Proverbs 30 - De Beebaa Dabu

Muna a Agur

¹ Muna a Agur tama daane a Jakeh — ni muna hagadaemaha. Taane nei ne tala ange gi Ithiel, ange gi Ithiel ma Ucal:

² Go au hugadoo e senga i dangada; au e deai sogu iloo mee bei dangada.

³ Au tigi agoago i dagodo o de heiangi, aabe go de iloo mee o de Ia Dabu laa.

⁴ Goai gu hanage gi de langi ma gu ahe iho? Goai gu boogia de madangi i lodo luoono lima? Goai gu sabinia denga vai i dahi malo? Goai ne hagatuulia dege o henua i lalo? Goai dono ingoo, gai goai de ingoo o dana dama? Daalaa mai noo koe e iloo!

⁵ Muna hugadoo a de Maadua e heohi abodonu; gai ia e bei de mee hungihungi e buibui ai gilaadeu e mmuni i ono daha.

⁶ Aude hagapuni ina ange dahi muna gi ana muna, ia kana hagasee goe, gai gu iloo bolo koe se dangada hadu muna.

⁷ E lua agu mee e dangidangi adu ai, gai koe gi dee daohia mee nei i de au i mua dogu magau:

⁸ gaavee gee de mee dee heohi ma de hadu muna mai i ogu daha; gai haia gi dee hagaau aloha au aabe gi kona dogu lava, aagai gaamai donu huu gai e danuaa mai gi de au i dahi laangi;

⁹ kana gona odi naa huu de lagolago agu mee, gai au ga hagangadi mee goe, gai au ga hagadaba, “Goai donu go Tagi Maolunga?”, aabe e kona dogu hagaau aloha, gai au ga gaiaa, ga dee hagadubu ai de ingoo o dogu Maadua.

¹⁰ Aude hagabaubau ina ange dahi dangada hai hegau gi dono dangada aamua, ia kana hagabaubau goe, gai koe gu haisala.

¹¹ E hanu dangada e hagamalaia olaadeu damana gai e dee hagamanuuia olaadeu dinana.

¹² Hanu dangada e maanadu bolo gilaadeu e gilimalali, gai tigi hagagilimalali donu denga mee hakino gee i olaadeu lodo.

¹³ Hanu dangada e kona de lodo maolunga, gai e kona de hagangadi mee dangada.

¹⁴ Dangada e kangi olaadeu niho bei denga gadilaasa, gai ivi o olaadeu gauvae e bei denga hulu manu kangi, gai gilaadeu e hagaduasala ai de gau hagaau aloha i honga de henua ma de hai gi odi gilaadeu e duasala i magavaa o dangada.

¹⁵ Dahi dangaloa unu dodo e dogolua ana damaa hine; gilaau e hagataba, “Gaamai, gaamai!” E dolu mee e dee maua donu gi lava olaadeu mee e llodo ai, gai e haa mee dee haihai donu ga hagataba, “Gu lava!” —

¹⁶ go de mommee o de gau maakau, go de hine e dee maua gi haanau, go de gelegele e dee maua laa gi lava vai iai, aama de ahi e dee haihai laa ga hagataba, “Gu lava!”

¹⁷ Tangada e hakadanga i dono damana ma de kino i de hagallongo ange gi dono dinana e naonao ina naa luoono hadu mada i denga raven o de geelonga, ma de gaina i denga vulture.

¹⁸ E dolu mee e kona de hagalele mouli olaadeu dagodo, gai e haa mee oogu e dee donu ange aagena:

¹⁹ go dagodo o de igele i lo te langi i lunga, ma dagodo o de labodo i honga dahi hadu, ma dagodo o de vaga i honga de moana, aama dagodo o taane madali dahi damaa hine.

²⁰ Aanei dagodo o de hine dau bodu dagodo haisala: ia e gaimee, ga lava ga ssolo dono ngudu, ga hagadaba, “Au tigi hai donu dahi mee dee heohi.”

²¹ E dolu mee e haia ga bolebole henua i lalo, gai e haa mee o henua i lalo e dee bau ange aagena:

²² go tangada hai hegau e sula laa ga se hodooligi, ma tangada lodo senga e gaimee laa ga bosu,

²³ ma de hine o dangada e kino ai, gai gu hai bodu, ma de hine hai hegau e gaavee laa tuulanga o dono hahine aamua.

²⁴ E haa mee vaaligiligi i henua i lalo, gai e kona de heiangi:

²⁵ denga loa e dee ni manu mmahi, aagai e hagabudu alaadeu gai i de masavaa mahanahana;

²⁶ denga badger i lodo hadu e dee ni manu mmahi, gai e hai olaadeu hale i magavaa o denga hadu;

²⁷ denga itebuubuu e deai donu selaadeu hodooligi, gai gilaadeu alodahi e hagatau ma e hulo ai;

²⁸ de belu e maua i de poo i de lima o tangada, aagai e noho i lodo hale o denga hodooligi.

²⁹ E dolu mee mahamaha delaadeu hai e seesee ai; e haa mee e tilo danuaa i delaadeu seesee:

³⁰ go de laiono, e mmahi ange laa i denga manu aada alodahi, e deai se mee daudahi oona e madagu ai;

³¹ ma de gaagoo daane e seesee hagasoenga laa, ma de guudi daane, aama de hodooligi madali dono hagabuulinga hebagi.

³² Noo koe se lodo senga ga hagamaolunga ai donu huu goe, aabe koe gu hagatau e hai de baubau, gai koe bonodia doo ngudu i doo lima.

³³ Vai uu e kalo laa e hulo ga ni bada; de usu e duugia laa e sali mai ai todo, gai e bei ai hogi dau hai ga lili tangada e hidi mai ai de hebagi.