Psalm 17 - De Beebaa Dabu

Se dalodalo nii David

¹ Tagi Maolunga, hagalaangona dogu heohi, hagasula ina dagu dangidangi! Hagalaangona dagu dalodalo — se dangidangi e dee hai i de hagasenga!

² Koe gi hagamodu ina bolo au e dee haisala; koe e gidee be se aha e heohi!

³ Koe gu hagatale dagodo o ogu lodo, gai ga hagataalea naa donu e goe ogu dagodo i de boo, gai koe e dee gidee dahi mee daudahi; au gu hagatau bolo au e dee haisala donu i agu muna e tala.

⁴ Gai dagodo hegau a dangada — au muna gu hai au gi dee daudali i hegau a tangada e vaivai haia dangada.

⁵ Au e seesee donu huu i oo haiava; luoogu vae e dee baakuu naa donu.

⁶ Dogu Maadua, au e hagahi adu goe, go hiidinga koe e basa mai gi de au; huli mai doo dalinga hagalaangona ai dagu dalodalo.

⁷ Hagaagona mai gi de au doo aloha hagalele mouli; koe e hagaola i doo lima madau gilaadeu e loomai e buibui i oo daha, i hiidinga o olaadeu hagadaumee.

⁸ Buibuia mai au bei dagodo o tama legalega eidu o doo ganomada, ma de hagammuni au i lalo de malu o luoo bakau,

⁹ mai i de hagaduasala a tangada baubau, ma mai i ogu hagadaumee hagamaakau e duuli ina luoogu baasi.

¹⁰ Gilaadeu e hagamakaga olaadeu lodo, gai gilaadeu e pasa hagamaolunga.

¹¹ Gilaadeu e ssala ga gidee au ma de duuli luoogu baasi; gilaadeu e dagitilo e hagabaguu au gi honga de gelegele.

¹² Gilaadeu e bei dagodo o de laiono hiigai e gaina laa dahi manu, ma de laiono mmahi e noho laa ma e dagitilo i lodo mee muimui.

¹³ Tagi Maolunga, hidi age, hagadee kii ina gilaadeu! Gai hagaola ina mai au i de gau baubau i dau gadilaasa.

¹⁴ Tagi Maolunga, hagaola ina ngau mai i de gau bee nei, ma mai i dangada o henua i lalo nei, go gilaadeu e kave olaadeu hagaoanga i de mouli nei. Gai koe gaavange gi gilaadeu de hagaduasala aau gu hagadabena ange gi gilaadeu; alaadeu dama e duadonu, gai gilaadeu e dugu ange olaadeu goloa lagolago gi alaadeu dama.

¹⁵ Aagai au — au e gidee naa luoo mada i de heohi; gai au e honu naa dogu malangilangi i dagu gidee luoo mada i de masavaa oogu e alahage ai.