Psalm 145 - De Beebaa Dabu

Se daahili tuhi nii David

¹ Au e hagaamua goe, dogu Maadua de Hodooligi; au e hagadegi doo ingoo ga hano ai e dee ngado mai.

² Au e hagadegi goe i laangi alodahi, ma de tuhi doo ingoo ga hano ai e dee ngado mai.

³ Tagi Maolunga e maolunga mmao, gai e heohi de hagalaumalie dono tuhi; dono maolunga e dee maua gi de tonu ange aagena.

⁴ Dahi atangada e tuhi ange naa au hegau gi dahi atangada ange, gilaadeu e tala naa dagodo o au hegau sauaa.

⁵ Gilaadeu e pasa naa i dagodo o doo mahamaha mmao ma doo maolunga, gai au e hagamaumau naa dagodo o au hegau hagalele mouli.

⁶ Gilaadeu e tala naa dagodo sauaa o au hegau hagamaatagu; gai au e tala dagodo o doo maolunga.

⁷ Gilaadeu e hagadele naa dagodo o doo abodonu laumalie, ma de daahili i de malangilangi i hiidinga doo heohi.

⁸ Tagi Maolunga e degi ma de lodo aloha, gai e dee moolau de lili gai e honu i de abodonu.

⁹ Tagi Maolunga e abodonu ange gi dangada alodahi, gai e lodo aloha ange gi mee alodahi aana ne hai.

¹⁰ Tagi Maolunga, mee alodahi aau ne hai e hagaahe adu naa de abodonu gi de goe, oo dangada dabu e tuhi naa goe.

¹¹ Gilaadeu e tala naa dagodo de mahamaha o doo nohoanga hodooligi, aama dagodo o doo sauaa,

¹² gi iloo ai e dangada alodahi dagodo o au hegau sauaa ma de mahamaha o doo nohoanga hodooligi.

¹³ Doo nohoanga hodooligi e dee ngado mai donu, gai doo sauaa e dagi ai e dagodo i denga atangada alodahi. [Tagi Maolunga e hai hegau i de mee abodonu i ana hagatoo donu alodahi, ma de malangilangi i mee alodahi aana ne hai.]

¹⁴ Tagi Maolunga e bale ange gilaadeu alodahi e baakuu, gai e hagadaangage age gilaadeu gu ino gi lalo.

¹⁵ Mee alodahi e tali adu goe, gai go koe e gaavange alaadeu gai i de masavaa heohi.

¹⁶ Koe e hhola doo lima, ga hai gi boobosu mee alodahi e mouli.

¹⁷ Tagi Maolunga e heohi ono haiava alodahi, gai e abodonu i hegau alodahi aana e hai.

¹⁸ Tagi Maolunga e baa ange gi gilaadeu e hagahia ange ia; go gilaadeu alodahi e hagahia ia i de muna abodonu.

¹⁹ Ia e gaavange naa gi gilaadeu e maatagu i de ia olaadeu mee e llodo ai; ia e hagallongo alaadeu dangidangi ma de hagaola gilaadeu.

²⁰ Tagi Maolunga e dagitilo gilaadeu alodahi e aaloha i de ia, aagai e daa gi maakau de gau baubau alodahi.

²¹ Au e tala tuhi dagodo o Tagi Maolunga. Alodahi e mouli gi hagadegi ina dono ingoo dabu ga hano ai e dee ngado mai.