Psalm 31 - De Beebaa Dabu

Ange gi tagi o taahili. Se Psalm nii David

¹ Tagi Maolunga, go koe dogu buibui; koe gi dee hagadogaa ina loo au; gai hagaola ina hogi au i doo heohi!

² Hagabaa ina mai doo dalinga gi de au, hagamoolau mai hagaola ina dogu mouli. Go koe de baba oogu e mmuni ai, gai go de hale buibui makaga oogu e ola ai.

³ Go koe dogu baba makaga ma dogu mommee buibui makaga; dagina huu au ma de poo dogu lima i hiidinga doo ingoo.

⁴ Hagauia de galauna alaadeu gu buulou ai au, i hiidinga go koe dogu buibui.

⁵ Au e dugu adu dogu hagasaalunga gi lo too lima; Tagi Maolunga, de Maadua, e hai hegau laa i de muna abodonu, koe gi hagaola ina ngau.

⁶ Au e kino i gilaadeu e daumaha ange gi denga diinonga e deai olaadeu haigamaiana: aagai au e hagadonusia Tagi Maolunga.

⁷ Au e lodo danuaa ma de malangilangi i doo lodo aloha, i hiidinga koe e gidee dogu hagaduasala ina, ma de donu ange gi de duasala ogu lodo,

⁸ gai koe tee gaavange au gi ogu hagadaumee, gai ne hai au gi duu i de mommee lahalaha.

⁹ Tagi Maolunga, abodonu mai gi de au i dogu duasala; luoogu mada gu hhua i dogu dangi, gai e bei ai hogi dogu hagasaalunga ma dogu angaanga.

¹⁰ Dogu mouli gu honu i de hai ngadaa, gai au e gonogono i dogu duasala; gu deai ogu mahi i hiidinga dogu hagaduasala ina, gai ogu ivi e hagadaga mai huu de baageaa.

¹¹ Ogu hagadaumee gu hagangadi mee au, dangada e paa mai gi de au e kino i de au; dangada e iloo au gu maatagu i de au, gai gilaadeu e hedae mai gi de au i honga de haiava e saavini ma e hulo gee i de au.

¹² Gilaadeu gu ngalo au bei dagodo o tangada gu magau, au gu bei dagodo o de gumedi hadu gu mahaa laa.

¹³ Au e langona dangada soa e hagadau musumusu i de au; de mee hagamaatagu gu dagodo i mommee alodahi; gilaadeu gu buni e hai baasi mai gi de au ma de hai dahi hagatau e daa ai au gi magau.

¹⁴ Aagai au e gai adu gi de goe, e Tagi Maolunga, au e hagadaba, “Go koe donu dogu Maadua.”

¹⁵ Go koe e daohia dogu mouli; hagaola ina mai au i ogu hagadaumee ma mai i gilaadeu e vaivai haia ngau!

¹⁶ Koe gi malangilangi i de au doo dangada hai hegau; hagaola ina mai au i doo lodo aloha e deai laa se helui.

¹⁷ Tagi Maolunga, aude dugu ange gi hagadogaa ina ngau, i hiidinga au e dangi adu gi de goe; haia gi dookaa de gau baubau, gai gilaadeu gi dee mmuu gi hulo ai gi de mommee o de gau maakau.

¹⁸ Hagapunidia ngudu o de gau hadu muna, go de gau hagamaolunga ma de lodo maolunga e pasa hagamaolunga laa i gilaadeu e heohi.

¹⁹ Ga dae laa de laumalie doo abodonu, gu hagadabena ange gi gilaadeu e maatagu i de goe, ma de abodonu ange gi gilaadeu e haia goe go delaadeu buibui i madamada o dangada!

²⁰ Koe e hagammuni gilaadeu i mada luoo mada, mai i hagatau baubau a dangada; koe e buibui gilaadeu i doo mommee mai i dangada e hagabaubau ina gilaadeu.

²¹ Hagadegi ina Tagi Maolunga, go hiidinga ia ne lodo aloha mmao i de au, i de masavaa oogu e noho ai i de aduhale gu duuli ina luu baasi.

²² Au ne hagadaba i de manavasaa ogu lodo, “Au gu aau gee mai i mada luoo mada!” Aagai koe ne langona dagu dangidangi i de masavaa aagu ne hagahi adu ai goe gi balea mai au.

²³ De gau dabu alodahi, goodou aaloha i Tagi Maolunga! Tagi Maolunga e buibui tangada e hai hegau i de muna abodonu, aagai e sui ange donu hegau a tangada hagamaolunga.

²⁴ Goodou alodahi e tali hagalodolodo ange gi Tagi Maolunga, goodou gi lodo mmahi ma de lo taane!