Revelation 17 - De Beebaa Dabu

De hine hai be se manu

¹ Gai dahi i magavaa o denga dangada de langi dogohidu ne gaavee laa denga boolo e hidu laa ne humai ga hai mai gi de au, “Humai, gai au ga hagaago adu gi de goe de hai e hagaduasala ai de hine hai be se manu, e noho laa i honga vai lagolago.

² Gai denga hodooligi o henua i lalo ne dagodo haisala madali ia, gai dangada o henua i lalo gu ssenga i delaadeu unu uvaini o dono dagodo haisala.”

³ Gai ia ne kave au gi de vao i ssauaa o de Hagasaalunga ⌊Dabu⌋. Gai au ne gidee dahi hahine e gage i honga dahi manu mmea alasala, gai dono angaanga e sisi ange aagena denga ingoo e hagangadi mee ina de Maadua, gai de manu laa e hidu ono biho ma e madaangahulu hanga.

⁴ Gai de hine laa gu gahu i denga malo purple ma de mmea ma de hagalaagii i denga goolo ma hadu hagamogomogo aama ango, gai ia e poo dahi ubu e honu i mee baubau ma de hakino gee o ana hegau hai be se manu.

⁵ Gai honga dono lae e sisi ai dahi mee e dee iloo laa: “Babylon de aduhale laumalie, tinana o de gau hai be ni manu, aama de hai denga dahulinga hakino gee o henua i lalo.”

⁶ Gai au ne gidee bolo de hine laa gu senga i de unu dodo o dangada o de Maadua, go dodo o dangada ne maakau laa, i hiidinga delaadeu tala hagadonu dagodo o Iesu. Gai de masavaa huu aagu ne gidee ai ia, gai au gu kona de lele ogu mouli.

⁷ Aagai tangada de langi ne ssili mai gi de au, “Gu aha gu lele ai naa oo mouli? Au e hagadonu adu naa donu gi de goe mee e dee iloo laa, i dagodo o de hine laa ma de manu alasala oona e gage ai laa, go de manu alasala e hidu laa ono biho ma e madaangahulu hanga.

⁸ De manu alasala aau ne gidee laa nogo mouli i mua, gai gu dee maleva, gai gu dai hanage ange naa i lo te geelonga e deai laa sono dagelo, gai gu baba ange e daa gi magau. Gai dangada i henua i lalo tigi sisi laa olaadeu ingoo i de Beebaa o de Mouli, mai i taamada de hai o henua i lalo, e llele naa olaadeu mouli i delaadeu gidee de manu laa, go hiidinga de manu alasala laa nogo mouli i mua, gai gu dee maleva, gai e ahe ange naa ga mouli age.

⁹ De mee nei go tangada heiangi donu huu e donu ange aagena: denga biho e hidu laa go mounga e hidu o de hine laa e noho ai laa,

¹⁰ gai mounga e hidu laa ni hodooligi hogi; e dogolima gu maakau, gai dahi goi mouli huu, gai dahi tigi dae mai. Gai dono masavaa naa huu e dae mai ai, gai ia e hodooligi naa donu huu i dahi masavaa bodobodo.

¹¹ Gai de manu alasala nogo mouli laa, gai gu dee maleva, ia go de valu hodooligi, gai ia se hodooligi hogi madali denga hodooligi dogohidu laa, gai e daa naa ga magau.

¹² Gai denga hanga e madaangahulu aau ne gide laa se dinoangahulu hodooligi, gilaadeu tigi kave olaadeu sauaa a e hodooligi ai, gai gilaadeu e kave naa ssauaa ga hodooligi ai i e dahi aoaa madali de manu alasala laa.

¹³ Gai gilaadeu e buni naa i de dugu ange olaadeu sauaa ma mmahi gi de manu alasala laa.

¹⁴ Gai gilaadeu e hulo naa ga hebagi ange gi Ssiibi Gauligi, aagai Ssiibi Gauligi e hagadee kii naa gilaadeu, go hiidinga go ia Tagi Maolunga o denga dagi, ma de Hodooligi o denga hodooligi. Gai dangada madali ia gu lava i de hagahi, ma de hili, gai gilaadeu e hai hegau i de mee abodonu.”

¹⁵ Gai ia ne hai mai gi de au, “Au vai e gidee naa i de mommee o de hine hai be se manu e noho ai laa, ni huaadangada soa ma huaahenua aama dangada e pasa i denga hagadaagangaa muna.

¹⁶ Gai hanga e madaangahulu aau ne gide laa ma de manu alasala laa, e kino naa i de hine hai be se manu laa; gilaadeu e kave gee naa ono goloa ma de hai gi deai ono malo e haoli ai, ma de gai ono kano aama de dudu ia i de ahi.

¹⁷ Go hiidinga de Maadua gu hai gi gilaadeu gi llodo e hagasula dana hagatau, i delaadeu buni ga gaavange ssauaa o olaadeu nohoanga hodooligi gi de manu alasala laa, ga dae ai gi de hagassula muna a de Maadua.

¹⁸ Gai de hine aau ne gidee naa go de aduhale laumalie e dagina denga hodooligi o henua i lalo.”