Psalm 65 - De Beebaa Dabu

Ange gi tagi o taahili. Se Psalm nii David . Se daahili

¹ De Maadua, e heohi donu de tuhi goe i Zion, ma de hagassula amaadeu hagatoo donu adu gi de goe.

² Koe, de ia e hagalaangona amaadeu dalodalo, dangada alodahi gi loomai gi de goe.

³ De masavaa o ogu baubau ne hai baasi mai ai gi de au, gai koe ne degi mai gi omaadeu haisala.

⁴ E manuuia gilaadeu aau e hili ga gaamai, gi noho i lo te buibui o doo hale! Gimaadeu e duadonu naa i mee danuaa i doo hale, go doo temple dabu.

⁵ De Maadua, demaadeu Ia Hagaola, koe ne basa mai gi amaadeu dalodalo i au hegau hagalele mouli, go koe de tali hagalodolodo o henua i lalo alodahi ma mommee mmao i honga tai.

⁶ Koe ne hagatuu denga mounga i oo mahi, ma de hagahai hegau oo mahi;

⁷ koe ne hai gi malino honga tai beabeau, ma de hai gi dee hagalongaa denga beau, gai ne hai gi dee hellumi denga huaadangada.

⁸ Dangada i luu bido o henua i lalo e maatagu i au hagailonga; koe e hai gi humai de malangilangi i baasi dua ga hano ai gi de baasi dai.

⁹ Koe e hano iho ga hagamaluulu henua i lalo; koe e hai gi ssomo danuaa mee i honga de gelegele. Denga saalingaa vai a de Maadua e hoohonu i de vai; koe e gaavange gi dangada alaadeu grain, gai go dau hagatau ne hai ai mee nei.

¹⁰ Koe e hagamaluulu ono mommee gu hagabalabala, ma de hagassoe denga mommee maolunga. Koe e hagabalabala de gelegele i de langi pala, ma de hagamanuuia de gelegele gi ssomo ai denga manu.

¹¹ Koe e hagamanuuia de ngadau i tau gai laumalie, gai au hada gu hoohonu i mee lagolago.

¹² De mommee iai helii i lodo henua gu lagolago mmao, gai denga duuduu gu malangilangi.

¹³ Mommee iai helii gu hoohonu i denga hagabuulingaa ssiibi, gai lodo geelonga gu dohu i denga grain; gilaadeu e hevaalogi ma de malangilangi ma de daahili.