Psalm 49 - De Beebaa Dabu

Ange gi tagi o taahili. Se Psalm nii de aamuli o Korah

¹ Denga huaadangada alodahi, nnoho mai hagalaangona de mee nei; alodahi e nnoho i henua i lalo, goodou hagalaangona;

² go de gau maolalo ma de gau maolunga, de gau lava ma de gau hagaau aloha.

³ Au e tala muna heiangi; gai maanadu mai i ogu lodo e hai gi tonu ange dangada.

⁴ Au e huli ange e hagallongo dahi muna hagasengasenga; au e hagadonu dagu mee hagasengasenga i dagu harp:

⁵ Gu aha gu madagu ai au i de masavaa hai ngadaa, ma de masavaa o de gau baubau e duuli ai au —

⁶ go dangada e tali hagalodolodo ange gi olaadeu lava aama de tuhi delaadeu llava mmao?

⁷ Ni muna abodonu, e deai se dangada e maua i de hagaola dahi dangada gee, aabe go de hagao ange de Maadua e hagaola ai dono mouli,

⁸ go hiidinga de hagaoanga o de mouli e hagao ngadaa mmao, e dee maua donu i de hagao gi odi ange,

⁹ gi maua ai e ia i de mouli ga hano ai, maa tee gidee de magau.

¹⁰ Gai ia e gidee bolo tangada heiangi e magau, gai e bei ai hogi tangada lodo senga ma tangada e deai ana mee e iloo, gai gilaau e dugu ange olaau goloa lagolago gi hanu dangada gee.

¹¹ Gai olaadeu daanunga go olaadeu hale ga hano ai, gai go olaadeu mommee nnoho i denga atangada alodahi, e dee galemu gilaadeu gu gaavange olaadeu ingoo gi olaadeu alahenua.

¹² Aagai ga lava naa donu tangada, gai ia e dee maua gi mouli ga hano ai, gai ia e magau naa bei dagodo o manu dolodolo.

¹³ Deenei tagodo o dangada e hagadonusia donu huu gilaadeu, ma dangada e malangilangi i olaadeu goloa lagolago. Selah

¹⁴ Gilaadeu gu paba ange laa e daa gi maakau bei dagodo o denga ssiibi; de magau e hagaloosi ange gilaadeu. Aagai de gau heohi e hagadee kii naa gilaadeu i taiao; olaadeu angaanga e pobo naa i lo te daanunga, gilaadeu gu mmao gee mai i olaadeu hale danuaa.

¹⁵ Aagai de Maadua e hagaola mai au i de mommee o de gau maakau, ia e kave naa au gi noho i ono daha. Selah

¹⁶ Koe gi dee manavasaa i de lava o dahi dangada, ma de masavaa e hagadagadaga age ai de mahamaha o dono hale.

¹⁷ Go hiidinga e deai donu sana mee daudahi e kave madali ia i dono magau; gai dono lava e dee maua donu i de kave madali ia.

¹⁸ Dono masavaa e mouli ai gai ia e maanadu bolo ia se dangada manuuia — gai dangada e tuhi goe i doo hagadagadaga age —

¹⁹ aagai ia e magau naa bei atangada o ono dubuna madagidagi, gai gilaadeu e dee gidee ange naa donu de maalama.

²⁰ Tangada lava, gai e dee donu ange, e bei donu huu denga manu dolodolo e maakau laa.