Psalm 19 - De Beebaa Dabu

Ange gi tagi o taahili. Se Psalm nii David

¹ De langi e hagaago mai de mahamaha o de Maadua; mee i lo te langi e tala dagodo ana hegau ne hai.

² Denga laangi e aheahe ange ma e tala, denga boo e aheahe ange ma e hagaago mai dono iloo mee.

³ E deai e pasa aabe ni muna e tala; e dee langona hogi olaadeu leo.

⁴ Olaadeu leo e hulo ma e tae gi henua i lalo alodahi, gai alaadeu muna e tae gi de bido laa o henua i lalo. De Maadua gu hagaduu dahi hale malo moo de laa i lo te langi,

⁵ de laa e sobo age bei taane gu hai bodu e sao mai laa i lo tono aabi, gai e bei taane hagadaahao e malangilangi laa i de savini e houhou.

⁶ De laa e sobo age i de baasi gee o de langi, gai e hano ga danu i de baasi ange laa; gai e deai donu se mee daudahi e dee langona iho dono mahana.

⁷ De hainga a Tagi Maolunga e honu danuaa, gai e hagammahi de lodo; muna a Tagi Maolunga ni muna abodonu, gai e hai ga heiangi gilaadeu e ssenga.

⁸ Mee a Tagi Maolunga e hagasauaa e heohi, gai e hagamalangilangi lodo o tangada. Muna a Tagi Maolunga e gilimalali, gai e hagamaalama luu mada o tangada.

⁹ De madagu i Tagi Maolunga e gilimalali, gai e dagodo ga hano ai. De hagamodu a Tagi Maolunga se muna abodonu gai e heohi alodahi.

¹⁰ Ana muna e hagamogomogo ange i goolo, ma goolo danuaa hugadoo; gai e maimai ange i denga hooni ma denga hooni mai i lo te mommee iai hooni.

¹¹ Muna nei e hagakana ange lodo o doo dangada hai hegau; gai e laumalie donu de hagaoanga o tangada e daohia muna nei.

¹² Goai e maua gi iloo ono haisala? Koe gi degi mai gi ogu haisala e dee iloo laa.

¹³ Buibuia hogi doo dangada hai hegau gi dee haisala i de hai ogu lodo; gai ogu haisala gi dee dagina hogi au. Gai gi dee haisala ai au i de haisala laumalie.

¹⁴ Haia agu muna e tala ma hagasaele i ogu lodo gi ni mee e hagamalangilangi ina goe, Tagi Maolunga, go koe dogu baba makaga ma dogu Ia Hagaola.