Psalm 127 - De Beebaa Dabu

Se daahili nii Solomon ange gi de loage ⌊e hulo gi Jerusalem⌋

¹ Noo e dee go Tagi Maolunga e hagaduulia de hale, gai hegau a denga labagau e deai donu haigamaiana. Noo e dee go Tagi Maolunga e hagaloosia de aduhale, gai hegau a denga daane hagaloosi e deai donu haigamaiana.

² E deai haigamaiana doo oho age i taiao, ma de ala i de boo, ga hai hegau ange gi denga mee gai, go hiidinga de Maadua e gaavange mee nei gi dangada oona e aloha ai i delaadeu sseni.

³ Tilo, denga dama se boolonga mai i daho Tagi Maolunga, denga dama se manuuia mai i ono daha.

⁴ Gai denga gauligi e hagadili laa i de masavaa o tangada e dama daane ai e bei denga dao i lo te lima o taane hebagi.

⁵ E manuuia taane e soa ana dama; ia e bei taane e honu dana mee hao dao. De gau bee nei e dee dookaa naa donu i de masavaa olaadeu e hagadaumee ai madali olaadeu hagadaumee i de haitoga o de aduhale.