Psalm 61 - De Beebaa Dabu

Ange gi tagi o taahili; e hua madali denga mee hagadangidangi iai daula. Se Psalm nii David

¹ De Maadua, hagalaangona dagu dangi; gai hagalaangona dagu dalodalo.

² Au e hagahi adu goe mai i de bido laa o henua i lalo, i de masavaa e baageaa ai ogu lodo; dagina ange au gi de baba makaga e maolunga ange laa i de au.

³ I hiidinga go koe dogu mommee buibui, ma de hale dagitilo maolunga oogu e buibui ai mai i ogu hagadaumee.

⁴ Au e noho naa i lo too hale ga hano ai, gai gi noho baba i lalo de malu o luoo bakau. Selah

⁵ De Maadua, koe gu langona dagu hagatoo donu, gai koe gu gaamai gi de au de boolonga o dangada e maatagu i de goe.

⁶ Haia gi kii ange de daulooloa de mouli o de hodooligi; gai ia gi mouli i denga atangada soa!

⁷ Gai ia gi hodooligi i mada luu mada o de Maadua ga hano ai; doo aloha ma doo hai hegau i de mee abodonu gi buibuia ia.

⁸ Gai au e daahili naa ga tuhi doo ingoo ga hano ai, ma de hagassula agu hagatoo donu i laangi alodahi.