gu too iho gi henua i lalo, bei dagodo o de fig e malili laa ono hua mmodo i de ssau mai o de madangi mmahi.

¹⁴ Gai de langi gu aau gee ga mulo bei dagodo o de beebaa mulo. Gai denga mounga ma denga modu alodahi gu hagangaalue gee mai i olaadeu duulanga.

¹⁵ Gai denga hodooligi o henua i lalo ma de gau maolunga, ma dagi o de hebagi, ma de gau lava, ma de gau mmahi, ma de gau hai hegau dee ilaage aama gilaadeu e ilaage, gu mmuni i lodo haonga ma magavaa hadu o denga mounga.

¹⁶ Gai gilaadeu ga hagahi denga mounga ma hadu, ga hai ange, “Malili iho ma gi hagamuunia gimaadeu i de ia e noho laa i honga de nohoanga laa, aama de bole o Ssiibi Gauligi.

¹⁷ Go hiidinga gu dae mai de laangi olaau e pole ai, gai goai naa donu e maua i de hai baasi ange?”